ವಾರಾಣಸಿ: ಪ್ರಖ್ಯಾತ ಕಾಶಿ ವಿಶ್ವನಾಥನ ದರ್ಶನಕ್ಕೆ ಇನ್ನು ಡ್ರೆಸ್ ಕೋಡ್ ಜಾರಿಯಾಗುತ್ತಿದೆ.
ಜ್ಯೋತಿರ್ಲಿಂಗದ ಸ್ಪರ್ಶಿಸುವವರು (ಸ್ಪರ್ಶ ದರ್ಶನ) ಇನ್ನು ಜುಬ್ಬಾ- ಪಂಚೆ ಹಾಕಬೇಕು. ಇಂತಹದ್ದೊಂದು ಮನವಿಯನ್ನು ಕಾಶಿ ವಿದ್ವತ್ ಪರಿಷದ್ ಮಾಡಿದೆ. ಈ ಪರಿಷದ್ ಸಂಸ್ಕೃತ ಪಂಡಿತರು ಮತ್ತು ವೈದಿಕ ತಜ್ಞರನ್ನೊಳಗೊಂಡ ಸನಾತನ ಸಂಸ್ಥೆ.
ಯಾವ ಭಕ್ತರು ಪ್ಯಾಂಟ್, ಶರ್ಟ್ ಅಥವಾ ಜೀನ್ಸ್ ಬಟ್ಟೆ ಹಾಕಿರುತ್ತಾರೋ ಅವರು ದೂರದಿಂದ ವಿಶ್ವನಾಥನ ದರ್ಶನ ಮಾಡಬಹುದು ಅಷ್ಟೆ. ಅವರಿಗೆ ಗರ್ಭಗುಡಿಯೊಳಗೆ ಪ್ರವೇಶಿವಿಲ್ಲ.
ಉತ್ತರ ಪ್ರದೇಶದ ಪ್ರವಾಸೋದ್ಯಮ ಸಚಿವ ಡಾ. ನೀಲಕಂಠ ತಿವಾರಿ ಅಧ್ಯಕ್ಷತೆಯಲ್ಲಿ ನಡೆದ ಸಭೆಯಲ್ಲಿ ಈ ಮನವಿಯನ್ನು ಪರಿಷದ್ನ ಸದಸ್ಯರು ಮಾಡಿದರು. ಜತೆಗೆ ಸ್ಪರ್ಶ ದರ್ಶನದ ಸಮಯವನ್ನು ಹೆಚ್ಚಿಸಬೇಕು, ಇದರಿಂದ ಹೆಚ್ಚು ಹೆಚ್ಚು ಭಕ್ತರಿಗೆ ದರ್ಶನ ದೊರೆಯಲಿದೆ ಎಂದರು.
“ಡ್ರೆಸ್ಕೋಡ್ ಬಗ್ಗೆ ದೇಗುಲದ ಆಡಳಿತ ಮಂಡಳಿ ಶೀಘ್ರ ಕ್ರಮ ಕೈಗೊಳ್ಳಲಿದೆ. ಇಲ್ಲಿನ ಅರ್ಚಕರಿಗೂ ಡ್ರೆಸ್ಕೋಡ್ ಮಾಡಲಾಗುವುದು. ಅಷ್ಟು ಜನರ ಗುಂಪಿನಲ್ಲಿ ಅರ್ಚಕರನ್ನು ಗುರುತಿಸಲು ಇದು ಸಹಾಯವಾಗಲಿದೆ” ಎಂದು ಸಚಿವ ತಿವಾರಿ ತಿಳಿಸಿದ್ದಾರೆ. (ಏಜೆನ್ಸೀಸ್)