ನವದೆಹಲಿ: ದೂರಸಂಪರ್ಕ ಇಲಾಖೆ (ಡಾಟ್)ಗೆ ಪಾವತಿಸಬೇಕಿದ್ದ ಬಾಕಿ 10 ಸಾವಿರ ಕೋಟಿ ರೂಪಾಯಿಗಳನ್ನು ಇಂದು ಬೆಳಗ್ಗೆ ಭಾರ್ತಿ ಏರ್ಟೆಲ್ ಪಾವತಿಸಿದೆ.
ಖಾಸಗಿ ಸಂಸ್ಥೆಗಳು ಪಾವತಿಸಬೇಕಾದ ಬಾಕಿಯನ್ನು ವಸೂಲಿ ಮಾಡಲು ದೂರ ಸಂಪರ್ಕ ಇಲಾಖೆ ಸೂಚನೆ ನೀಡಿತ್ತು. ಅದರಲ್ಲಿ ಬಾಕಿ ಮೊತ್ತವನ್ನು ತಕ್ಷಣ ಪಾವತಿಸಬೇಕು, ಇಲ್ಲವಾದಲ್ಲಿ ಸೂಕ್ತ ಕ್ರಮ ಎದುರಿಸಬೇಕಾದೀತು ಎಂದು ಎಚ್ಚರಿಕೆ ನೀಡಲಾಗಿತ್ತು.
ದೂರ ಸಂಪರ್ಕ ಇಲಾಖೆಯ ಈ ಸೂಚನೆಗೆ ಪ್ರತಿಕ್ರಿಯಿಸಿದ್ದ ಏರ್ಟೆಲ್, ಸಂಸ್ಥೆಯ ಸ್ವಯಂ ಮೌಲ್ಯಮಾಪನ ಕಾರ್ಯದ ನಂತರ ಬಾಕಿ ಹಣವನ್ನು ಪಾವತಿಸುವುದಾಗಿ ಹೇಳಿತ್ತು. ಅಲ್ಲದೆ ಇದಕ್ಕೆ ಸಂಬಂಧಪಟ್ಟ ಎಲ್ಲ ದಾಖಲೆಗಳನ್ನು ಒದಗಿಸುವುದಾಗಿ ಹೇಳಿಕೊಂಡಿತ್ತು.
ದೂರ ಸಂಪರ್ಕ ಇಲಾಖೆ ಕಳೆದ ಶುಕ್ರವಾರದಿಂದ ಖಾಸಗಿ ಸಂಸ್ಥೆಗಳಾದ ಭಾರ್ತಿ ಏರ್ಟೆಲ್, ವೋಡಾಪೋನ್ ಐಡಿಯಗಳಿಗೆ ತಕ್ಷಣ ಹಳೆಯ ಬಾಕಿಯನ್ನು ಚುಕ್ತಗೊಳಿಸಲು ಸೂಚಿಸಿತ್ತು. ಸುಪ್ರೀಂಕೋರ್ಟ್ನ ಕೋಪಕ್ಕೆ ತುತ್ತಾಗಿದ್ದ ಇಲಾಖೆ ಖಾಸಗಿ ಸಂಸ್ಥೆಗಳಿಗೆ ನೋಟಿಸ್ ನೀಡಲು ಆರಂಭಿಸಿತ್ತು.
ಸೂಚನೆ ಕೊಟ್ಟಿದ್ದ ದೂರ ಸಂಪರ್ಕ ಇಲಾಖೆಗೆ ಏರ್ಟೆಲ್ ಫೆಬ್ರವರಿ 20ರೊಳಗೆ 10 ಸಾವಿರ ಕೋಟಿ ರೂಪಾಯಿ ಪಾವತಿಸಲಾಗುವುದು. ನಂತರ ಮಾರ್ಚ್ 17ರೊಳಗೆ ಉಳಿದ ಮೊತ್ತ ಪಾವತಿಸುತ್ತೇವೆ ಎಂದು ತಿಳಿಸಿತ್ತು. ಅಂದಹಾಗೆ ಏರ್ಟೆಲ್ ಪರವಾನಗಿ ಶುಲ್ಕ ಮತ್ತು ಸ್ಪೆಕ್ಟ್ರಮ್ ಬಳಕೆಯ ಶುಲ್ಕಗಳು ಸೇರಿ ಒಟ್ಟು 35,586 ಕೋಟಿ ರೂಪಾಯಿ ಬಾಕಿ ಉಳಿಸಿಕೊಂಡಿತ್ತು.
ಸೋಮವಾರ ಭಾರ್ತಿ ಏರ್ಟೆಲ್ನ ಷೇರುಗಳು ಶೇ.1.49 ಕುಸಿದವು ಬೆಳಗ್ಗೆ 11:14ಕ್ಕೆ ಏರ್ಟೆಲ್ ಷೇರುಗಳು ಬಿಎಸ್ಇಯಲ್ಲಿ ಶೇ.0.50 ಕಡಿಮೆಯಾಗಿ 556.70 ರೂಪಾಯಿವರೆಗೆ ವಹಿವಾಟು ನಡೆಸಿತ್ತು. (ಏಜೆನ್ಸೀಸ್)