ಇಸ್ಲಮಾಬಾದ್: ಪಾಕಿಸ್ತಾನ ಮತ್ತು ಚೀನಾ ದೇಶಗಳು ತಾವು ಸಾರ್ವಕಾಲಿಕ ಮಿತ್ರರು ಎಂಬುದನ್ನು ಈಗಾಗಲೇ ಹಲವು ಬಾರಿ ಸಾಬೀತು ಮಾಡಿವೆ. ಈಗ ಮಾರಣಾಂತಿಕ ‘ಕೊರೊನಾ ವೈರಸ್’ ವಿಚಾರದಲ್ಲೂ ಪಾಕಿಸ್ತಾನ ತನ್ನ ದೇಶದ ಜನರ ಸುರಕ್ಷತೆಗಿಂತ ಚೀನಾದೊಂದಿಗಿನ ಸ್ನೇಹವೇ ಮುಖ್ಯ ಎನ್ನುತ್ತಿದೆ!
ಚೀನಾದಲ್ಲಿ ಡೆಡ್ಲಿ ಕೊರೊನಾ ವೈರಸ್ ದಿನದಿಂದ ದಿನಕ್ಕೆ ವ್ಯಾಪಕವಾಗಿ ಹರಡುತ್ತಿದೆ. ಅದರಲ್ಲೂ ಹುಬೈ ಪ್ರಾಂತ್ಯದ ವುಹಾನ್ ಸೇರಿ ಸುಮಾರು 17 ನಗರಗಳಲ್ಲಿ ಕೊರೊನಾ ವೈರಸ್ ವೇಗವಾಗಿ ಹಬ್ಬುತ್ತಿದೆ. ಅಲ್ಲದೆ ಈ ಸಿಟಿಗಳನ್ನು ಬಂದ್ ಮಾಡಲಾಗಿದೆ. ಅಲ್ಲಿರುವ ಬೇರೆ ದೇಶದ ಜನರನ್ನು ಸ್ಥಳಾಂತರ ಮಾಡಲು ಆಯಾ ದೇಶಗಳ ಸರ್ಕಾರಗಳು ಕ್ರಮ ಕೈಗೊಂಡಿವೆ. ಅದಕ್ಕೆ ಭಾರತವೂ ಹೊರತಾಗಿಲ್ಲ.
ವುಹಾನ್ ಸೇರಿ ಕೊರೊನಾ ಪೀಡಿತ ನಗರಗಳಲ್ಲಿನ ಭಾರತೀಯರನ್ನು ಸ್ಥಳಾಂತರಿಸುವ ಪ್ರಕ್ರಿಯೆ ಈಗಾಗಲೇ ಶುರುವಾಗಿದೆ ಎಂದು ಕಳೆದ ಎರಡು ದಿನಗಳ ಹಿಂದೆಯೇ ಭಾರತ ವಿದೇಶಾಂಗ ವ್ಯವಹಾರಗಳ ಇಲಾಖೆ ಮಾಹಿತಿ ನೀಡಿದೆ. ಜಪಾನ್ ಸೇರಿ ಮತ್ತೆ ಹಲವು ದೇಶಗಳೂ ಇದೇ ಕ್ರಮ ಅನುಸರಿಸಿವೆ.
ಆದರೆ ಪಾಕಿಸ್ತಾನ ಸರ್ಕಾರ ಮಾತ್ರ ಇದನ್ನು ಮಾಡಿಲ್ಲ. ಚೀನಾದೊಂದಿಗೆ ನಾವಿದ್ದೇವೆ ಎಂಬ ಏಕತೆ ಸಾರುವ ದೃಷ್ಟಿಯಿಂದ ವುಹಾನ್ ಸೇರಿ ಚೀನಾದ ಯಾವುದೇ ಭಾಗದಲ್ಲಿರುವ ನಮ್ಮ ದೇಶದ ಪ್ರಜೆಗಳನ್ನು ಸ್ಥಳಾಂತರ ಮಾಡುವುದಿಲ್ಲ ಎಂದು ಪಾಕ್ ಪ್ರಧಾನಿಯ ವಿಶೇಷ ಸಹಾಯಕರಾದ ಡಾ. ಜಾಫರ್ ಮಿರ್ಜಾ ತಿಳಿಸಿದ್ದಾರೆ.
ಚೀನಾದಲ್ಲಿ ವುಹಾನ್ ಸೇರಿ ಹಲವು ನಗರಗಳಲ್ಲಿ ಕೊರೊನಾ ವೈರಸ್ ವ್ಯಾಪಕವಾಗಿದೆ. ಈಗ ನಾವೇನಾದರೂ ಅಲ್ಲಿರುವ ನಮ್ಮ ದೇಶದ ಪ್ರಜೆಗಳನ್ನು ಬೇರೆ ಕಡೆಗೆ ಸ್ಥಳಾಂತರ ಮಾಡುವುದು ಅಥವಾ ನಮ್ಮ ದೇಶಕ್ಕೆ ವಾಪಸ್ ಕರೆಸಿಕೊಳ್ಳುವುದು ಮಾಡುವುದು ಸರಿಯಲ್ಲ. ಹೀಗೆ ಸ್ಥಳಾಂತರ ಮಾಡಿದ ಯಾರಲ್ಲಾದರೂ ವೈರಸ್ ಸೋಂಕು ಇದ್ದರೆ ಅದು ಬೇರೆಕಡೆಗಳಲ್ಲಿರುವ ಮತ್ತಷ್ಟು ಜನರಿಗೆ ತಗುಲುವ ಸಾಧ್ಯತೆ ಇದೆ. ಅಲ್ಲದೆ ಚೀನಾದಲ್ಲಿರುವ ನಮ್ಮ ಪ್ರೀತಿಪಾತ್ರರ, ದೇಶದ, ವಿಶ್ವದ ಜನರ ಹಿತಾದೃಷ್ಟಿಯಿಂದ ಯಾರನ್ನೂ ಸ್ಥಳಾಂತರ ಮಾಡುತ್ತಿಲ್ಲ ಎಂದು ಅವರು ಮಾಹಿತಿ ನೀಡಿದ್ದಾರೆ. ಹಾಗೇ ಚೀನಾದೊಂದಿಗೆ ಒಗ್ಗಟ್ಟು ಸಾರುವ ದೃಷ್ಟಿಯಿಂದ ಈ ನಿರ್ಧಾರ ಮಾಡಲಾಗಿದೆ ಎಂದು ಹೇಳಿದ್ದಾರೆ.
ಚೀನಾದ ವುಹಾನ್ನಲ್ಲಿರುವ ವಿವಿಧ ವಿಶ್ವವಿದ್ಯಾಲಯಗಳಲ್ಲಿ ಒಟ್ಟು 800 ಪಾಕಿಸ್ತಾನಿ ವಿದ್ಯಾರ್ಥಿಗಳು ಓದುತ್ತಿದ್ದಾರೆ. ಅವರಲ್ಲಿ ನಾಲ್ವರಿಗೆ ಕೊರೊನಾ ತಗುಲಿರುವುದು ದೃಢಪಟ್ಟಿದೆ. ಆದರೆ ಸೋಂಕಿತರ ಸಂಖ್ಯೆ ಹೆಚ್ಚಾಗಲಿಲ್ಲ ಎಂದು ಮಿರ್ಜಾ ತಿಳಿಸಿದ್ದಾರೆ.
ನಾವು ನಮ್ಮ ದೇಶದ ಪ್ರಜೆಗಳನ್ನು ವುಹಾನ್ನಿಂದ ಸ್ಥಳಾಂತರ ಮಾಡುವುದಿಲ್ಲ ಎಂದರೆ ಅವರ ಬಗ್ಗೆ ಕಾಳಜಿ ವಹಿಸುವುದಿಲ್ಲ ಎಂದರ್ಥವಲ್ಲ. ಚೀನಾದಲ್ಲಿರುವ ಪಾಕ್ನ ರಾಯಭಾರಿ ಅಲ್ಲಿನ ಪಾಕ್ ವಿದ್ಯಾರ್ಥಿಗಳು, ಪ್ರಜೆಗಳೊಂದಿಗೆ ಸಂಪರ್ಕದಲ್ಲಿದ್ದಾರೆ. ಚೀನಾ ಆಡಳಿತದೊಂದಿಗೆ ಸೇರಿ ಅವರ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುತ್ತೇವೆ. ಆದರೆ ಸ್ಥಳಾಂತರಿಸುವ ಬೇಜವಬ್ದಾರಿಯುತ ಕೆಲಸ ಮಾಡುವುದಿಲ್ಲ ಎಂದಿದ್ದಾರೆ.
ಆದರೆ ವುಹಾನ್ನಲ್ಲಿರುವ ಕೆಲವು ಪಾಕಿಸ್ತಾನಿ ವಿದ್ಯಾರ್ಥಿಗಳು ತಮ್ಮನ್ನು ಚೀನಾದ ಆಡಳಿತ ಚೆನ್ನಾಗಿ ನೋಡಿಕೊಳ್ಳುತ್ತಿಲ್ಲ. ನಮ್ಮ ಆರೋಗ್ಯದ ಬಗ್ಗೆ ಕಾಳಜಿ ವಹಿಸುತ್ತಿಲ್ಲ ಎಂದು ದೂರಿದ್ದಾಗಿ ವರದಿಯಾಗಿದೆ.
ಚೀನಾದಲ್ಲಿ ಕೊರೊನಾಗೆ ಮೃತಪಟ್ಟವರ ಸಂಖ್ಯೆ 170ಕ್ಕೆ ಏರಿದೆ. ಸುಮಾರು 8000 ಜನರಲ್ಲಿ ಸೋಂಕು ಪತ್ತೆಯಾಗಿದೆ.(ಏಜೆನ್ಸೀಸ್)