ಬೆಂಗಳೂರು: ಇತ್ತೀಚೆಗೆ ಕೇಂದ್ರ ಸಾರಿಗೆ ಸಚಿವ ನಿತಿನ್ ಗಡ್ಕರಿ ಮುಂದಿನ ಹತ್ತು ವರ್ಷಗಳಲ್ಲಿ ದೇಶದಲ್ಲಿ ಪೆಟ್ರೋಲ್-ಡಿಸೇಲ್ ಮೇಲೆ ಓಡುವ ವಾಹನಗಳು ಇರೊಲ್ಲ ಎಂದು ಹೇಳಿದ್ದರು. ಈಗ ದೇಶದಲ್ಲಿ ಸಿಎನ್ಜಿ ಅಥವಾ ಕಂಪ್ರೆಸ್ಡ್ ನ್ಯಾಚುರಲ್ ಗ್ಯಾಸ್ ಮೇಲೆ ಓಡುವ ಕಾರುಗಳ ಉತ್ಪಾದನೆ ಹೆಚ್ಚಾಗಿದೆ. ದಿನೇ ದಿನೇ ಸಿಎನ್ಜಿ ಮೇಲೆ ಓಡುವ ಕಾರುಗಳ ಪಟ್ಟಿ ಬೆಳೆಯುತ್ತಿದ್ದು ಈಗ ಮಾರುತಿ ಸುಝುಕಿ ತಯಾರು ಮಾಡಿರುವ ಹೊಸ ಕಾರು ಈ ಪಟ್ಟಿಗೆ ಸೇರಿದೆ.
ಮಾರುತಿ ಈ ಹಿಂದೆ ಭಾರತೀಯ ಕಂಪೆನಿಯಾಗಿತ್ತು. ಕೆಲವು ವರ್ಷಗಳ ಹಿಂದೆ ಜಪಾನ್ನ ಸುಝುಕಿ ಕಂಪೆನಿ ಮಾರುತಿಯನ್ನು ಖರೀದಿಸಿತ್ತು. ಸದ್ಯ ಭಾರತದಲ್ಲಿ ಸಿಎನ್ಜಿ ಕಾರುಗಳನ್ನು ತಯಾರಿಸುವಲ್ಲಿ ಮಾರುತಿ ಸುಝುಕಿ ಅಗ್ರ ಸ್ಥಾನದಲ್ಲಿದೆ. ಈಗ ಇದೇ ಕಂಪೆನಿ ಸಿಎನ್ಜಿ ಮೇಲೆ ಓಡುವ ಮತ್ತೊಂದು ಕಾರನ್ನು ತಯಾರಿಸಿದ್ದು ಮಾರುಕಟ್ಟೆಗೂ ಬಿಡುಗಡೆ ಮಾಡಿದೆ.
ಆ ಕಾರು ಯಾವುದು ಕೇಳುತ್ತೀರಾ? ಮಾರುತಿ ಸುಝುಕಿಯ ಬಲೆನೊ ಕಾರು. ಹೌದು, ಈಗ ಕಂಪೆನಿಗಳು ತಮ್ಮ ಪ್ರಮುಖ ಕಾರು ಮಾಡಲ್ಗಳಲ್ಲಿ ಸಿteಎನ್ಜಿ ಇಂಜಿನ್ ಅಳವಡಿಸಿ ಮಾರಾಟ ಮಾಡುತ್ತಿವೆ. ಅದರಂತೆಯೇ ಬಲೆನೊ ಹೆಚ್ ಬ್ಯಾಕ್ ಮಾದರಿಯ ಕಾರು ಈಗ ಸಿಎನ್ಜಿಯಲ್ಲೂ ಲಭ್ಯವಿದೆ. ಅಷ್ಟೇ ಅಲ್ಲದೇ ಬಲೆನೊ ಕಾರಿನ ಡೆಲ್ಟಾ ಮತ್ತು ಜಿಟಾ ವೇರಿಯೆಂಟ್ಗಳೂ ಸಿಎನ್ಜಿ ಮೇಲೆ ಓಡಲು ಸಿದ್ಧವಾಗಿವೆ.
ಡೆಲ್ಟಾ ಮತ್ತು ಜಿಟಾ ವೇರಿಯೆಂಟ್ಗಳು ದೆಹಲಿಯ ಎಕ್ಸ್ ಶೋರೂಂನಲ್ಲಿ 8.20 ಲಕ್ಷ ರೂ. ಅರಂಭಿಕ ಬೆಲೆ ಹೊಂದಿವೆ. ಇದರ ಟಾಪ್ ಎಂಡ್ ಮಾಡೆಲ್ 9.92 ಲಕ್ಷ ರೂ. ಬೆಲೆ ಬಾಳಲಿದೆ. ಇದು ಪೆಟ್ರೋಲ್ ಕಾರುಗಳ ಜೊತೆ ಹೋಲಿಸಿದರೆ ತುಸು ದುಬಾರಿಯೇ ಆಗಿದೆ. ಮಾರುತಿ ಸುಝುಕಿ ಕಂಪೆನಿಯ ನೆಕ್ಸಾ ಕಾರಿನ ಮಾದರಿಯಲ್ಲೇ ಬಲೆನೊ ಕಾರು ಇದೇ ಮೊದಲ ಬಾರಿಗೆ ಸಿಎನ್ಜಿ ಎಂಜಿನ್ನೊಂದಿಗೆ ಬಿಡುಗಡೆ ಆಗಿದೆ. ಇದು ಬಲೆನೊನ ಪೆಟ್ರೋಲ್ ಕಾರಿಗಿಂತ 95 ಸಾವಿರ ರೂ. ಜಾಸ್ತಿ ಬೆಲೆ ಹೊಂದಿರಲಿದೆ.
ಈ ಕಾರು 5 ಗೇರ್ಗಳನ್ನು ಹೊಂದಿದ್ದು ಇವು ಮ್ಯಾನ್ಯುವಲ್ ಆಗಿರುತ್ತವೆ. ಈ ಕಾರು 76 ಬಿಎಚ್ಪಿ ಮತ್ತು 98.5 ಎನ್ಎಂಪಿ ಟಾರ್ಕ್ ಉತ್ಪಾದನೆ ಮಾಡುತ್ತದೆ. ಈ ಮೂಲಕ ಪ್ರತಿ ಕೆಜಿ ಸಿಎನ್ಜಿಗೆ ಹೊಸ ಬಲೆನೊ ಕಾರು ಗರಿಷ್ಟ 30.6 ಕಿ.ಮೀ ಮೈಲೇಜ್ ನೀಡುತ್ತದೆ.
ಈ ಕಾರಿನ ವಿನ್ಯಾಸ ಬಹುತೇಕ ಪೆಟ್ರೋಲ್ ಕಾರಿನಂತೆಯೆ ಇದೆ. ಹೊಸ ಕಾರಿನಲ್ಲಿ ಎಲ್.ಇ.ಡಿ ಪ್ರೊಜೆಕ್ಟರ್ ಹೆಡ್ ಲ್ಯಾಂಪ್, ಆ್ಯಪಲ್ ಕಾರ್ ಪ್ಲೇ, 7 ಇಂಚಿನ ಇಂಪೊಟೈನ್ ಸಿಸ್ಟಮ್, ಆಂಡ್ರಾಯಿಡ್ ಅಟೋ ಕನೆಕ್ಟಿವಿಟಿ, ವಾಯ್ಸ್ ಅಸಿಸ್ಟ್ ಮತ್ತು ಸ್ಟಾಪ್ ಬಟನ್ ಸೌಲಭ್ಯಗಳನ್ನು ನೀಡಿದೆ.
ಕಾರಿನಲ್ಲಿ ಸುರಕ್ಷತೆಗಾಗಿ ಎಬಿಎಸ್ ಜೊತೆಗೆ ಇಬಿಡಿ, ಆರು ಏರ್ ಬ್ಯಾಗ್ಗಳನ್ನು ನೀಡಲಾಗಿದ್ದು ರೇರ್ವ್ಯೂ ಕ್ಯಾಮರಾ, ರೇರ್ ಪಾರ್ಕಿಂಗ್ ಸೆನ್ಸರ್ ಪವರ್ ವಿಂಡೋ ನೀಡಿದೆ. ಸದ್ಯ ಭಾರತದಲ್ಲಿ ಸಿಎನ್ಜಿ ಕಾರುಗಳ ಮಾರಾಟದಲ್ಲಿ ಮಾರುತಿ ಸುಝುಕಿ ಪ್ರಥಮ ಸ್ಥಾನ ಕಾಯ್ದುಕೊಂಡಿದ್ದು ಒಂದು ಮಿಲಿಯನ್ಗೂ ಹೆಚ್ಚಿನ ಕಾರುಗಳನ್ನು ಮಾರಾಟ ಮಾಡಿದೆ.