ಇಸ್ಲಾಮಾಬಾದ್: ಕೊರೊನಾ ವೈರಸ್ ಚೀನಾದಿಂದ ಶುರುವಾಗಿ, ಭಾರತ, ಜಪಾನ್, ಇರಾನ್, ಇಟಲಿ ಸೇರಿ ಹಲವು ದೇಶಗಳಿಗೆ ಪಸರಿಸಿದೆ.
ಈಗ ಪಾಕಿಸ್ತಾನಕ್ಕೂ ಕಾಲಿಟ್ಟಿದೆ. ಪಾಕ್ ನಲ್ಲಿ ಇಬ್ಬರಿಗೆ ಕೊರೊನಾ ವೈರಸ್ ತಗುಲಿರುವುದು ದೃಢಪಟ್ಟಿರುವುದಾಗಿ ಅಲ್ಲಿನ ಆರೋಗ್ಯ ಇಲಾಖೆ ಮಾಹಿತಿ ನೀಡಿದೆ.
ಪಾಕಿಸ್ತಾನ ಕೊರೊನಾ ವೈರಸ್ ತಗುಲಬಾರದು ಎಂದು ತುಂಬ ಪ್ರಯತ್ನ ಪಟ್ಟಿತ್ತು. ಎಷ್ಟೆಂದರೆ ವುಹಾನ್ನಲ್ಲಿರುವ ಪಾಕ್ ಪ್ರಜೆಗಳನ್ನು, ವಿದ್ಯಾರ್ಥಿಗಳನ್ನು ಸ್ಥಳಾಂತರಿಸಿರಲಿಲ್ಲ. ಚೀನಾದಲ್ಲಿ ಕೊರೊನಾ ವೈರಸ್ ತಗುಲಿದ ಕಾರಣಕ್ಕೆ ನಮ್ಮ ದೇಶದ ಪ್ರಜೆಗಳನ್ನು ಸ್ಥಳಾಂತರಿಸುವುದಿಲ್ಲ. ಅವರಲ್ಲಿ ಯಾರಿಗಾದರೂ ವೈರಸ್ ತಗುಲಿಕೊಂಡಿದ್ದರೆ, ವಾಪಸ್ ಕರೆದುಕೊಂಡು ಬಂದರೆ ನಮ್ಮ ದೇಶದಲ್ಲಿ ಉಳಿದವರಿಗೂ ತಗುಲುವ ಸಾಧ್ಯತೆ ಇರುತ್ತದೆ ಎಂದು ಹೇಳಿತ್ತು.
ಆದರೆ ಎಷ್ಟೇ ಪ್ರಯತ್ನ ಮಾಡಿದರೂ ಕೊರೊನಾ ತಡೆಯಲು ಪಾಕ್ಗೆ ಸಾಧ್ಯವಾಗಲಿಲ್ಲ.
ನಮ್ಮ ದೇಶದಲ್ಲಿ ಇಬ್ಬರಿಗೆ ಕೊರೊನಾ ತಗುಲಿದ್ದು ದೃಢಪಟ್ಟಿದೆ. ಅವರಿಬ್ಬರನ್ನೂ ವೈದ್ಯಕೀಯ ಚಿಕಿತ್ಸೆಗೆ ಒಳಪಡಿಸಲಾಗಿದೆ. ಆರೋಗ್ಯ ಸ್ಥಿರವಾಗಿದೆ ಎಂದು ಪ್ರಧಾನಮಂತ್ರಿಗಳ ವಿಶೇಷ ಸಹಾಯಕ ಡಾ. ಜಾಫರ್ ಮಿರ್ಜಾ ಟ್ವೀಟ್ ಮೂಲಕ ತಿಳಿಸಿದ್ದಾರೆ.
ಯಾರೂ ಗಾಬರಿಪಡುವ ಅವಶ್ಯಕತೆ ಇಲ್ಲ. ಕೊರೊನಾ ವೈರಸ್ ನಿಯಂತ್ರಣಕ್ಕೆ ಎಲ್ಲ ರೀತಿಯ ಕ್ರಮಗಳನ್ನೂ ಕೈಗೊಳ್ಳಲಾಗಿದೆ ಎಂದಿದ್ದಾರೆ. (ಏಜೆನ್ಸೀಸ್)