ನವದೆಹಲಿ: ಭಾನುವಾರ (ನವೆಂಬರ್ 05) ದಕ್ಷಿಣ ಆಫ್ರಿಕಾ ವಿರುದ್ಧ ನಡೆದ ಏಕದಿನ ವಿರ್ಶವಕಪ್ ಪಂದ್ಯದಲ್ಲಿ ಅಮೋಘ ಶತಕ ಬಾರಿಸಿದ ಭಾರತ ಕ್ರಿಕೆಟ್ ತಂಡದ ಸ್ಟಾರ್ ಬ್ಯಾಟ್ಸ್ಮನ್ ವಿರಾಟ್ ಕೊಹ್ಲಿ ಮಾಸ್ಟರ್ ಬ್ಲ್ಯಾಸ್ಟರ್ ಸಚಿನ್ ತೆಂಡುಲ್ಕರ್ ಹೆಸರಿನಲ್ಲಿದ್ದ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಇತ್ತ ಕೊಹ್ಲಿ ನೂತನ ದಾಖಲೆಗೆ ವಿಶ್ವದಾದ್ಯಂತೆ ಶುಭಾಶಯಗಳ ಮಹಾಪೂರವೇ ಹರಿದು ಬರುತ್ತಿದೆ.
ಆದರೆ, ವಿರಾಟ್ ಕೊಹ್ಲಿ ಅವರ 49ನೇ ಶತಕ ಸಾಧನೆಗೆ ಹಾಲಿ, ಮಾಜಿ ಕ್ರಿಕೆಟಿಗರು ಸೇರಿದಂತೆ ವಿವಿಧ ಕ್ಷೇತ್ರದ ಗಣ್ಯರಿಂದ ಶುಭಾಶಯಗಳ ಮಹಾಪೂರವೇ ಹರಿದು ಬರುತ್ತಿದೆ. ಆದರೆ, ಕೊಹ್ಲಿ ಶತಕ ಸಾಧನೆಗೆ ಆಕ್ಷೇಪ ವ್ಯಕ್ತಪಡಿಸಿರುವ ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಮೊಹಮ್ಮದ್ ಹಫೀಜ್ ಸ್ವಾರ್ಥಿ ಎಂದು ಕರೆಯುವ ಮೂಲಕ ತೀವ್ರ ಟೀಕೆಗೆ ಗುರಿಯಾಗಿದ್ದಾರೆ.
ವಿರಾಟ್ ಕೊಹ್ಲಿ ಬ್ಯಾಟಿಂಗ್ ಮಾಡುವ ವೇಳೆ ನಾನು ಅವರಲ್ಲಿ ತುಂಬಿದ್ದ ಸ್ವಾರ್ಥವನ್ನು ನೋಡಿದೆ. ಹಾಲಿ ವಿಶ್ವಕಪ್ ಆವೃತ್ತಿಯಲ್ಲಿ ಮೂರನೇ ಬಾರಿ ಅವರು ಹೀಗೆ ಮಾಡುತ್ತಿರುವುದು. 49ನೇ ಓವರ್ನಲ್ಲಿ ಶತಕ ಗಳಿಸಿದ ಅವರು ತಂಡದ ಪರವಾಗಿ ಆಡಿದಂತೆ ಕಾಣಲಿಲ್ಲ. ಅವರು ದೊಡ್ಡ ಹೊಡೆತಗಳಿಗೆ ಕೈಹಾಕದೆ ಬರೀ ಸಿಂಗಲ್ಸ್ನಲ್ಲಿ ಆಡಿದ್ದನ್ನು ನೋಡಿದರೆ ಇದು ಅವರ ವೈಯಕ್ತಿಕ ಕಾರಣಗಳಿಗೆ ಆಡಿದಂತ್ತಿತ್ತು.
ಇದನ್ನೂ ಓದಿ: ಟೈಮ್ ಔಟ್ ವಿವಾದ; ಬಾಂಗ್ಲಾದಿಂದ ಇಂತಹ ಕೀಳು ಮಟ್ಟದ ಆಟವನ್ನು ನಿರೀಕ್ಷಿಸಿರಲಿಲ್ಲ: ಏಂಜಲೊ ಮ್ಯಾಥ್ಯೂಸ್
ವಿರಾಟ್ ಕೊಹ್ಲಿ ರೋಹಿತ್ ಶರ್ಮಾ ರೀತಿ ಬಿರುಸಿನ ಆಟಕ್ಕೆ ಕೈ ಹಾಕಬೇಕಿತ್ತು. ಒಂದು ಬೇಳ ಹಾಗೆ ಮಾಡಿದ್ದಲ್ಲಿ ಭಾರತ ದಕ್ಷಿಣ ಆಫ್ರಿಕಾದ ವಿರುದ್ಧ ಬೃಹತ್ ಮೊತ್ತವನ್ನು ಪೇರಿಸಬಹುದಿತ್ತು. ವಿರಾಟ್ ಸ್ವಾರ್ಥ ಆಟದಿಂದಾಗಿ ರನ್ಗಳಿಕೆಯಲ್ಲಿ ಭಾರತ ತಂಡ ಹಿಂದೆ ಬಿದ್ದಿತ್ತು ಎಂದು ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಮೊಹಮ್ಮದ್ ಹಫೀಜ್ ತಿಳಿಸಿದ್ದಾರೆ.
ಹಫೀಜ್ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಮಾಜಿ ಕ್ರಿಕೆಟಿಗ ಮೈಕಲ್ ವಾಗನ್, ನೀವು ನೀಡಿರುವ ಹೇಳಿಕೆ ಸಂಪೂರ್ಣ ಅಸಂಬದ್ದವಾಗಿದ್ದು, 8 ತಂಡಗಳ ವಿರುದ್ಧ ಗೆದ್ದಿರುವ ಭಾರತದ ಮೇಲೆ ಈ ರೀತಿ ಮಾಡುವುದು ಸರಿಯಲ್ಲ. ಪಿಚ್ ಹೇಗೆ ವರ್ತಿಸುತ್ತದೋ ಅದಕ್ಕೆ ತಕ್ಕಂತೆ ವಿರಾಟ್ ಕೊಹ್ಲಿ ಆಟವಾಡಿದ್ದಾರೆ. ಈ ರೀತಿ ಹೇಳಿಕೆ ನೀಡುವುದು ನಿಮಗೆ ಶೋಭೆ ತರುವುದಿಲ್ಲ ಎಂದು ಹಫೀಜ್ ಹೇಳಿಕೆಗೆ ತಿರುಗೇಟು ನೀಡಿದ್ದಾರೆ.