ನವದೆಹಲಿ: ಸಾಮಾಜಿಕ ಜಾಲತಾಣ ದೈತ್ಯ ಕಂಪನಿಗಳಲ್ಲಿ ಒಂದಾದ ಟ್ವಿಟರ್ ಅನ್ನು ಅಮೆರಿಕದ ಟೆಸ್ಲಾ ಎಲೆಕ್ಟ್ರಿಕ್ ಕಾರು ಕಂಪನಿಯ ಮುಖ್ಯಸ್ಥ ಹಾಗೂ ವಿಶ್ವದ ನಂ.1 ಶ್ರೀಮಂತ ಎಲಾನ್ ಮಸ್ಕ್ ಖರೀದಿಸಿರುವುದು ಅಧಿಕೃತವಾಗಿದೆ.
ಪ್ರತಿ ಷೇರಿಗೆ 54.2 ಡಾಲರ್ನಂತೆ ಸುಮಾರು 44 ಬಿಲಿಯನ್ ಡಾಲರ್ನೊಂದಿಗೆ ಟ್ವಿಟರ್ನ ಸಂಪೂರ್ಣ 100 ರಷ್ಟು ಷೇರನ್ನು ಎಲಾನ್ ಮಸ್ಕ್ ಖರಿದೀಸಿದ್ದಾರೆ. ಮೈಕ್ರೋಬ್ಲಾಗಿಂಗ್ ಸೈಟ್ ಕಳೆದ ಕೆಲವು ವಾರಗಳಿಂದ ಮಸ್ಕ್ ಅವರ ಆಫರ್ ಅನ್ನು ಮೌಲ್ಯಮಾಪನ ಮಾಡುತ್ತಿತ್ತು. ಕೊನೆಗೂ ಆಫರ್ಗೆ ಓಕೆ ಆಗಿದ್ದು, ಅಧಿಕೃತವಾಗಿ ಟ್ವಿಟರ್ ಎಲಾನ್ ಮಸ್ಕ್ ತೆಕ್ಕೆಗೆ ಬಿದ್ದಿರುವುದಾಗಿ ಟ್ವಿಟರ್ ಅಧ್ಯಕ್ಷ ಬ್ರೈಟ್ ಟೈಲರ್ ತಿಳಿಸಿದ್ದಾರೆ. ಮಸ್ಕ್ ಅವರು ಈ ಹಿಂದೆ ಟ್ವಿಟರ್ನಲ್ಲಿ 9.2 ರಷ್ಟು ಷೇರನ್ನು ಹೊಂದಿದ್ದರು.
ಟ್ವೀಟರ್ ಖರೀದಿಯಾದ ಬೆನ್ನಲ್ಲೇ ಪ್ರತಿಕ್ರಿಯೆ ನೀಡಿರುವ ಸಿಇಒ ಪರಾಗ್ ಅಗರ್ವಾಲ್, ಟ್ವಿಟರ್ ಇಡೀ ಪ್ರಪಂಚದ ಮೇಲೆ ಪರಿಣಾಮ ಬೀರುವ ಉದ್ದೇಶ ಮತ್ತು ಪ್ರಸ್ತುತತೆಯನ್ನು ಹೊಂದಿದೆ. ನಮ್ಮ ತಂಡದ ಮೇಲೆ ನನಗೆ ಬಹಳ ಹೆಮ್ಮ ಇದೆ ಎಂದಿದ್ದಾರೆ.
ಎಲಾನ್ ಅವರ ಆಫರ್ ಅನ್ನು ನಿರ್ಣಯಿಸಲು ಟ್ವಿಟರ್ ಮಂಡಳಿಯು ಮೌಲ್ಯ, ಖಚಿತತೆ ಮತ್ತು ಹಣಕಾಸಿನ ಮೇಲೆ ಉದ್ದೇಶಪೂರ್ವಕವಾಗಿ ಗಮನಹರಿಸುವುದರೊಂದಿಗೆ ಚಿಂತನಾಶೀಲ ಮತ್ತು ಸಮಗ್ರ ಪ್ರಕ್ರಿಯೆಯನ್ನು ನಡೆಸಿದೆ. ಪ್ರಸ್ತಾವಿತ ವಹಿವಾಟು ಗಣನೀಯ ನಗದು ಪ್ರೀಮಿಯಂ ಅನ್ನು ನೀಡುತ್ತದೆ ಮತ್ತು ಟ್ವಿಟರ್ನ ಷೇರುದಾರರಿಗೆ ಇದೊಂದು ಉತ್ತಮ ಮಾರ್ಗವಾಗಿದೆ ಎನ್ನುವ ಮೂಲಕ ಬ್ರೈಟ್ ಟೈಲರ್ ಅವರು ಟ್ವಿಟರ್ ಮಾರಾಟದ ಧನಾತ್ಮಕ ಪರಿಣಾಮದ ಬಗ್ಗೆ ತಿಳಿಸಿದ್ದಾರೆ.
ಟ್ವಿಟರ್ ವಾಕ್ ಸ್ವಾತಂತ್ರ್ಯ ಹಕ್ಕನ್ನು ಅನುಸರಿಸುತ್ತಿಲ್ಲ ಎಂಬ ಕಾರಣಕ್ಕೆ ಹೊಸ ಸಾಮಾಜಿಕ ಜಾಲತಾಣ ವೇದಿಕೆಯನ್ನು ಪ್ರಾರಂಭಿಸಬೇಕೆ ಎಂದು ಕಳೆದ ತಿಂಗಳು ಎಲಾನ್ ಮಸ್ಕ್ ಅವರು ಟ್ವಿಟರ್ನಲ್ಲಿ ಬಳಕೆದಾರರನ್ನು ಕೇಳಿದಾಗ ಈ ವಿಚಾರ ಪ್ರಾರಂಭವಾಯಿತು. ಮಸ್ಕ್ ಅವರ ಪ್ರಶ್ನೆಗೆ ಹೆಚ್ಚಿನ ಬಳಕೆದಾರರು ಟ್ವಿಟರ್ಗೆ ಬದಲಿ ಆಯ್ಕೆಯೊಂದು ಬೇಕು ಎಂದಿದ್ದರು. ಟೆಸ್ಲಾ ಸಿಇಒ ಕೂಡ ಟ್ವಿಟರ್ ವಾಕ್ ಸ್ವಾತಂತ್ರ್ಯದ ಹಕ್ಕನ್ನು ನಿಗ್ರಹಿಸುತ್ತದೆ ಎಂದು ದೂರಿದ್ದರು. ಇದೀಗ ಟ್ವಿಟರ್ ಅನ್ನು ತಾವೇ ಕೊಂಡುಕೊಂಡಿರುವುದರಿಂದ ಮಾಲೀಕರಾಗಿ ಅವರು ಪರಿಹರಿಸುವ ಮೊದಲ ವಿಷಯ ಇದೇ ಆಗಿರಲಿದೆ ಎಂದು ನಂಬಲಾಗಿದೆ.
ಕಳೆದ ಹಲವಾರು ವರ್ಷಗಳಲ್ಲಿ, ಮಾಜಿ ಯುಎಸ್ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೇರಿದಂತೆ ಅನೇಕ ವ್ಯಕ್ತಿಗಳ ಧ್ವನಿಗಳನ್ನು ಸೆನ್ಸಾರ್ ಮಾಡಿದ್ದಕ್ಕಾಗಿ ಎಲಾನ್ ಮಸ್ಕ್ ಅವರು ಆಗಾಗ ಟ್ವಿಟರ್ ಅನ್ನು ಪ್ರಶ್ನಿಸುತ್ತಿದ್ದರು. ವಾಸ್ತವವಾಗಿ, ಕರೊನಾ ವೈರಸ್‌ಗೆ ಸಂಬಂಧಿಸಿದ ಮಾಹಿತಿಯನ್ನು ಟ್ವೀಟ್ ಮಾಡಲು ಮಸ್ಕ್ ಅವರೇ ಟ್ವಿಟರ್ನ ನಿಯಮಗಳು ಮತ್ತು ಮಾರ್ಗಸೂಚಿಗಳನ್ನು ಉಲ್ಲಂಘಿಸಿದ್ದಾರೆ ಎಂದು ಈ ಹಿಂದೆ ಟ್ವಿಟರ್ ಆರೋಪ ಸಹ ಮಾಡಿತ್ತು. (ಏಜೆನ್ಸೀಸ್)
ಆನಂದ ಸಂಕೇಶ್ವರ ಸೇರಿ ಮೂವರಿಗೆ ಡಾಕ್ಟರೇಟ್ ಪ್ರದಾನ: ರಾಜ್ಯ ಮುಕ್ತ ವಿಶ್ವವಿದ್ಯಾಲಯದ 17ನೇ ಘಟಿಕೋತ್ಸವ