ಬೆಂಗಳೂರು: ಇಲ್ಲಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಇಂದು (ನ.9) ನಡೆದ ವಿಶ್ವಕಪ್ ಟೂರ್ನಿಯ 41ನೇ ಹಾಗೂ ನ್ಯೂಜಿಲೆಂಡ್ ತಂಡದ ಲೀಗ್ ಹಂತದ ಕೊನೆಯ ನಿರ್ಣಾಯಕ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ 5 ವಿಕೆಟ್ಗಳ ಭರ್ಜರಿ ಗೆಲುವು ದಾಖಲಿಸುವ ಮೂಲಕ ಕಿವೀಸ್ ಪಡೆ ಸಮೀಸ್ ಸ್ಥಾನವನ್ನು ಬಹುತೇಕ ಖಚಿತಪಡಿಸಿಕೊಂಡಿದೆ. ಕಿವೀಸ್ ಗೆಲುವು ಪಾಕಿಸ್ತಾನ ಸಮೀಸ್ ಆಸೆಗೆ ಬಹುದೊಡ್ಡ ಸವಾಲವನ್ನು ತಂದೊಡ್ಡಿದೆ.
ಟಾಸ್ ಸೋತು ಬ್ಯಾಟಿಂಗ್ ಆರಂಭಿಸಿದ ಶ್ರೀಲಂಕಾ, 46.4 ಓವರ್ಗಳಲ್ಲಿ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 171ರನ್ಗಳು ಸಾಧಾರಣ ಮೊತ್ತವನ್ನು ಕಲೆಹಾಕಿತು. ಲಂಕಾ ಪರ ಕುಶಾಲ್ ಪೆರೆರಾ (51) ಮತ್ತು ಮಹೇಶ್ ತೀಕ್ಷಣ (38) ಹೊರತಪಡಿಸಿದರೆ ಉಳಿದ ಯಾವೊಬ್ಬ ಬ್ಯಾಟ್ಸ್ಮನ್ಗಳು ಕೂಡ ಕಿವೀಸ್ ಬೌಲರ್ಗಳನ್ನು ಸಮರ್ಥವಾಗಿ ಎದುರಿಸಲಿಲ್ಲ.
ಕಿವೀಸ್ ಪರ ಮಾರಕ ಬೌಲಿಂಗ್ ದಾಳಿ ಮಾಡಿದ ಟ್ರೆಂಟ್ ಬೌಲ್ಟ್ ಪ್ರಮುಖ 3 ವಿಕೆಟ್ ಕಬಳಿಸಿದರೆ, ಲುಕಿ ಫರ್ಗ್ಯೂಸನ್, ಸ್ಯಾಂಟ್ನರ್, ರಾಚಿನ್ ರವೀಂದ್ರ ತಲಾ 2 ವಿಕೆಟ್ ಪಡೆದು ಮಿಂಚಿದರು. ಉಳಿದಂತೆ ಟಿಮ್ ಸೌಥಿ 1 ವಿಕೆಟ್ಗೆ ತೃಪ್ರಿಪಟ್ಟುಕೊಂಡರು.
ಲಂಕಾ ನೀಡಿದ 172 ರನ್ಗಳ ಸಾಧಾರಣ ಗುರಿ ಬೆನ್ನತ್ತಿದ ಕಿವೀಸ್ ಪಡೆ ಕೇವಲ 23.2 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ ಗುರಿ ಮುಟ್ಟುವ ಮೂಲಕ ನಿರ್ಣಾಯಕ ಪಂದ್ಯದಲ್ಲಿ ಭರ್ಜರಿ ಗೆಲುವು ದಾಖಲಿಸಿ ಸಮೀಸ್ ಸ್ಥಾನವನ್ನು ಬಹುತೇಕ ಖಚಿತಪಡಿಸಿಕೊಂಡಿತು. ಕಿವೀಸ್ ಪರ ಡೆವನ್ ಕ್ಯಾನ್ವೇ (45), ರಾಚಿನ್ ರವೀಂದ್ರ (42) ಮತ್ತು ಡರೈಲ್ ಮಿಚೆಲ್ (43) ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶನ ಮಾಡಿದರು.
ಲಂಕಾ ಪರ ಆ್ಯಂಜೆಲೋ ಮ್ಯಾಥೀವ್ಸ್ 2 ವಿಕೆಟ್ ಪಡೆದರೆ, ಮಹೇಶ್ ತೀಕ್ಷಣ ಹಾಗೂ ದುಷ್ಮಂತ್ ಚಮೀರಾ ತಲಾ ಒಂದೊಂದು ವಿಕೆಟ್ ಪಡೆದರು.
ಪಾಕ್ ಮುಂದಿದೆ ಬಹುದೊಡ್ಡ ಸವಾಲು
ಸದ್ಯ ಬಾಬರ್ ಅಜಾಮ್ ನೇತೃತ್ವದ ಪಾಕ್ ತಂಡಕ್ಕೆ ಇನ್ನೂ ಸಮೀಸ್ ಆಸೆ ಜೀವಂತವಾಗಿದೆ. ಆದರೆ, ಭಾರೀ ಸವಾಲನ್ನು ಪಾಕ್ ತಂಡ ಎದುರಿಸಬೇಕಾಗಿದೆ. ಒಂದು ರೀತಿಯಲ್ಲಿ ಹೇಳಬೇಕೆಂದರೆ, ಪವಾಡವೇ ನಡೆಯಬೇಕಿದೆ. ನ್ಯೂಜಿಲೆಂಡ್ ತಂಡ ಲಂಕಾ ವಿರುದ್ಧ ಭಾರೀ ಅಂತರದಲ್ಲಿ ಗೆಲುವು ಸಾಧಿಸುವುದರಿಂದ ಪಾಕ್ಗೆ ಸಮೀಸ್ ಹಾದಿ ಮತ್ತಷ್ಟು ದುರ್ಗಮವಾಗಿದೆ. ನ.11ರಂದು ಇಂಗ್ಲೆಂಡ್ ವಿರುದ್ಧ ನಡೆಯಲಿರುವ ಪಂದ್ಯದಲ್ಲಿ ಪಾಕ್ ಗೆದ್ದರೆ ಮಾತ್ರ ಸಾಲದು 200ಕ್ಕೂ ಅಧಿಕ ರನ್ಗಳ ಅಂತರದಿಂದ ಗೆಲುವು ಸಾಧಿಸಬೇಕಾದ ಅನಿವಾರ್ಯತೆ ಎದುರಾಗಿದೆ. ಒಂದು ವೇಳೆ ಪಾಕ್ ಸಮೀಸ್ ಸ್ಥಾನ ತಪ್ಪಿದರೆ, ಭಾರತದ ವಿರುದ್ಧ ನ್ಯೂಜಿಲೆಂಡ್ ಸಮಿಫೈನಲ್ನಲ್ಲಿ ಮುಖಾಮುಖಿಯಾಗಲಿದೆ.
ಲಂಕಾ ವಿರುದ್ಧ ಕಿವೀಸ್ ಗೆದ್ದರೂ ಪಾಕಿಸ್ತಾನಕ್ಕಿದೆ ಭಾರತದ ವಿರುದ್ಧ ಸೆಮೀಸ್ನಲ್ಲಿ ಕಾದಾಡುವ ಅವಕಾಶ!