ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಫ್ರಾನ್ಸ್ ಭೇಟಿಯಿಂದ ವಾಪಸಾಗುವಾಗ ಜುಲೈ 15ರಂದು ಅರಬ್ ಸಂಯುಕ್ತ ಸಂಸ್ಥಾನಕ್ಕೆ (ಯುಎಇ) ಭೇಟಿ ನೀಡಲಿದ್ದಾರೆ. ಅಲ್ಲಿ ಅವರು ಯುಎಇ ಅಧ್ಯಕ್ಷ ಹಾಗೂ ಅಬು ಧಾಬಿ ಆಡಳಿತಗಾರ ಝುಯೇದ್ ಅಲ್ ನಹ್ಯಾನ್ರೊಂದಿಗೆ ಮಾತುಕತೆ ನಡೆಸಲಿದ್ದಾರೆ.
ಇಂಧನ, ಆಹಾರ ಭದ್ರತೆ ಮತ್ತು ರಕ್ಷಣಾ ಕ್ಷೇತ್ರಗಳಲ್ಲಿನ ದ್ವಿಪಕ್ಷೀಯ ಬಾಂಧವ್ಯವನ್ನು ಇನ್ನಷ್ಟು ಮುಂದಕ್ಕೊಯ್ಯುವ ಬಗ್ಗೆ ಉಭಯ ನಾಯಕರು ರ್ಚಚಿಸಲಿದ್ದಾರೆ. ಭಾರತ-ಯುಎಇ ಸಮಗ್ರ ವ್ಯೂಹಾತ್ಮಕ ಪಾಲುದಾರಿಕೆ ಬಲಗೊಳ್ಳುತ್ತಿದ್ದು, ಮೋದಿ ಭೇಟಿ ವಿವಿಧ ಕ್ಷೇತ್ರಗಳಲ್ಲಿ ಸಹಕಾರವನ್ನು ಬಲಪಡಿಸಲು ಮಾಗೋಪಾಯಗಳನ್ನು ಹುಡುಕಲು ಅವಕಾಶ ಕಲ್ಪಿಸಲಿದೆ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಬುಧವಾರ ತಿಳಿಸಿದೆ.
ಇಂಧನ, ಶಿಕ್ಷಣ, ಆರೋಗ್ಯ, ಆಹಾರ ಭದ್ರತೆ, ಹಣಕಾಸುತಂತ್ರಜ್ಞಾನ (ಫಿನ್ಟೆಕ್), ರಕ್ಷಣೆ ಮತ್ತು ಸಂಸ್ಕೃತಿ ಕ್ಷೇತ್ರಗಳಲ್ಲಿ ಸಂಬಂಧ ಗಟ್ಟಿಗೊಳಿಸಲು ಕ್ರಮಕೈಗೊಳ್ಳಲಾಗುತ್ತದೆ ಎಂದು ಸಚಿವಾಲಯದ ಹೇಳಿಕೆ ತಿಳಿಸಿದೆ. ಅಧ್ಯಕ್ಷ ಇಮಾನ್ಯುಯೆಲ್ ಮ್ಯಾಕ್ರನ್ರ ಆಹ್ವಾನದ ಮೇರೆಗೆ ಮೋದಿ ಜುಲೈ 13 ಮತ್ತು 14ರಂದು ಫ್ರಾನ್ಸ್ಗೆ ಭೇಟಿ ನೀಡಲಿದ್ದಾರೆ.
ನರೇಂದ್ರ ಮೋದಿ ಶ್ಲಾಘಿಸಿದ ಮುಸ್ಲಿಂ ಲೀಗ್
ಪ್ರಧಾನಿ ನರೇಂದ್ರ ಮೋದಿಯವರ ಎಲ್ಲರನ್ನೂ ಒಳಗೊಳ್ಳುವ ಕುರಿತ ಉತ್ಸಾಹದಾಯಕ ಧೋರಣೆ ಶ್ಲಾಘನಾರ್ಹವಾಗಿದೆ ಎಂದು ಮುಸ್ಲಿಂ ವರ್ಲ್ಡ್ ಲೀಗ್ನ ಮಹಾ ಕಾರ್ಯದರ್ಶಿ ಶೇಖ್ ಮಹಮದ್ ಬಿನ್ ಅಬ್ದುಲ್ಕರೀಂ ಅಲ್-ಇಸ್ಸಾ ಬುಧವಾರ ಹೇಳಿದ್ದಾರೆ. ಮಂಗಳವಾರ ಮೋದಿಯವರನ್ನು ಭೇಟಿಯಾಗಿದ್ದ ಅಲ್-ಇಸ್ಸಾ, ಯಾವುದೇ ಮೂಲದ್ದಾದರೂ ಉಗ್ರವಾದ ಮತ್ತು ದ್ವೇಷದ ಎಲ್ಲ ಅಂಶಗಳನ್ನು ವಿರೋಧಿಸಲು ಒಟ್ಟಾಗಿ ಕೆಲಸ ಮಾಡಲು ತಾವಿಬ್ಬರೂ ಒಪ್ಪಿರುವುದಾಗಿ ಹೇಳಿದ್ದಾರೆ.
ಭಾರತ ಪ್ರವಾಸದಲ್ಲಿರುವ ಅಲ್-ಇಸ್ಸಾ, ಮೋದಿ ಜೊತೆ ಅಂತರ್ಧರ್ವಿುಯ ಸಂವಾದ ಹೆಚ್ಚಿಸುವುದು, ಉಗ್ರವಾದಿ ಸಿದ್ಧಾಂತಗಳನ್ನು ಎದುರಿಸುವುದು, ಜಾಗತಿಕ ಶಾಂತಿಗೆ ಉತ್ತೇಜನ ಮತ್ತು ಭಾರತ ಹಾಗೂ ಸೌದಿ ಅರೇಬಿಯಾ ನಡುವಣ ಪಾಲುದಾರಿಕೆಯನ್ನು ಆಳಗೊಳಿಸುವುದು ಮುಂತಾದ ವಿಷಯಗಳನ್ನು ರ್ಚಚಿಸಿದರು. ಭಾರತೀಯ ಪ್ರಧಾನಿಯೊಂದಿಗೆ ಒಳನೋಟ ನೀಡುವಂಥ ಚರ್ಚೆಗಳನ್ನು ನಡೆಸಿದ್ದಾಗಿ ಅಲ್-ಇಸ್ಸಾ ಟ್ವೀಟ್ನಲ್ಲಿ ಹೇಳಿದ್ದಾರೆ.