ನವದೆಹಲಿ: ಭಾರತ ಜಗತ್ತಿನಲ್ಲಿ ತೈಲ ಖರೀದಿಯಲ್ಲಿ ಮೂರನೇ ಅತಿ ದೊಡ್ಡ ರಾಷ್ಟ್ರವಾಗಿದೆ. ಹೀಗಾಗಿ ಜಾಗತಿಕ ತೈಲ ಬೆಲೆ ನಿಗದಿಯಲ್ಲಿ ಭಾರತದ ಬೇಡಿಕೆ ಬಹುದೊಡ್ಡ ಪಾತ್ರ ನಿರ್ವಹಿಸುತ್ತದೆ. ಕಳೆದ ಏಪ್ರಿಲ್ನಲ್ಲಿ ಒಂದು ಹಂತದಲ್ಲಿ ಪೆಟ್ರೋಲ್ ಹಾಗೂ ಡೀಸೆಲ್ ಮಾರಾಟ ಶೇ.70ಕ್ಕಿಂತಲೂ ಕಡಿಮೆಯಾಗಿತ್ತು. ಕಳೆದ ವರ್ಷಕ್ಕೆ ಹೋಲಿಸಿದರೆ, ಈಗಲೂ ಪೆಟ್ರೋಲ್ ಮಾರಾಟ ಶೇ.47ಕ್ಕಿಂತ ಕಡಿಮೆಯಾಗಿದೆ. ಜತೆಗೆ, ಡೀಸೆಲ್ ಬಳಕೆ ಶೇ.35ರಷ್ಟು ಕಡಿಮೆಯಾಗಿದೆ.
ತೈಲೋತ್ಪನ್ನಗಳ ಮಾರಾಟ ಹಿಂದಿನಂತಾಗಲು ಇನ್ನು ಕನಿಷ್ಠ ಆರು ತಿಂಗಳಾದರೂ ಬೇಕು ಎನ್ನುವುದು ತಜ್ಞರ ಲೆಕ್ಕಾಚಾರ. ಇನ್ನೆರಡು ತಿಂಗಳಲ್ಲಿ ಶೇ.8ರಷ್ಟು ಮಾರಾಟ ವೃದ್ಧಿಯಾದರೂ ಹಿಂದಿನ ಮಟ್ಟಕ್ಕೆ ತಲುಪಲು ಹೆಚ್ಚು ಕಾಲ ಬೇಕಾಗುತ್ತದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಇದನ್ನೂ ಓದಿ; ‘ಫೇಸ್ಬುಕ್ ಶಾಪ್ಸ್’ನಲ್ಲಿ Buy ಗೆ ಮಾರ್ಪಾಡಾಗುತ್ತೆ Like; ಆನ್ಲೈನ್ ಶಾಪಿಂಗ್ನಲ್ಲಿ ಅಮೆಜಾನ್ ವಿರುದ್ಧ ಸೆಣಸು
ಎರಡು ತಿಂಗಳ ಲಾಕ್ಡೌನ್ ಹಿನ್ನೆಲೆಯಲ್ಲಿ ತೈಲೋತ್ಪನ್ನಗಳಿಗೆ ಬೇಡಿಕೆಯೇ ಇರಲಿಲ್ಲ. ಈ ಬೇಡಿಕೆ ಮತ್ತೆ ಕುದುರಲು ಸಾಕಷ್ಟು ಸಮಯಾವಕಾಶ ಬೇಕು. ಚೀನಾದಲ್ಲಿ ಲಾಕ್ಡೌನ್ ತೆರವು ಬಳಿಕ ಬಳಕೆ ಪ್ರಮಾಣ ಹಿಂದಿನ ಸ್ಥಿತಿಗೆ ತಲುಪಿದೆ. ಆದರೆ, ಭಾರತದಲ್ಲಿ ಹಾಗಾಗುತ್ತಿಲ್ಲ. ಸದ್ಯ ಶೇ.40 ಬಳಕೆಯಾಗುತ್ತಿದೆ. ಕೆಲ ತಿಂಗಳಲ್ಲಿಯೇ ಬಳಕೆ ಹೆಚ್ಚಾಗುವ ನಿರೀಕ್ಷೆಯೊಂದಿಗೆ ಪಾತಾಳ ಕಂಡಿದ್ದ ಜಾಗತಿಕ ತೈಲ ಬೆಲೆ ಸದ್ಯ ಪ್ರತಿ ಬ್ಯಾರೆಲ್ಗೆ 35 ಡಾಲರ್ಗೆ ಏರಿಕೆಯಾಗಿದೆ.
ಸಾಮಾನ್ಯ ತೈಲ ಬೇಡಿಕೆಯ ಶೇ.60-70ಕ್ಕೆ ತೈಲ ಮಾರಾಟ ತಲುಪುತ್ತಿದೆ. ಕೋವಿಡ್ಗೂ ಮುಂಚೆ ಇದ್ದ ಸ್ಥಿತಿಗೆ ಮುಟ್ಟಲು ಕಾಲಾವಕಾಶ ಬೇಕಾಗುತ್ತದೆ. ಇನ್ನೆರಡು ತಿಂಗಳಲ್ಲಿ ಶೇ.80ಕ್ಕೆ ತಲುಪಬಹುದು. ಆದರಾಚೆಗೆ ಬೇಡಿಕೆ ಉಂಟಾಗುವುದು ಕಷ್ಟಸಾಧ್ಯವಾಗಲಿದೆ ಎಂದು ಹಿಂದುಸ್ಥಾನ್ ಪೆಟ್ರೋಲಿಯಂ ಅಧ್ಯಕ್ಷ ಮುಖೇಶ್ಕುಮಾರ್ ಸುರಾನಾ ಹೇಳುತ್ತಾರೆ.
ಇದನ್ನೂ ಓದಿ; ನರ್ಸರಿ ಮಕ್ಕಳ ಗತಿಯೇನು? ಶಾಲಾರಂಭ ವಿಳಂಬವಾದರೂ ಪೂರ್ತಿ ಶುಲ್ಕ ನೀಡಬೇಕೇ?
ಕಳೆದ ಮೇ ತಿಂಗಳಲ್ಲಿ ದೇಶದಲ್ಲಿ ಒಟ್ಟಾರೆ ಪ್ರತಿದಿನ 4.6 ದಶಲಕ್ಷ ಬ್ಯಾರೆಲ್ ತೈಲ ಬಳಕೆಯಾಗುತ್ತಿತ್ತು. ಈ ಬಾರಿ ಅದರ ಪ್ರಮಾಣ 2.6 ದಶಲಕ್ಷ ಬ್ಯಾರೆಲ್ ಆಗಿದೆ. ಪೆಟ್ರೋಲ್ ಬಳಕೆ ಶೇ.47ರಷ್ಟು ಕಡಿಮೆಯಾಗಿದ್ದರೆ, ಡೀಸೆಲ್ ಬಳಕೆ ಪ್ರಮಾಣ ಶೇ.35 ಕಡಿಮೆಯಾಗಿದೆ ಎಂದು ಅಂಕಿ-ಸಂಖ್ಯೆಗಳು ಹೇಳುತ್ತವೆ. ವಿಮಾನ ಇಂಧನ ಬಳಕೆ ಶೇ.85ಕ್ಕೂ ಕಡಿಮೆಯಾಗಿದೆ.
ಆದರೆ, ಏಪ್ರಿಲ್ಗೆ ಹೋಲಿಸಿದರೆ ಮೇ ತಿಂಗಳಲ್ಲಿ ಇಂಧನ ಬಳಕೆ ಶೇ.75 ಹೆಚ್ಚಾಗಿರುವುದು ಕೂಡ ಆಶಾದಾಯಕ ಬೆಳವಣಿಗೆ ವಾಹನ ಸಂಚಾರದ ಮೇಲಿದ್ದ ನಿರ್ಬಂಧ ತೆರವು, ಸರಕು ಸಾಗಣೆ, ಪ್ರಯಾಣಿಕ ವಾಹನ ಸಂಚಾರ ಶುರುವಾಗಿದ್ದರಿಂದ ತೈಲ ಬಳಕೆ ಹೆಚ್ಚಾಗುತ್ತಿದೆ ಎಂದು ಬಂಕ್ ಮಾಲೀಕರು ಹೇಳುತ್ತಾರೆ.
ಬೇಬಿ ಪೌಡರ್ನಿಂದ ಕ್ಯಾನ್ಸರ್ ವಿವಾದ; ಅಮೆರಿಕ, ಕೆನಡಾದಲ್ಲಿ ಮಾರಾಟ ನಿಲ್ಲಿಸಿದ ಜಾನ್ಸನ್ ಆ್ಯಂಡ್ ಜಾನ್ಸನ್