ನವದೆಹಲಿ: ಪ್ರಸಕ್ತ ವಿಶ್ವಕಪ್ ಟೂರ್ನಿಯೂ ಮಹತ್ವದ ಘಟಕ್ಕೆ ಬಂದಿದೆ. ಈಗಾಗಲೇ ಭಾರತ, ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ಮೂರು ತಂಡಗಳು ಸೆಮಿಫೈನಲ್ ಸ್ಥಾನ ಖಚಿತಪಡಿಸಿಕೊಂಡಿವೆ. ಉಳಿದಿರುವ ಇನ್ನೊಂದು ಸ್ಥಾನಕ್ಕಾಗಿ ಪೈಪೋಟಿ ನಡೆಯುತ್ತಿದ್ದು, ನ್ಯೂಜಿಲೆಂಡ್ ಮತ್ತು ಪಾಕಿಸ್ತಾನ ಈ ಎರಡು ತಂಡಗಳಲ್ಲಿ ಯಾರು ಸಮಿಫೈನಲ್ ಪ್ರವೇಶ ಮಾಡಲಿದ್ದಾರೆ ಎಂಬ ಕುತೂಹಲವಿದೆ.
ಇಂದು (ನ.09) ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನ್ಯೂಜಿಲೆಂಡ್ ಮತ್ತು ಶ್ರೀಲಂಕಾ ನಡುವೆ 41ನೇ ಪಂದ್ಯ ನಡೆಯುತ್ತಿದ್ದು, ಕಿವೀಸ್ ಪಾಲಿಗೆ ಇದು ಸಮೀಸ್ಗೇರಲು ಗೆಲ್ಲಲೇಬೇಕಾದ ಪಂದ್ಯವಾಗಿದೆ. ಇನ್ನೊಂದೆಡೆ ಪಾಕಿಸ್ತಾನಕ್ಕೂ ಸಮೀಸ್ಗೇರುವ ಆಸೆಯನ್ನು ಜೀವಂತವಾಗಿ ಇರಿಸಿಕೊಂಡಿದೆ. ನಾಲ್ಕನೇ ಸ್ಥಾನದಲ್ಲಿ ಯಾರು ಉಳಿಯುತ್ತಾರೋ ಅವರು ಭಾರತದ ವಿರುದ್ಧ ಸಮಿಫೈನಲ್ನಲ್ಲಿ ಸೆಣಸಾಡಲಿದೆ.
ಪ್ರಸ್ತುತ ಸ್ಥಿತಿಯ ಪ್ರಕಾರ, ನ್ಯೂಜಿಲೆಂಡ್ 8 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನದಲ್ಲಿದೆ. ಪಾಕಿಸ್ತಾನ ಮತ್ತು ಆಫ್ಘಾನಿಸ್ತಾನ ಸಹ 8 ಅಂಕಗಳನ್ನು ಹೊಂದಿದ್ದರೂ ನ್ಯೂಜಿಲೆಂಡ್, ಅಧಿಕ ರನ್ರೇಟ್ನೊಂದಿಗೆ ನಾಲ್ಕನೇ ಸ್ಥಾನದಲ್ಲಿದೆ. ಮೂರು ತಂಡಗಳಿಗೂ ಒಂದೊಂದು ಪಂದ್ಯ ಬಾಕಿ ಇದ್ದು, ಉಳಿದ ಪಂದ್ಯಗಳನ್ನು ಗೆದ್ದಲ್ಲಿ ತಲಾ 10 ಅಂಕಗಳನ್ನು ಹೊಂದಲಿದೆ. ಈ ಮೂರು ತಂಡಗಳಲ್ಲಿ ನ್ಯೂಜಿಲೆಂಡ್ ಇಂದು ಲಂಕಾ ವಿರುದ್ಧ ಸೆಣಸಾಡುತ್ತಿದ್ದು, ಈ ಪಂದ್ಯವನ್ನು ಗೆದ್ದರೆ ಸಮೀಸ್ ಸ್ಥಾನ ಬಹುತೇಕ ಖಚಿತವಾಗಲಿದೆ.
ಪಾಕಿಸ್ತಾನದ ಲೆಕ್ಕಾಚಾರವೇನು?
ಬಾಬರ್ ಅಜಾಮ್ ನೇತೃತ್ವದ ಪಾಕ್ ತಂಡಕ್ಕೂ ಸಮೀಸ್ ಆಸೆ ಜೀವಂತವಾಗಿದೆ. ಒಂದು ವೇಳೆ ಲಂಕಾ ವಿರುದ್ಧ ನ್ಯೂಜಿಲೆಂಡ್ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧ ಆಫ್ಘಾನ್ ಸೋತು, ನ.11ರಂದು ಇಂಗ್ಲೆಂಡ್ ವಿರುದ್ಧ ನಡೆಯಲಿರುವ ಪಂದ್ಯದಲ್ಲಿ ಪಾಕ್ ಗೆದ್ದರೆ ನಿರಾಯಾಸವಾಗಿ ಪಾಕ್ ಸಮಿಫೈನಲ್ ಪ್ರವೇಶ ಮಾಡಲಿದೆ.
ನ್ಯೂಜಿಲೆಂಡ್ ಗೆದ್ದರೆ: ಒಂದು ವೇಳೆ ಲಂಕಾ ವಿರುದ್ಧ ನ್ಯೂಜಿಲೆಂಡ್ ಗೆದ್ದಲ್ಲಿ ಪಾಕ್ಗೆ ಸಮೀಸ್ ಆಸೆ ಇನ್ನೂ ಜೀವಂತವಾಗಿರಲಿದೆ. ಅದು ಹೇಗೆಂದರೆ, ಲಂಕಾ ವಿರುದ್ಧ ನ್ಯೂಜಿಲೆಂಡ್ ಗೆಲುವಿಗಿಂತ ಕನಿಷ್ಠ 130 ರನ್ಗಳ ಅಂತರದಿಂದ ಇಂಗ್ಲೆಂಡ್ ವಿರುದ್ಧ ಪಾಕಿಸ್ತಾನ ಗೆಲ್ಲಬೇಕಾಗಿದೆ. ಉದಾಹರಣೆಗೆ ನ್ಯೂಜಿಲೆಂಡ್ ತಂಡ ಲಂಕಾ ವಿರುದ್ಧ 30 ರನ್ ಅಂತರದಿಂದ ಗೆದ್ದರೆ ಪಾಕಿಸ್ತಾನ, ಕಿವೀಸ್ ತಂಡದ ರನ್ರೇಟ್ ಮೀರಿಸಲು 160 ರನ್ ಅಂತರದಿಂದ ಗೆಲ್ಲಬೇಕಾಗುತ್ತದೆ.
ಮುಖ್ಯವಾಗಿ ಗಮನಿಸಬೇಕಾದ ಸನ್ನಿವೇಶದಲ್ಲಿ, ನ್ಯೂಜಿಲೆಂಡ್ ಇಂದು ರಾತ್ರಿ ಸುಮಾರು 150 ಎಸೆತಗಳಲ್ಲಿ ಲಂಕಾ ವಿರುದ್ಧ ಗೆದ್ದರೆ, ಇಂಗ್ಲೆಂಡ್ ವಿರುದ್ಧ ಪಾಕಿಸ್ತಾನದ ಹೋರಾಟವನ್ನು ನಿಜವಾಗಿಯೂ ಕಷ್ಟಕ್ಕೆ ದೂಡುತ್ತದೆ. ಪಾಕಿಸ್ತಾನವು ಇಂಗ್ಲೆಂಡ್ ವಿರುದ್ಧ 270+ ರನ್ಗಳ ಬೃಹತ್ ಅಂತರದಿಂದ ಅಥವಾ 275 ಎಸೆತಗಳು ಬಾಕಿಯಿರುವಾಗಲೇ ಗೆಲ್ಲಬೇಕಾದ ಅನಿವಾರ್ಯತೆ ಎದುರಾಗುತ್ತದೆ. ಆದರೆ, ಇದು ಸಣ್ಣ ಸಾಧನೆಯಂತೂ ಅಲ್ಲ.
ಆಫ್ಘಾನ್ಗೂ ಇದೆ ಅವಕಾಶ
ಆಫ್ಘಾನ್ ತಂಡ ಕಿವೀಸ್ ಮತ್ತು ಪಾಕ್ ತಂಡಗಳ ರನ್ರೇಟ್ಗಿಂತ ಹಿಂದುಳಿದಿದ್ದರೂ ಈಗಲೂ ಆಫ್ಘಾನ್ಗೆ ಸಮೀಸ್ ಆಸೆ ಜೀವಂತವಾಗಿದೆ. ಆದರೆ, ಪವಾಡ ನಡೆಯಬೇಕಷ್ಟೇ. ಉಳಿದಿರುವ ಒಂದೊಂದು ಪಂದ್ಯಗಳಲ್ಲಿ ನ್ಯೂಜಿಲೆಂಡ್ ಮತ್ತು ಪಾಕಿಸ್ತಾನ ಸೋಲಬೇಕು ಮತ್ತು ಆಫ್ಘಾನಿಸ್ತಾನ ದಕ್ಷಿಣ ಆಫ್ರಿಕಾ ವಿರುದ್ಧ ಗೆಲ್ಲಬೇಕಿದೆ. ಒಂದು ವೇಳೆ ಇದು ನಡೆದಿದ್ದಲ್ಲಿ ಆಫ್ಘಾನ್ ಸಮಿಫೈನಲ್ ಹಂತಕ್ಕೆ ಏರಲಿದ್ದು, ಭಾರತದೊಂದಿಗೆ ಸೆಣಸಾಡಲಿದೆ.
ಸದ್ಯದ ಸನ್ನಿವೇಶ ನೋಡಿದರೆ ಇಂದು ನಡೆಯುತ್ತಿರುವ ಪಂದ್ಯದಲ್ಲಿ ನ್ಯೂಜಿಲೆಂಡ್ ಲಂಕಾ ವಿರುದ್ಧ ಸುಲಭ ಗೆಲುವು ಸಾಧಿಸುವ ಸಾಧ್ಯತೆ ಇದೆ. ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ 46.4 ಓವರ್ಗಳಲ್ಲಿ 171 ರನ್ಗಳ ಸಾಧಾರಣ ಮೊತ್ತಕ್ಕೆ ಸರ್ವಪತನ ಕಂಡಿದೆ. ಗುರಿಬೆನ್ನತ್ತಿರುವ ನ್ಯೂಜಿಲೆಂಡ್ ಗೆಲುವು ಸಾಧಿಸುವ ಸಾಧ್ಯತೆ ಇದೆ. (ಏಜೆನ್ಸೀಸ್)
80 ಲಕ್ಷ ರೂ. ವಿಮೆ ಹಣಕ್ಕಾಗಿ ಭಿಕ್ಷುಕನನ್ನು ಕೊಂದು ತನ್ನದೇ ಸಾವೆಂದು ಬಿಂಬಿಸಿದ ಕಿರಾತಕ 17 ವರ್ಷದ ಬಳಿಕ ಅರೆಸ್ಟ್!