ನವದೆಹಲಿ: ರಾಷ್ಟ್ರಪತಿ ರಾಮನಾಥ ಕೋವಿಂದ, ಉಪರಾಷ್ಟ್ರಪತಿ ವೆಂಕಯ್ಯ ನಾಯ್ಡು ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರ ಓಡಾಟಕ್ಕಾಗಿ ಎರಡು ಅತ್ಯಾಧುನಿಕ ಬಿ777 ವಿಮಾನಗಳನ್ನು ಖರೀದಿಸಲಾಗುತ್ತಿದೆ. ಬೋಯಿಂಗ್ ಸಂಸ್ಥೆ ನಿರ್ಮಿಸಿರುವ ಈ ವಿಮಾನಗಳು ಸೆಪ್ಟೆಂಬರ್ನಲ್ಲಿ ಭಾರತದ ಏರ್ ಇಂಡಿಯಾ ಸಂಸ್ಥೆಗೆ ಹಸ್ತಾಂತರಗೊಳ್ಳುವ ಸಾಧ್ಯತೆ ಇದೆ.
ಅತಿಗಣ್ಯ ವ್ಯಕ್ತಿಗಳ ಓಡಾಟಕ್ಕೆ ಬಳಸಲಾಗುವ ಈ ವಿಮಾನಗಳನ್ನು ಈ ವರ್ಷದ ಜುಲೈನಲ್ಲೇ ಹಸ್ತಾಂತರಿಸಲಾಗುತ್ತದೆ ಎಂದು ಹೇಳಲಾಗುತ್ತಿತ್ತು. ಆದರೆ, ಕೋವಿಡ್-19 ಪಿಡುಗಿನ ಹಿನ್ನೆಲೆಯಲ್ಲಿ ಇದರ ಹಸ್ತಾಂತರದಲ್ಲಿ ವಿಳಂಬವಾಗಿದೆ.
ವಾಯುಪಡೆ ಯೋಧರ ಚಾಲನೆ: ರಾಷ್ಟ್ರಪತಿ, ಉಪರಾಷ್ಟ್ರಪತಿ ಮತ್ತು ಪ್ರಧಾನಿ ಸೇರಿ ಅತಿಗಣ್ಯರ ಓಡಾಟಕ್ಕಾಗಿ ಸದ್ಯ ಏರ್ಇಂಡಿಯಾದ ಬಿ747 ವಿಮಾನಗಳನ್ನು ಬಳಸಲಾಗುತ್ತದೆ. ಈ ವಿಮಾನಗಳನ್ನು ಏರ್ಇಂಡಿಯಾ ಪೈಲಟ್ಗಳೇ ಚಾಲನೆ ಮಾಡುತ್ತಿದ್ದರು. ಏರ್ ಇಂಡಿಯಾ ಒನ್ ಎಂಬ ಕರೆ ಸಂಜ್ಞೆ (Call Sign) ಹೊಂದಿರುವ ಈ ವಿಮಾನವನ್ನು ಏರ್ಇಂಡಿಯಾದ ಉಪಸಂಸ್ಥೆ ಏರ್ ಇಂಡಿಯಾ ಇಂಜಿನಿಯರಿಂಗ್ ಸರ್ವೀಸಸ್ ಲಿಮಿಟೆಡ್ (ಎಐಇಎಸ್ಎಲ್) ನಿರ್ವಹಣೆ ಮಾಡುತ್ತಿತ್ತು. ಅತಿಗಣ್ಯ ವ್ಯಕ್ತಿಗಳು ಬಳಸದಿದ್ದಾಗ ಈ ವಿಮಾನಗಳನ್ನು ವಾಣಿಜ್ಯ ಸಂಚಾರಕ್ಕಾಗಿ ಏರ್ ಇಂಡಿಯಾ ಸಂಸ್ಥೆ ಬಳಸುತ್ತಿತ್ತು.
ಇದನ್ನೂ ಓದಿ: ಮತ್ತೆ ಏರಿಕೆಯಾಯಿತು ಪೆಟ್ರೋಲ್ ದರ: ನಿತ್ಯ ಪರಿಷ್ಕರಣೆ ನಿಯಮ ಮರುಜಾರಿ
ಆದರೆ ಇದೀಗ ಖರೀದಿಸಲಾಗುತ್ತಿರುವ ಎರಡು ಬಿ777 ವಿಮಾನಗಳನ್ನು ವಾಯುಪಡೆಯ ಪೈಲಟ್ಗಳೇ ಚಾಲನೆ ಮಾಡಲಿದ್ದಾರೆ. ಇವುಗಳ ನಿರ್ವಹಣೆಯ ಜವಾಬ್ದಾರಿ ಮಾತ್ರ ಎಐಇಎಸ್ಎಲ್ನದ್ದಾಗಿರುತ್ತದೆ. ಇವು ಕೇವಲ ಅತಿಗಣ್ಯ ವ್ಯಕ್ತಿಗಳ ಸಂಚಾರಕ್ಕೆ ಸೀಮಿತಗೊಳ್ಳಲಿವೆ.
ಕ್ಷಿಪಣಿ ನಿರೋಧಕ ವ್ಯವಸ್ಥೆ: ಅತಿಗಣ್ಯರ ಓಡಾಟಕ್ಕಾಗಿ ಖರೀದಿಸಲಾಗುತ್ತಿರುವ ಎರಡು ಬಿ777 ವಿಮಾನದಲ್ಲಿ ಲಾರ್ಜ್ ಏರ್ಕ್ರಾಫ್ಟ್ ಇನ್ಫ್ರಾರೆಡ್ ಕೌಂಟರ್ಮೆಷರ್ಸ್ (ಎಲ್ಎಐಆರ್ಸಿಎಂ) ಎಂಬ ಕ್ಷಿಪಣಿ ನಿರೋಧಕ ವ್ಯವಸ್ಥೆಯನ್ನು ಅಳವಡಿಸಲಾಗಿದೆ. ಅಷ್ಟೇ ಅಲ್ಲ, ಸ್ವಯಂರಕ್ಷಣ ಸೂಟ್ಗಳನ್ನೂ ಇದು ಒಳಗೊಂಡಿದೆ. ಎರಡು ವಿಮಾನಗಳಲ್ಲಿ ಅಳವಡಿಸಲಾಗುತ್ತಿರುವ ಎಲ್ಎಐಆರ್ಸಿಎಂ ವ್ಯವಸ್ಥೆಯನ್ನು 1,434.72 ಕೋಟಿ ರೂಪಾಯಿ ವೆಚ್ಚದಲ್ಲಿ ಅಮೆರಿಕದಿಂದ ಖರೀದಿಸಲಾಗಿದೆ.
ನೀಲಿಚಿತ್ರಗಳಲ್ಲಿ ಸೌಂದರ್ಯವನ್ನೇ ಬಂಡವಾಳ ಮಾಡಿಕೊಂಡ ಸೂಪರ್ಕಾರ್ ಚಾಲಕಿ!