ಆಕ್ಲೆಂಡ್: ಇಲ್ಲಿನ ಈಡನ್ ಪಾರ್ಕ್ನಲ್ಲಿ ನಡೆಯುತ್ತಿರುವ ಆತಿಥೇಯ ನ್ಯೂಜಿಲೆಂಡ್ ವಿರುದ್ಧದ 5 ಟಿ20 ಪಂದ್ಯಗಳ ಸರಣಿಯ ಎರಡನೇ ಪಂದ್ಯದಲ್ಲಿ ಪ್ರವಾಸಿ ಟೀಮ್ ಇಂಡಿಯಾ ಬೌಲಿಂಗ್ ದಾಳಿಗೆ ಬ್ಯಾಟ್ ಬೀಸಲು ತಿಣುಕಾಡಿದ ಕಿವೀಸ್ ಪಡೆ ಭಾರತಕ್ಕೆ ಸಾಧಾರಣ ಗುರಿ ನೀಡಿದೆ.
ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ ಕಿವೀಸ್ ಪಡೆಗೆ ಮಾರ್ಟಿನ್ ಗುಪ್ಟಿಲ್ ಮತ್ತು ಕೊಲಿನ್ ಮನ್ರೋ 48 ರನ್ಗಳ ಜತೆಯಾಟವಾಡಿ ಉತ್ತಮ ಆರಂಭ ಒದಗಿಸಿಕೊಟ್ಟರು. ಈ ವೇಳೆ 33 ರನ್ ಗಳಿಸಿದ್ದ ಗುಪ್ಟಿಲ್ ಕ್ಯಾಚಿತ್ತು ನಿರ್ಗಮಿಸಿದರು.
ಇಲ್ಲಿಂದಾಚೆಗೆ ಟೀಮ್ ಇಂಡಿಯಾ ಎದುರು ರನ್ ಕದಿಯಲು ಕಿವೀಸ್ ತಿಣುಕಾಡಿತು. ತಂಡದ ಮೊತ್ತ 68 ರನ್ ಆಗಿದ್ದಾಗ ಕೊಲಿನ್ ಮನ್ರೋ(26), 74 ರನ್ ಆಗಿದ್ದಾಗ ನಾಯಕ ಕೇನ್ ವಿಲಿಯಮ್ಸನ್(14) ಮತ್ತು 81 ರನ್ ಆಗಿದ್ದಾಗ ಕೊಲಿನ್ ಡಿ ಗ್ರ್ಯಾಂಡ್ಹೋಮ್(3) ವಿಕೆಟ್ ಕಳೆದುಕೊಂಡು ತಂಡ ಸಂಕಷ್ಟಕ್ಕೀಡಾಯಿತು.
ಉಳಿದಂತೆ ರಾಸ್ ಟೇಲರ್(18) ರನ್ ಗಳಿಸಿ ಔಟಾದರೆ, ಟಿಮ್ ಸೈಫರ್ಟ್(33) ಮತ್ತು ಮಿಚೆಲ್ ಸ್ಯಾಂಟ್ನರ್ ಯಾವುದೇ ರನ್ ಖಾತೆ ತೆರೆಯದೆ ಅಜೇಯರಾಗಿ ಉಳಿದರು.
ಅಂತಿಮವಾಗಿ ನ್ಯೂಜಿಲೆಂಡ್ ತಂಡ 20 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 132 ರನ್ ಗಳಿಸಿತು. ಈ ಮೂಲಕ ಟೀಮ್ ಇಂಡಿಯಾ ಗೆಲುವಿಗೆ 133 ರನ್ ಗುರಿ ನೀಡಿತು.
ಟೀಮ್ ಇಂಡಿಯಾ ಪರ ರವೀಂದ್ರ ಜಡೇಜಾ ಪ್ರಮುಖ 2 ವಿಕೆಟ್ ಕಬಳಿಸಿ ಮಿಂಚಿದರೆ, ಶಾರ್ದುಲ್ ಠಾಕೂರ್, ಮಹಮ್ಮದ್ ಶಮಿ ಹಾಗೂ ಶಿವಂ ದುಬೆ ತಲಾ ಒಂದೊಂದು ವಿಕೆಟ್ ಉರುಳಿಸಿದರು. (ಏಜೆನ್ಸೀಸ್)