ಲಂಡನ್ : ಭಾನುವಾರ (ಜುಲೈ 11) ಲಂಡನ್ನಿನ ವೆಂಬ್ಲೆ ಸ್ಟೇಡಿಯಂನಲ್ಲಿ ನಡೆದ ಯೂರೋ 2020 ಫೈನಲ್ ಫುಟ್ಬಾಲ್ ಪಂದ್ಯ ನೋಡಲು ದಂಡುದಂಡಾಗಿ ಬಂದ ಅಭಿಮಾನಿಗಳು ಆಟದ ವಾತಾವರಣವನ್ನೇ ಬದಲಾಯಿಸಿದ್ದರು. ಇದೀಗ ತಿಳಿದುಬಂದಿರುವ ವಿಚಾರವೆಂದರೆ ಅಂದಿನ ದೊಂಬಿಯಲ್ಲಿ, ಇಂಗ್ಲೆಂಡಿನ ಡಿಫೆಂಡರ್ ಹ್ಯಾರಿ ಮೆಗ್ವೈರ್ರ ತಂದೆಯ ಬೆನ್ನು ಮೂಳೆಗೆ ಏಟು ಬಿದ್ದಿದೆ.
ಇಂದು ಬ್ರಿಟಿಷ್ ಟಾಬ್ಲಾಯ್ಡ್ ದ ಸನ್ಗೆ ಹ್ಯಾರಿ ಮೆಗ್ವೈರ್ ನೀಡಿರುವ ಸಂದರ್ಶನದಲ್ಲಿ ಅವರು ಈ ವಿಷಯ ತಿಳಿಸಿದ್ದಾರೆ. ಭಾನುವಾರ ಇಂಗ್ಲೆಂಡ್ ಮತ್ತು ಇಟಲಿ ನಡುವೆ ನಡೆದ ಅಂತಿಮ ಪಂದ್ಯವನ್ನು ನೋಡಲು ಟಿಕೆಟ್ಟಿಲ್ಲದ ಅಭಿಮಾನಿಗಳು, ಅಕ್ರಮವಾಗಿ ಸ್ಟೇಡಿಯಂನೊಳಗೆ ನುಗ್ಗಿಬಂದ ಪರಿಣಾಮ ಭಾರೀ ಗೊಂದಲ ಮತ್ತು ಹಿಂಸಾಚಾರ ನಡೆದಿತ್ತು ಎನ್ನಲಾಗಿದೆ.
ಇದನ್ನೂ ಓದಿ: ಕಾಂಗ್ರೆಸ್ ಮಾರ್ಗದರ್ಶಕರಾಗುವರೇ… ಚುನಾವಣಾ ತಂತ್ರಗಾರ ಪ್ರಶಾಂತ್ ಕಿಶೋರ್?!
ಆಟಗಾರ ಹ್ಯಾರಿಯ ತಂದೆ ಅಲನ್ ಮಗ್ವೈರ್ (56) ಮತ್ತು ಆತನ ಏಜೆಂಟ್ ಕೆನ್ನೆತ್ ಶೆಫರ್ಡ್ ಕೂಡ ಈ ಹುಚ್ಚೆದ್ದ ಅಭಿಮಾನಿಗಳ ಕಾಲ್ತುಳಿತಕ್ಕೆ ಒಳಗಾದರು. ಅಲನ್ ಅವರ ಎರಡು ಬೆನ್ನು ಮೂಳೆ ಮುರಿದಿದ್ದು, ಉಸಿರಾಟಕ್ಕೆ ತೊಂದರೆ ಉಂಟಾಗಿತ್ತು ಎಂದು ಹ್ಯಾರಿ ತಿಳಿಸಿದ್ದಾರೆ. “ಅದು ಒಳ್ಳೆಯ ಅನುಭವವಾಗಿರಲಿಲ್ಲ, ಭಯಾನಕವಾಗಿತ್ತು. ಫುಟ್ಬಾಲ್ ಮ್ಯಾಚ್ಗೆ ಬಂದಾಗ ಯಾರೂ ಈ ರೀತಿಯ ಅನುಭವವನ್ನು ಹೊಂದಬಾರದೆಂದು ನಾನು ಅಪೇಕ್ಷಿಸುತ್ತೇನೆ” ಎಂದು ಹ್ಯಾರಿ ಮಗ್ವೈರ್ ಹೇಳಿದ್ದಾರೆ.
ವೀಕ್ಷಕರಿಂದ ಹಲವು ದುರ್ವರ್ತನೆಗಳನ್ನು ದಾಖಲಿಸಿದ ಅಂದಿನ ಪಂದ್ಯದ ವೇಳೆಯಲ್ಲಿ, ಲಂಡನ್ ಪೊಲೀಸರು 86 ಜನರನ್ನು ಬಂಧಿಸಿದ್ದಾರೆ. ಹಾಗೂ ಹಲವು ಪೊಲೀಸ್ ಸಿಬ್ಬಂದಿಗಳಿಗೂ ಪೆಟ್ಟು ಬಿದ್ದಿವೆ ಎನ್ನಲಾಗಿದೆ. ಈ ಬಗ್ಗೆ ಯೂರೋಪಿಯನ್ ಫುಟ್ಬಾಲ್ ಆಡಳಿತ ಮಂಡಳಿ ಯುಇಎಫ್ಎ, ಇಂಗ್ಲೆಂಡ್ ಫುಟ್ಬಾಲ್ ಅಸೋಸಿಯೇಷನ್ಅನ್ನು ತರಾಟೆಗೆ ತೆಗೆದುಕೊಂಡಿದ್ದು, ವಿಚಾರಣೆಗೆ ಆದೇಶಿಸಿದೆ ಎನ್ನಲಾಗಿದೆ. (ಏಜೆನ್ಸೀಸ್)