ನವದೆಹಲಿ: ಭಾರತ ಉಪಖಂಡದಲ್ಲಿ ನಕ್ಷೆ ರಾಜಕೀಯ ಬಲು ಜೋರಾಗಿದೆ. ಇತ್ತೀಚೆಗಷ್ಟೇ ಭಾರತಕ್ಕೆ ಸೇರಿದ ಭಾಗಗಳು ತನ್ನದೆಂದು ಹೇಳಿಕೊಂಡು ನೇಪಾಳ ಹೊಸ ನಕ್ಷೆ ಬರೆದುಕೊಂಡಿತ್ತು. ಇದೀಗ ಪಾಕ್ ಆಕ್ರಮಿತ ಕಾಶ್ಮೀರ ತನ್ನದೆಂದು ಹೇಳಿಕೊಂಡು ಪಾಕಿಸ್ತಾನ ಹೊಸ ನಕ್ಷೆ ಬರೆದುಕೊಂಡಿದೆ.
ಕಾಶ್ಮೀರಕ್ಕೆ ಸ್ವಾಯತ್ತೆ ನೀಡುತ್ತಿದ್ದ ಸಂವಿಧಾನದ 370ನೇ ವಿಧಿಯನ್ನು ಭಾರತ ರದ್ದುಗೊಳಿಸಿದ ಮೊದಲ ವರ್ಷಾಚರಣೆಯ ಮುನ್ನಾದಿನ ಪಾಕಿಸ್ತಾನ ಈ ದುಸ್ಸಾಹಸ ಮಾಡಿದೆ. ಮಂಗಳವಾರ ಈ ನಕ್ಷೆಯನ್ನು ಅನಾವರಣಗೊಳಿಸಿದ ಪಾಕ್ ಪ್ರಧಾನಿ ಇಮ್ರಾನ್ ಖಾನ್, ಇದು ಪಾಕಿಸ್ತಾನದ ಜನತೆಯ ಆಶೋತ್ತರಗಳ ದ್ಯೋತಕವಾಗಿದೆ ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ತಾರ್ಕಿಕ ಅಂತ್ಯಕ್ಕಿಂತ, ಸತ್ಯ ಬಯಲಾಗಬೇಕು!; ಸುಶಾಂತ್ ಪ್ರಕರಣಕ್ಕೆ ಅನುಪಮ್ ಖೇರ್ ಬೆಂಬಲ
ಪಾಕಿಸ್ತಾನದ ಇತಿಹಾಸದಲ್ಲಿ ಇದು ಐತಿಹಾಸಿಕ ದಿನ ಎಂದು ಇಮ್ರಾನ್ ಖಾನ್ ತಮ್ಮ ಸಚಿವ ಸಂಪುಟ ಸಭೆಯ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ ಹೇಳಿದರು. ಪಾಕ್ ಮತ್ತು ಕಾಶ್ಮೀರ ಜನತೆಯ ಆಶೋತ್ತರಗಳಿಗೆ ಅನುಗುಣವಾಗಿ ಹೊಸ ರಾಜಕೀಯ ಭೂಪಟವನ್ನು ರಚಿಸಿ, ಅನಾವರಣಗೊಳಿಸಲಾಗಿದೆ ಎಂದು ಹರ್ಷ ವ್ಯಕ್ತಪಡಿಸಿದರು.
ಪಾಕಿಸ್ತಾನ ಇದುವರೆಗೂ ಪಾಕ್ ಆಕ್ರಮಿತ ಪ್ರದೇಶವನ್ನು ತನ್ನದೆಂದು ಹೇಳಿಕೊಳ್ಳಲು ಹಿಂದೇಟು ಹಾಕುತ್ತಿತ್ತು. ಆದರೆ, ಗಿಲ್ಗಿಟ್-ಬಾಲ್ಟಿಸ್ತಾನವನ್ನು ಮಾತ್ರ ತನ್ನದೆಂದು ಹೇಳಿಕೊಳ್ಳುತ್ತಿತ್ತು. ಉಳಿದ ಭಾಗವನ್ನು ಆಜಾದ್ ಕಾಶ್ಮೀರ ಎಂದೇ ಹೇಳುತ್ತಿತ್ತು. ಇದೀಗ ನೇಪಾಳದ ನಂತರದಲ್ಲಿ ಪಿಒಕೆ ತನಗೆ ಸೇರಿದ್ದೆಂದು ಹೇಳಿಕೊಂಡು ಹೊಸ ರಾಜಕೀಯ ಭೂಪಟ ರಚಿಸಿ ಮತ್ತೊಂದು ವಿವಾದ ಸೃಷ್ಟಿಸಿದೆ.