ಪೋರ್ಟ್ ಆಫ್ ಸ್ಪೇನ್: ವಿಕೆಟ್ ಕೀಪರ್-ಬ್ಯಾಟ್ಸ್ಮನ್ ನಿಕೋಲಸ್ ಪೂರನ್ (100*ರನ್, 45 ಎಸೆತ, 4 ಬೌಂಡರಿ, 10 ಸಿಕ್ಸರ್) ಹ್ಯಾಟ್ರಿಕ್ ಸಿಕ್ಸರ್ ಸಿಡಿಸುವ ಮೂಲಕ ಟಿ20 ಕ್ರಿಕೆಟ್ನಲ್ಲಿ ಚೊಚ್ಚಲ ಶತಕ ಪೂರೈಸಿದ್ದು ಮಾತ್ರವಲ್ಲದೆ ಗಯಾನಾ ಅಮೆಜಾನ್ ವಾರಿಯರ್ಸ್ ತಂಡವನ್ನು ಗೆಲುವಿನ ದಡ ಸೇರಿಸುವ ಮೂಲಕ ಕೆರಿಬಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಭರ್ಜರಿಯಾಗಿ ಗಮನಸೆಳೆದಿದ್ದಾರೆ. ಪೂರನ್ ದಾಖಲಿಸಿದ ಹಾಲಿ ಆವೃತ್ತಿಯ ಮೊದಲ ಶತಕದ ನೆರವಿನಿಂದ ಗಯಾನಾ ವಾರಿಯರ್ಸ್ ತಂಡ ಸೇಂಟ್ ಕಿಟ್ಸ್ ಆಂಡ್ ನೆವಿಸ್ ಪ್ಯಾಟ್ರಿಯಾಟ್ಸ್ ವಿರುದ್ಧ 7 ವಿಕೆಟ್ಗಳಿಂದ ಸುಲಭ ಗೆಲುವು ದಾಖಲಿಸಿತು. 7ನೇ ಪಂದ್ಯದಲ್ಲಿ 3ನೇ ಗೆಲುವು ಒಲಿಸಿಕೊಂಡ ಗಯಾನಾ ಸೆಮಿಫೈನಲ್ ಆಸೆ ಜೀವಂತ ಉಳಿಸಿಕೊಂಡಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಪ್ಯಾಟ್ರಿಯಾಟ್ಸ್ ತಂಡ 5 ವಿಕೆಟ್ಗೆ 150 ರನ್ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು. ಪ್ರತಿಯಾಗಿ ಗಯಾನಾ ತಂಡ 25 ರನ್ಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಆಗ ಭರ್ಜರಿ ಸಿಕ್ಸರ್ಗಳ ಮೂಲಕ ಆರ್ಭಟ ಆರಂಭಿಸಿದ ಪೂರನ್ 45 ಎಸೆತಗಳಲ್ಲೇ ಶತಕ ಪೂರೈಸಿ ಟೂರ್ನಿಯ ಇತಿಹಾಸದ 3ನೇ ಅತಿವೇಗದ ಶತಕ ಸಾಧನೆ ಮಾಡಿದರು. ಈ ಮೂಲಕ ಗಯಾನಾ ತಂಡ 17.3 ಓವರ್ಗಳಲ್ಲೇ 3 ವಿಕೆಟ್ಗೆ 153 ರನ್ ಪೇರಿಸಿ ಗೆಲುವು ದಾಖಲಿಸಿತು. ಪೂರನ್ಗೆ ಉತ್ತಮ ಸಾಥ್ ನೀಡಿದ ರಾಸ್ ಟೇಲರ್ ಅಜೇಯ 25 ರನ್ ಗಳಿಸಿದರು. ಇವರಿಬ್ಬರು ಮುರಿಯದ 4ನೇ ವಿಕೆಟ್ಗೆ 128 ರನ್ ಪೇರಿಸಿದರು.
ಇನಿಂಗ್ಸ್ನ 17 ಓವರ್ ಪೂರ್ಣಗೊಂಡಾಗ ಗಯಾನಾ ಗೆಲುವಿಗೆ 16 ರನ್ ಮಾತ್ರ ಬೇಕಿದ್ದರೆ, ಪೂರನ್ 82 ರನ್ ಗಳಿಸಿ ಕ್ರೀಸ್ನಲ್ಲಿದ್ದರು. ಇನಿಂಗ್ಸ್ನ 18ನೇ ಓವರ್ ಎಸೆದ ಸ್ಪಿನ್ನರ್ ಇಶ್ ಸೋಧಿ ಅವರ ಮೊದಲ 3 ಎಸೆತಗಳಲ್ಲೂ ಸಿಕ್ಸರ್ ಸಿಡಿಸುವ ಮೂಲಕ ಪೂರನ್ ಶತಕ ಮತ್ತು ಗೆಲುವು ಎರಡನ್ನೂ ಒಲಿಸಿಕೊಂಡರು.
ಸೇಂಟ್ ಕಿಟ್ಸ್ ಆಂಡ್ ನೆವಿಸ್ ಪ್ಯಾಟ್ರಿಯಾಟ್ಸ್: 5 ವಿಕೆಟ್ಗೆ 150 (ಎವಿನ್ ಲೆವಿಸ್ 15, ಡ ಸಿಲ್ವ 59, ಡಂಕ್ 19, ರಾಮ್ದಿನ್ 37, ಗ್ರೀನ್ 31ಕ್ಕೆ 2), ಗಯಾನಾ ಅಮೆಜಾನ್ ವಾರಿಯರ್ಸ್: 17.3 ಓವರ್ಗಳಲ್ಲಿ 3 ವಿಕೆಟ್ಗೆ 153 (ಕಿಂಗ್ 14, ಹೆಟ್ಮೆಯರ್ 1, ಪೂರನ್ 100*, ರಾಸ್ ಟೇಲರ್ 25*, ಜಗ್ಗೆಸರ್ 33ಕ್ಕೆ 2, ಜೋಸೆಫ್ 24ಕ್ಕೆ 1). ಪಂದ್ಯಶ್ರೇಷ್ಠ: ನಿಕೋಲಸ್ ಪೂರನ್.
ಇದನ್ನೂ ಓದಿ: ಬಯೋ-ಬಬಲ್ನಲ್ಲಿ ಇಂದಿನಿಂದ ಯುಎಸ್ ಓಪನ್ ಗ್ರಾಂಡ್ ಸ್ಲಾಂ ಟೆನಿಸ್
ಅಲ್ಪ ಮೊತ್ತ ರಕ್ಷಿಸಿ ದಾಖಲೆ ಬರೆದ ಜೌಕ್ಸ್
ಭಾನುವಾರದ ಮೊದಲ ಪಂದ್ಯದಲ್ಲಿ ಸೇಂಟ್ ಲೂಸಿಯಾ ಜೌಕ್ಸ್ ತಂಡ ಟೂರ್ನಿಯ ಇತಿಹಾಸದಲ್ಲೇ ಅತ್ಯಂತ ಕನಿಷ್ಠ ಮೊತ್ತವನ್ನು ರಕ್ಷಿಸಿಕೊಂಡ ದಾಖಲೆ ಬರೆಯಿತು. ಟಾಸ್ ಸೋತು ಬ್ಯಾಟಿಂಗ್ಗೆ ಇಳಿದ ಜೌಕ್ಸ್ ತಂಡ 18 ಓವರ್ಗಳಲ್ಲಿ 92 ರನ್ಗೆ ಆಲೌಟ್ ಆಯಿತು. ಪ್ರತಿಯಾಗಿ ಬಾರ್ಬಡೋಸ್ ತಂಡ ನಿಗದಿತ 20 ಓವರ್ ಪೂರ್ತಿ ಆಡಿದರೂ, 7 ವಿಕೆಟ್ಗೆ 89 ರನ್ ಗಳಿಸಲಷ್ಟೇ ಶಕ್ತವಾಯಿತು. ಕೊನೆಯ ಓವರ್ನಲ್ಲಿ 9 ರನ್ ಬೇಕಾಗಿದ್ದಾಗ ಬಾರ್ಬಡೋಸ್ ತಂಡ ಸ್ಪಿನ್ನರ್ ರೋಸ್ಟನ್ ಚೇಸ್ರ ಎಸೆತದಲ್ಲಿ 5 ರನ್ ಗಳಿಸಲಷ್ಟೇ ಶಕ್ತವಾಗಿ 3 ರನ್ಗಳಿಂದ ಸೋಲೊಪ್ಪಿಕೊಂಡಿತು. 7ನೇ ಪಂದ್ಯದಲ್ಲಿ 5ನೇ ಗೆಲುವು ಒಲಿಸಿಕೊಂಡ ಜೌಕ್ಸ್ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ.
ಸೇಂಟ್ ಲೂಸಿಯಾ ಜೌಕ್ಸ್: 18 ಓವರ್ಗಳಲ್ಲಿ 92 (ಕಾರ್ನ್ವೆಲ್ 6, ಫ್ಲೆಚರ್ 6, ಚೇಸ್ 14, ನಜಿಬುಲ್ಲಾ ಜದ್ರಾನ್ 22, ನಬಿ 2, ಸ್ಯಾಮ್ಮಿ 2, ಹೇಡನ್ ವಾಲ್ಶ್ 19ಕ್ಕೆ 3, ರೈಫರ್ 5ಕ್ಕೆ 2, ರಶೀದ್ ಖಾನ್ 17ಕ್ಕೆ 1, ಹೋಲ್ಡರ್ 15ಕ್ಕೆ 1 ), ಬಾರ್ಬಡೋಸ್ ಟ್ರೈಡೆಂಟ್ಸ್: 20 ಓವರ್ಗಳಲ್ಲಿ 7 ವಿಕೆಟ್ಗೆ 89 (ಚಾರ್ಲ್ಸ್ 39, ಶೈ ಹೋಪ್ 14, ಹೋಲ್ಡರ್ 1, ಕೋರಿ ಆಂಡರ್ಸನ್ 11, ನರ್ಸ್ 12, ರಶೀದ್ ಖಾನ್ 2, ಜಾವೆಲ್ ಗ್ಲೆನ್ 11ಕ್ಕೆ 1, ಕೇಸ್ರಿಕ್ ವಿಲಿಯಮ್ಸ್ 12ಕ್ಕೆ 2, ನಬಿ 18ಕ್ಕೆ 1, ಚೇಸ್ 14ಕ್ಕೆ 1). ಪಂದ್ಯಶ್ರೇಷ್ಠ: ಜಾವೆಲ್ ಗ್ಲೆನ್.
ಮಂಗಳವಾರದ ಪಂದ್ಯಗಳು:
ಟ್ರಿನ್ಬಾಗೋ ನೈಟ್ರೈಡರ್ಸ್-ಜಮೈಕಾ ತಲ್ಲವಾಹ್ಸ್
ಆರಂಭ: ರಾತ್ರಿ 7.30 (ಭಾರತೀಯ ಕಾಲಮಾನ)
ಬಾರ್ಬಡೋಸ್ ಟ್ರೈಡೆಂಟ್ಸ್-ಗಯಾನಾ ಅಮೆಜಾನ್ ವಾರಿಯರ್ಸ್
ಆರಂಭ: ಬುಧವಾರ ಮುಂಜಾನೆ 3.00 (ಭಾರತೀಯ ಕಾಲಮಾನ)
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್