ನವದೆಹಲಿ: ಸದಾ ಒಂದಿಲ್ಲೊಂದು ಸಂಚು ರೂಪಿಸುತ್ತಲೇ ಇರುವ ಪಾಕಿಸ್ತಾನ ಈ ಬಾರಿ ಇಸ್ಲಾಮಿಕ್ ರಾಷ್ಟ್ರಗಳನ್ನು ಭಾರತದ ವಿರುದ್ಧ ಎತ್ತಿಕಟ್ಟಲು ಯತ್ನಿಸಿ ಭಾರಿ ಮುಖಭಂಗ ಅನುಭವಿಸಿದೆ. ಮುಸ್ಲಿಂ ವಿರೋಧಿ ಎಂಬ ಹಣೆಪಟ್ಟಿಯನ್ನು ಭಾರತಕ್ಕೆ ಅಂಟಿಸುವ ಪಾಕ್ನ ಈ ಪ್ರಯತ್ನಕ್ಕೆ ಮಾಲ್ಡೀವ್ಸ್ ಮತ್ತು ಯುಎಇಗಳು ತಣ್ಣೀರೆರೆಚಿದ್ದಾಗಿ ತಿಳಿದುಬಂದಿದೆ.
ಇಸ್ಲಾಮಿಕ್ ಸಹಕಾರದ ಸಂಘಟನೆಯ (ಒಐಸಿ) ವ್ಯಾಪ್ತಿಯಲ್ಲಿ ಅನಧಿಕೃತವಾಗಿ ಭಾರತ ವಿರೋಧಿ ಗುಂಪು ರಚಿಸಿಕೊಂಡು, ಭಾರತ ಮುಸ್ಲಿಂ ವಿರೋಧಿ ಎಂಬ ಭಾವನೆ ಬಿತ್ತುವುದು ಹಾಗೂ ಆ ಎಲ್ಲ ರಾಷ್ಟ್ರಗಳನ್ನು ಭಾರತದ ವಿರುದ್ಧ ಛೂ ಬಿಡುವುದು ಪಾಕಿಸ್ತಾನದ ಹುನ್ನಾರವಾಗಿತ್ತು ಎನ್ನಲಾಗಿದೆ.
ಆದರೆ ವಾಸ್ತವಿಕ ತಳಹದಿಯಲ್ಲಿ ಭಾರತಕ್ಕೆ ಮುಸ್ಲಿಂ ವಿರೋಧಿ ಎಂಬ ಹಣೆಪಟ್ಟಿ ಅಂಟಿಸುವುದು ಸರಿಯಲ್ಲ. ಇದರಿಂದ ದಕ್ಷಿಣ ಏಷ್ಯಾದಲ್ಲಿ ಸೌಹಾರ್ದ ವಾತಾವರಣಕ್ಕೆ ಧಕ್ಕೆಯುಂಟಾಗುವ ಅಪಾಯವಿದೆ ಎಂದು ಹೇಳಿದ ಮಾಲ್ಡೀವ್ ಮುಖಂಡರು ಪಾಕ್ನ ಹುನ್ನಾರವನ್ನು ವಿಫಲಗೊಳಿಸಿದರು ಎನ್ನಲಾಗಿದೆ. ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ ಯುಎಇ ಕೂಡ ಇದಕ್ಕೆ ಕೈಜೋಡಿಸಿತು ಎಂದು ಹೇಳಲಾಗಿದೆ.