ಮುಂಬೈ: ಆನ್ಲೈನ್ ತರಗತಿಗೆ ಹೆಚ್ಚಿನ ಗಮನ ನೀಡದ ಮಗಳ ಮೇಲೆ ತಾಯಿಯೊಬ್ಬಳು ಹಲ್ಲೆ ಮಾಡಿರುವ ಘಟನೆ ಮುಂಬೈನಲ್ಲಿ ನಡೆದಿದ್ದು, ಪ್ರಕರಣ ದಾಖಲಾಗಿದೆ.
ಆನ್ಲೈನ್ ತರಗತಿಯಲ್ಲಿ ಶಿಕ್ಷಕರು ಕೇಳಿದ ಪ್ರಶ್ನೆಗೆ ಮಗಳು ಉತ್ತರಿಸಲಿಲ್ಲ ಎಂಬ ಕಾರಣಕ್ಕೆ ಆಕೆಗೆ ಪೆನ್ಸಿಲ್ನಿಂದ ಇರಿದು ಗಾಯಗೊಳಿಸಲಾಗಿದ್ದು, ತಾಯಿಯ ವಿರುದ್ಧ ಸಾಂತಕ್ರುಜ್ ಠಾಣಾ ಪೊಲೀಸರು ದೂರು ದಾಖಲಿಸಿಕೊಂಡಿದ್ದಾರೆ.
ಈ ಘಟನೆ ಬುಧವಾರ ನಡೆದಿದೆ. ಆರನೇ ತರಗತಿ ವಿದ್ಯಾರ್ಥಿನಿ ಆನ್ಲೈನ್ ತರಗತಿಗೆ ಹಾಜರಾಗಿತ್ತು. ಈ ವೇಳೆ ಶಿಕ್ಷಕರು ಕೇಳಿದ ಪ್ರಶ್ನೆಗೆ ಆಕೆ ಉತ್ತರಿಸಲಿಲ್ಲ. ಇದು ತಾಯಿಯ ಕೋಪಕ್ಕೆ ಕಾರಣವಾಗಿದೆ. ತಕ್ಷಣವೇ ಪೆನ್ಸಿಲ್ ತೆಗೆದುಕೊಂಡು ಅನೇಕ ಬಾರಿ ಮಗಳಿಗೆ ಇರಿದಿದ್ದಾಳೆ. ಅಲ್ಲದೆ, ಮನಸಿಗೆ ಬಂದಂತೆ ಕಚ್ಚಿ ಗಾಯಗೊಳಿಸಿದ್ದಾಳೆ. ಇಡೀ ಘಟನೆಯನ್ನು ನೋಡಿದ ಸಂತ್ರಸ್ತೆಯ ಸಹೋದರಿ ಮಕ್ಕಳ ಸಹಾಯವಾಣಿಗೆ ನಂ. 1098ಗೆ ಕರೆ ಮಾಡಿ ಎಲ್ಲವನ್ನು ವಿರಿಸಿದ್ದಾಳೆ.
ಇದನ್ನೂ ಓದಿ: ಮನೆಗೆ ಮರಳಿದ ವಿದ್ಯಾರ್ಥಿನಿಯನ್ನು ಹಿಂಬಾಲಿಸಿದ ದುಷ್ಟರು: ತಂದೆ ಕಣ್ಣೆದುರಲ್ಲೇ ನಡೆಯಿತು ದುರಂತ!
ಮಾಹಿತಿ ತಿಳಿದ ಎನ್ಜಿಒದ ಇಬ್ಬರು ಪ್ರತಿನಿಧಿಗಳು ಸಂತ್ರಸ್ತೆಯ ಮನೆಗೆ ಭೇಟಿ ನೀಡಿ, ಘಟನೆ ಬಗ್ಗೆ ತಾಯಿಯ ವಿವರಣೆ ಕೇಳಿದ್ದಾರೆ. ಆದರೆ, ಯಾವುದೇ ಪ್ರತಿಕ್ರಿಯೆಯನ್ನು ನೀಡದಿದ್ದಾಗ ಆಕೆಯ ವಿರುದ್ಧ ದೂರು ದಾಖಲಿಸಿದ್ದಾರೆ. ಆದರೆ, ಈವರೆಗೂ ಆಕೆಯನ್ನು ಬಂಧಿಸಿಲ್ಲ. (ಏಜೆನ್ಸೀಸ್)