ಮುಂಬೈ: ಬಹುಭಾಷಾ ನಟಿ, ಕನ್ನಡತಿ ಪ್ರಣೀತಾ ಸುಭಾಷ್ ಬಾಲಿವುಡ್ಗೆ ಪದಾರ್ಪಣೆ ಮಾಡಿರುವುದು ಗೊತ್ತಿರುವ ವಿಚಾರ. ಈಗಾಗಲೇ ಅಜಯ್ ದೇವಗನ್ ಜತೆಗೆ ‘ಭುಜ್ – ದಿ ಪ್ರೈಡ್ ಆಫ್ ಇಂಡಿಯಾ’ ಚಿತ್ರದಲ್ಲಿ ನಟಿಸಿದ್ದಾರವರು. ಅದೇ ರೀತಿ ‘ಹಂಗಾಮಾ 2’ ಚಿತ್ರದಲ್ಲಿಯೂ ಬಣ್ಣ ಹಚ್ಚಿದ್ದಾರೆ. ಇದೀಗ ವಿಷಯ ಏನೆಂದರೆ, ಈ ಎರಡು ಸಿನಿಮಾಗಳ ಪೈಕಿ ‘ಹಂಗಾಮಾ 2’ ಸಿನಿಮಾ ಇನ್ನೇನು ಶೀಘ್ರದಲ್ಲಿ ಒಟಿಟಿ ವೇದಿಕೆಯಲ್ಲಿ ಪ್ರಸಾರವಾಗಲಿದೆ. ಅಷ್ಟೇ ಅಲ್ಲ 30 ಕೋಟಿಯ ದೊಡ್ಡ ಮೊತ್ತಕ್ಕೆ ಈ ಚಿತ್ರ ಸೋಲ್ಡ್ ಔಟ್ ಆಗಿದೆ.
ಇದನ್ನೂ ಓದಿ: ಗಾಯಕಿ ಶಮಿತಾ ಮಲ್ನಾಡ್ ಪುತ್ರನ ಪ್ರಶ್ನೆಗೆ ವಿರಾಟ್ ಕೊಹ್ಲಿ ಕೊಟ್ರು ಉತ್ತರ
ಪ್ರಿಯದರ್ಶನ್ ನಿರ್ದೇಶನದಲ್ಲಿ ಮೂಡಿಬಂದಿರುವ ‘ಹಂಗಾಮಾ 2’ ಹಾಸ್ಯಪ್ರಧಾನ ಸಿನಿಮಾ. ಈ ಚಿತ್ರದಲ್ಲಿ ಪರೇಶ್ ರಾವಲ್, ಶಿಲ್ಪಾ ಶೆಟ್ಟಿ, ಪ್ರಣೀತಾ, ಮಿಜಾನ್ ಜೆಫ್ರಿ ಮುಖ್ಯಭೂಮಿಕೆಯಲ್ಲಿದ್ದಾರೆ. ಮತ್ತೊಂದು ವಿಶೇಷತೆ ಏನೆಂದರೆ, ಶಿಲ್ಪಾ ಶೆಟ್ಟಿಗಿದು ಕಂಬ್ಯಾಕ್ ಚಿತ್ರವಾದರೆ, ಒಟಿಟಿಯಲ್ಲಿ ಬಿಡುಗಡೆ ಆಗುತ್ತಿರುವ ಪ್ರಣೀತಾ ಅವರ ಮೊದಲ ಚಿತ್ರವೂ ಇದೇ. ಇನ್ನೇನು ಡಿಸ್ನಿ ಪ್ಲಸ್ ಹಾಟ್ಸ್ಟಾರ್ನಲ್ಲಿ ‘ಹಂಗಾಮಾ 2’ ಚಿತ್ರ ಸ್ಟ್ರೀಮ್ ಆಗಲಿದೆ. ಯಾವಾಗ ಎಂಬುದು ಇನ್ನಷ್ಟೇ ಅಧಿಕೃತವಾಗಬೇಕಿದ್ದು, ಇದೀಗ ವಹಿವಾಟಿನ ವಿಚಾರ ಹೊರಬಿದ್ದಿದೆ.
ಕೇವಲ ಒಟಿಟಿಗಷ್ಟೇ 30ಕೋಟಿಗೆ ಮಾರಾಟವಾಗಿದ್ದು, ಇನ್ನೂ ಟಿವಿ ಹಕ್ಕುಗಳನ್ನು ಸೇರಿಸಿದರೆ 36 ಕೋಟಿ ಗಳಿಕೆ ಈ ಚಿತ್ರದ್ದು. ಇನ್ನುಳಿದಂತೆ ಆಡಿಯೋ ಸೇರಿ ಅನ್ಯ ಮೂಲಗಳ ಆದಾಯವನ್ನೂ ಲೆಕ್ಕ ಹಾಕುವುದಾದರೆ, 50 ಕೋಟಿ ರೂಪಾಯಿ ಈ ಚಿತ್ರದ ಬೊಕ್ಕಸಕ್ಕೆ ಬಂದು ಬಿದ್ದಿದೆ.
ಇದನ್ನೂ ಓದಿ: ಶಾರುಖ್ ಖಾನ್ ‘ಪಠಾಣ್’ ಚಿತ್ರದಲ್ಲಿ ಪ್ರಭಾಸ್ಗೂ ಇದೆಯಂತೆ ವಿಶೇಷ ಪಾತ್ರ!
ಕಳೆದ ವರ್ಷದ ಕೋವಿಡ್ ಸಂದರ್ಭದಲ್ಲಿ ಸಾಲುಸಾಲು ಚಿತ್ರಗಳನ್ನು ತನ್ನ ವೇದಿಕೆಯಲ್ಲಿ ಬಿಡುಗಡೆ ಮಾಡುವುದಾಗಿ ಡಿಸ್ನಿ ಹಾಟ್ಸ್ಟಾರ್ ಪ್ಲಸ್ ಹೇಳಿಕೊಂಡಿತ್ತು. ಅದರಂತೆ ‘ದಿಲ್ಬೇಚಾರ’, ‘ಲಕ್ಷ್ಮೀ ಬಾಂಬ್’, ‘ಸಡಕ್ 2’, ‘ಖುದಾ ಹಫೀಸ್’, ಲೂಟ್ ಕೇಸ್’… ಚಿತ್ರಗಳು ಬಿತ್ತರವಾಗಿದ್ದವು. ಇದೀಗ ಈ ವರ್ಷವೂ ಇನ್ನೇನು ಹಲವು ಸಿನಿಮಾಗಳನ್ನು ಘೋಷಿಸಿಕೊಳ್ಳಲಿದೆ. ಆ ಪೈಕಿ ‘ಭೂತ್ ಪೊಲೀಸ್’, ‘ಮಿಮಿ’, ‘ಶಿದ್ದತ್’ ಸೇರಿ ಹಲವು ಚಿತ್ರಗಳು ಡಿಸ್ನಿಯಲ್ಲಿ ಸ್ಟ್ರೀಮ್ ಆಗಲಿವೆ.