ಆಗಸ್ಟ್ 4ರಂದು ವಿಪರೀತ ಮಳೆ ಸುರಿಯುತ್ತಿತ್ತು. ರಸ್ತೆಯಲ್ಲೆಲ್ಲ ನೀರು ತುಂಬಿತ್ತು. ಓಡಾಡಲೂ ಆಗುತ್ತಿರಲಿಲ್ಲ. ಅನೇಕ ಮನೆಗಳಿಗೂ ನುಗ್ಗುತ್ತಿತ್ತು. ನನ್ನ ಮನೆಗೂ ನೀರು ಬಂದು ತೊಡಕಾಯಿತು. ಆಗ ನಾನು ಅಲ್ಲಿಯೇ ಇದ್ದ ಮ್ಯಾನ್ಹೋಲ್ ಮುಚ್ಚಳ ತೆಗೆದೆ. ನೀರು ಅದರಲ್ಲಿ ಹೋದರೆ ಸ್ವಲ್ಪ ಅನುಕೂಲ ಆಗಬಹುದು ಎಂದು ಹೀಗೆ ಮಾಡಿದೆ. ಆದರೆ ನಾನು ತೆರೆದಿಟ್ಟು ಬೇರೆ ಕಡೆ ಹೋಗಿಬಿಟ್ಟರೆ ಯಾರಿಗಾದರೂ ಅನಾಹುತ ಆಗಬಹುದು ಎನ್ನಿಸಿತು. ಹಾಗಾಗಿ ಅಲ್ಲೇ ನಿಂತು, ದಾರಿಯಲ್ಲಿ ಬರುತ್ತಿರುವವರನ್ನು ತಡೆಯುತ್ತಿದ್ದೆ. ಸುಮಾರು 7 ತಾಸು ಅಲ್ಲಿಯೇ ಇದ್ದೆ. ನಂತರ ಮಹಾನಗರ ಪಾಲಿಕೆ ಸಿಬ್ಬಂದಿ ಬಂದರು ಎಂದು ಕಾಂತಾ ಮೂರ್ತಿ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
