ಮುಂಬೈ: ಭಾರತ ಕ್ರಿಕೆಟ್ ಟೀಂನ ವೇಗದ ಬೌಲರ್ ಮೊಹಮ್ಮದ್ ಶಮಿ ಮತ್ತವರ ಪತ್ನಿ ನಡುವೆ ಸಂಬಂಧ ಚೆನ್ನಾಗಿಲ್ಲ ಎಂಬುದು ಜಗಜ್ಜಾಹೀರಾಗಿದೆ. ಅವರ ಸಂಸಾರದ ಜಗಳ 2018ರಲ್ಲೇ ಬೀದಿಗೆ ಬಂದಿದೆ.
ಮಾಜಿ ರೂಪದರ್ಶಿ, ಡ್ಯಾನ್ಸರ್ ಆಗಿರುವ ಹಸೀನ್ ಜಹಾನ್ ಹಾಗೂ ಮೊಹಮ್ಮದ್ ಶಮಿ ಪ್ರೀತಿಸಿ 2014ರಲ್ಲಿ ಮದುವೆಯಾಗಿದ್ದರು. 2015ರಲ್ಲಿ ಈ ಜೋಡಿಗೆ ಒಂದು ಮುದ್ದಾದ ಹೆಣ್ಣುಮಗುವೂ ಹುಟ್ಟಿದೆ. 2018ರಲ್ಲಿ ಪತಿ ಶಮಿ ವಿರುದ್ಧ ಕೌಟುಂಬಿಕ ದೌರ್ಜನ್ಯದ ಆರೋಪ ಮಾಡಿರುವ ಹಸೀನ್ ಪೊಲೀಸರಿಗೆ ದೂರು ಕೂಡ ನೀಡಿದ್ದರು. ಶಮಿ ಅಕ್ರಮ ಸಂಬಂಧ ಇಟ್ಟುಕೊಂಡಿದ್ದಾರೆ. ನನಗೆ ಮಾನಸಿಕ ಹಾಗೂ ದೈಹಿಕ ಕಿರುಕುಳ ನೀಡುತ್ತಿದ್ದಾರೆ ಎಂದು ಆರೋಪಿಸಿದ್ದರು. ಅಷ್ಟೇ ಅಲ್ಲ, ಕೊಲೆ ಯತ್ನ, ಮ್ಯಾಚ್ಫಿಕ್ಸಿಂಗ್ ಮಾಡಿದ್ದಾರೆ ಎಂದೂ ಹೇಳಿದ್ದರು. ಹಾಗೇ ಶಮಿ ಬೇರೆ ಕೆಲವು ಹುಡುಗಿಯರೊಂದಿಗೆ ನಡೆಸಿದ್ದಾರೆ ಎನ್ನಲಾದ ವಾಟ್ಸ್ಆ್ಯಪ್ ಚಾಟ್ಗಳ ಸ್ಕ್ರೀನ್ಶಾಟ್ಗಳನ್ನೂ ಹಸೀನ್ ಜಹಾನ್ ಬಹಿರಂಗಪಡಿಸಿದ್ದರು.
ಇದನ್ನೂ ಓದಿ: PHOTOS: ಪ್ರಿಯಕರನ ಮೋಸಕ್ಕೆ ಬಲಿಯಾದ ನಟಿ ಚಂದನಾರ ಸಂತೋಷದ ಕ್ಷಣಗಳು…
ಈಗ ಮತ್ತೆ ಇವರಿಬ್ಬರ ವಿಚಾರ ಮುನ್ನೆಲೆಗೆ ಬಂದಿದೆ. ಅದಕ್ಕೆ ಕಾರಣ ಶಮಿ ಪತ್ನಿ ಹಸೀನ್. ತಮ್ಮ ಇನ್ಸ್ಟಾಗ್ರಾಂನಲ್ಲಿ ಪತಿಯೊಂದಿಗೆ ತಾವು ಬೆತ್ತಲೆಯಾಗಿರುವ ಫೋಟೋ ಪೋಸ್ಟ್ ಮಾಡಿಕೊಂಡಿರುವ ಅವರು, ‘ನೀನೇನೂ ಆಗಿರದ ಕಾಲದಲ್ಲಿ ನಾನು ಪರಿಶುದ್ಧವಾಗಿ, ಪವಿತ್ರಳಾಗಿದ್ದೆ. ಈಗ ನೀನು ಏನೋ ಒಂದು ಸ್ಥಾನದಲ್ಲಿದ್ದೀಯಾ. ಹಾಗಾಗಿ ನಾನು ಅಪವಿತ್ರಳೆನಿಸಿಕೊಂಡೆ. ಸುಳ್ಳಿನ ಒಂದು ಹನಿಗೆ ಸತ್ಯವನ್ನೆಂದೂ ಮರೆಮಾಡಲು ಸಾಧ್ಯವಿಲ್ಲ’ ಎಂದು ಕ್ಯಾಪ್ಷನ್ ಬರೆದಿದ್ದಾರೆ. ಹಾಗೇ, ಚಿತ್ರದಲ್ಲಿ ಕ್ರಿಕೆಟರ್ ಮೊಹಮ್ಮದ್ ಶಮಿ ಅವರೊಂದಿಗೆ ಇರುವ ರೂಪದರ್ಶಿ ಹಸೀನ್ ಜಹಾನ್ ಎಂದೂ ಬರೆದುಕೊಂಡಿದ್ದಾರೆ.
ಈ ಫೋಟೋ ಇಂಟರ್ನೆಟ್ನಲ್ಲಿ ಸಂಚಲನ ಸೃಷ್ಟಿಸಿದೆ. ಹಸೀನ್ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ಸಕ್ರಿಯರಾಗಿರುತ್ತಾರೆ. ಪತಿಯ ವಿರುದ್ಧ ಪೋಸ್ಟ್ ಹಾಕುವ ಜತೆಗೆ, ತಮ್ಮದೇ ನೃತ್ಯದ ವಿಡಿಯೋಗಳು, ಫೋಟೋಗಳನ್ನು ಶೇರ್ ಮಾಡುತ್ತಿರುತ್ತಾರೆ.
ಇದನ್ನೂ ಓದಿ: ಪ್ರಿಯಕರನ ವಂಚನೆಯನ್ನು ಫೇಸ್ಬುಕ್ನಲ್ಲೂ ತೋಡಿಕೊಂಡಿದ್ದ ನಟಿ ಚಂದನಾ
ಹಸೀನ್ ಪೋಸ್ಟ್ ಮಾಡಿರುವ ಫೋಟೋ ನೋಡುತ್ತಿದ್ದಂತೆ ಮೊಹಮ್ಮದ್ ಶಮಿಯ ಅಭಿಮಾನಿಗಳು ಆಕೆಯನ್ನು ಸಿಕ್ಕಾಪಟೆ ಟ್ರೋಲ್ ಮಾಡಲು ಶುರು ಮಾಡಿದ್ದಾರೆ. ಹಸೀನ್ ಅವರು ಕ್ರಿಕೆಟರ್ ಶಮಿ ಅವರಿಗೆ ಕಳಂಕ ತರಲು ಏನೇನು ಪ್ರಯತ್ನ ಮಾಡಬೇಕೋ ಅದನ್ನೆಲ್ಲ ಮಾಡುತ್ತಿದ್ದಾರೆ ಎಂದು ವ್ಯಂಗ್ಯವಾಡುತ್ತಿದ್ದಾರೆ. (ಏಜೆನ್ಸೀಸ್)