ನವದೆಹಲಿ: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಫೆ.24 ರಂದು ಭಾರತಕ್ಕೆ ಆಗಮಿಸಿದ್ದಾರೆ. ನಿನ್ನೆ ಗುಜರಾತ್ನ ಅಹಮದಾಬಾದ್ನಲ್ಲಿ ಮಾತನಾಡುತ್ತ, ಭಾರತವನ್ನು, ಪ್ರಧಾನಿ ನರೇಂದ್ರ ಮೋದಿಯವರನ್ನು ಹೊಗಳಿದ್ದರು.
ಅಮೆರಿಕ ಭಾರತವನ್ನು ಪ್ರೀತಿಸುತ್ತದೆ, ಗೌರವಿಸುತ್ತದೆ. ಅಮೆರಿಕ ಭಾರತಕ್ಕೆ ಯಾವತ್ತೂ ನಿಷ್ಠ ಸ್ನೇಹಿತನಾಗಿರುತ್ತದೆ ಎಂದಿದ್ದರು. ಇಸ್ಲಾಮಿಕ್ ಉಗ್ರವಾದದ ಬಗ್ಗೆಯೂ ಮಾತನಾಡಿದ್ದರು. ಚೀನಾವನ್ನೂ ಉಲ್ಲೇಖಿಸಿದ್ದರು. ಪಾಕಿಸ್ತಾನದೊಂದಿಗೆ ನಮ್ಮ ಸಂಬಂಧ ಉತ್ತಮವಾಗಿದೆ. ಪಾಕಿಸ್ತಾನದ ಪ್ರಗತಿಯ ಚಿಹ್ನೆಗಳನ್ನು ನಾವು ನೋಡುತ್ತಿದ್ದೇವೆ ಎಂದು ಹೇಳಿದ್ದರು.
ಈಗ ಪಾಕಿಸ್ತಾನ ಮಾಧ್ಯಮಗಳು ಮಾತ್ರ ಡೊನಾಲ್ಡ್ ಟ್ರಂಪ್ ಅವರ ಈ ಮಾತುಗಳನ್ನು ಎತ್ತಿ ತೋರಿಸುತ್ತಿವೆ. ಪಾಕಿಸ್ತಾನದೊಂದಿಗೆ ಯುಎಸ್ ಸಂಬಂಧ ಉತ್ತಮವಾಗಿದೆ ಎಂಬ ಮಾತುಗಳನ್ನೇ ಪ್ರಮುಖವಾಗಿ ಇಟ್ಟುಕೊಂಡು, ಭಾರತದಲ್ಲಿ ಮೋದಿಯವರ ಎದುರು ಪಾಕಿಸ್ತಾನವನ್ನು ಡೊನಾಲ್ಡ್ ಟ್ರಂಪ್ ಹೊಗಳಿದ್ದಾರೆ ಎಂದು ವರದಿ ಮಾಡಿವೆ.
ಡಾನ್ ಎಂಬ ಪ್ರಮುಖ ಇಂಗ್ಲಿಷ್ ಪತ್ರಿಕೆ ತನ್ನ ಮೊದಲ ಪುಟದಲ್ಲಿಯೇ ಸುದ್ದಿ ಪ್ರಕಟಿಸಿದೆ. ಟ್ರಂಪ್ ಪ್ರೇಸಸ್ ಪಾಕಿಸ್ತಾನ ಇನ್ ಇಂಡಿಯಾ (ಭಾರತದಲ್ಲಿ ಪಾಕಿಸ್ತಾನವನ್ನು ಹೊಗಳಿದ ಟ್ರಂಪ್) ಎಂಬ ಲೇಖನವನ್ನು ಬರೆದುಕೊಂಡಿದೆ.
ಸೋಮವಾರ ಭಾರತಕ್ಕೆ ಆಗಮಿಸಿರುವ ಟ್ರಂಪ್ಗೆ ಅದ್ದೂರಿ ಸ್ವಾಗತ ಸಿಕ್ಕಿದೆ. ಟ್ರಂಪ್ ಕೂಡ ಭಾರತದ ಜಾತ್ಯತೀತ ಪರಂಪರೆಯನ್ನು ಹೊಗಳಿದರು ಎಂದು ಡಾನ್ ವರದಿ ಮಾಡಿದೆ. ಅದಾದ ಬಳಿಕ ಟ್ರಂಪ್ ಅವರು ಪಾಕಿಸ್ತಾನವನ್ನು ಹೊಗಳಿದ್ದಾರೆ ಎಂದು ಬರೆದುಕೊಂಡಿದೆ.
ಡಾನ್ ಪತ್ರಿಕೆ ಮಾತ್ರವಲ್ಲದೆ, ಪಾಕಿಸ್ತಾನ ಬಹುತೇಕ ಇಂಗ್ಲಿಷ್ ವೆಬ್ಸೈಟ್ಗಳು, ಮಾಧ್ಯಮಗಳು, ಕೆಲವು ಚಾನೆಲ್ಗಳು ಕೂಡ ಟ್ರಂಪ್ ಪಾಕಿಸ್ತಾನವನ್ನು ಭಾರತದಲ್ಲಿ ನಿಂತು ಹೊಗಳಿದ್ದಾರೆ ಎಂದೇ ವರದಿ ಮಾಡಿವೆ.
ನಿಜಕ್ಕೂ ಟ್ರಂಪ್ ಮಾತನಾಡಿದ್ದೇನು?
ಭಯೋತ್ಪಾದಕರು ಮತ್ತು ಉಗ್ರಗಾಮಿಗಳಿಗೆ ನಮ್ಮ ದೇಶದ ಗಡಿಗಳು ಸದಾ ಮುಚ್ಚಿರುತ್ತವೆ. ಯಾರಾದರೂ ನಮ್ಮ ಭದ್ರತಾ ವ್ಯವಸ್ಥೆ, ರಕ್ಷಣಾ ಸಿಬ್ಬಂದಿಗೆ ಹಾನಿ ಮಾಡಲು ಬಂದರೆ ಅವರು ಅತಿದೊಡ್ಡ ಬೆಲೆ ತೆರಬೇಕಾಗುತ್ತದೆ ಎಂದು ಟ್ರಂಪ್ ಹೇಳಿದರು.
ನಾನು ಪಾಕಿಸ್ತಾನದೊಂದಿಗೆ ಸಕಾರಾತ್ಮಕವಾಗಿ ವ್ಯವಹಾರ ಮಾಡುತ್ತಿದ್ದೇನೆ. ಪಾಕ್ನೊಂದಿಗೆ ನಮ್ಮ ಸಂಬಂಧ ಉತ್ತಮವಾಗಿದೆ. ದಕ್ಷಿಣ ಏಷ್ಯಾದಲ್ಲಿ ಶಾಂತಿ ಸ್ಥಾಪನೆ ಮಾಡುವಲ್ಲಿ ಹೆಚ್ಚಿನ ಪ್ರಯತ್ನಗಳು ನಡೆಯುತ್ತಿವೆ ಎಂದು ಹೇಳಿದ್ದರು.
ಪಾಕಿಸ್ತಾನ ಮಾಧ್ಯಮಗಳು ಟ್ರಂಪ್ ಅವರ ಉಳಿದ ಮಾತುಗಳನ್ನು ಹೈಲೈಟ್ ಮಾಡದೆ, ಕೇವಲ ನಮ್ಮ ಸಂಬಂಧ ಉತ್ತಮವಾಗಿದ ಎಂಬುದಷ್ಟನ್ನೇ ಉಲ್ಲೇಖಿಸಿವೆ. (ಏಜೆನ್ಸೀಸ್)
