ಚೆನ್ನೈ: ಶಂಕರ್ ಮತ್ತು ಲೈಕಾ ಪ್ರೊಡಕ್ಷನ್ಸ್ ನಡುವಿನ ಗಲಾಟೆ ದಿನದಿಂದ ದಿನಕ್ಕೆ ಹೊಸ ತಿರುವು ಪಡೆಯುತ್ತಿದೆ. ಇದೀಗ ಲೈಕಾ ಪ್ರೊಡಕ್ಷನ್ಸ್ ಸಂಸ್ಥೆಯು, ಆಂಧ್ರ ಮತ್ತು ಮಹಾರಾಷ್ಟ್ರ ಫಿಲ್ಮ್ ಚೇಂಬರ್ಗಳಿಗೆ ಪತ್ರ ಬರೆದಿದ್ದು, ಇಂಡಿಯನ್ 2 ಚಿತ್ರವನ್ನು ಮುಗಿಸುವ ಮುನ್ನ ಬೇರೆ ಚಿತ್ರಗಳನ್ನು ನಿರ್ದೇಶಿಸುವುದಕ್ಕೆ ನಿರ್ದೇಶಕ ಶಂಕರ್ಗೆ ಅನುಮತಿ ನೀಡಬಾರದು ಎಂದು ಮನವಿ ಮಾಡಿದೆ.
ಇದನ್ನೂ ಓದಿ: ಶ್ರೇಯಸ್ ತಲ್ಪಾಡೆ ಮದುವೆಯಾದರೂ ಮುಚ್ಚಿಟ್ಟಿದ್ದು ಏಕೆ?
ಕಮಲ್ ಹಾಸನ್ ಅಭಿನಯದ ಇಂಡಿಯನ್ 2 ಚಿತ್ರವನ್ನು ಶಂಕರ್ ನಿರ್ದೇಶನದಲ್ಲಿ ಲೈಕಾ ಪ್ರೊಡಕ್ಷನ್ಸ್ ಸಂಸ್ಥೆ ನಿರ್ಮಿಸುತ್ತಿರುವುದು ಗೊತ್ತೇ ಇದೆ. ಈ ಚಿತ್ರದ ಚಿತ್ರೀಕರಣ ಒಂದೂವರೆ ವರ್ಷಗಳ ಹಿಂದೆಯೇ ಪ್ರಾರಂಭವಾಗಿತ್ತು. ಕಳೆದ ವರ್ಷದ ಆರಂಭದಲ್ಲಿ ಚಿತ್ರದಲ್ಲೊಂದು ಅವಘಡವಾಗಿ ಮೂರು ಜನ ಮೃತಪಟ್ಟಿದ್ದರು. ಅದರಿಂದ ಚಿತ್ರೀಕರಣ ನಿಂತಿತ್ತು. ಆ ನಂತರ ಲಾಕ್ಡೌನ್ನಿಂದ ಚಿತ್ರ ಇನ್ನಷ್ಟು ವಿಳಂಬವಾಯಿತು. ತಮಿಳುನಾಡು ಚುನಾವಣೆಗಳಲ್ಲಿ ಕಮಲ್ ಹಾಸನ್ ಅವರು ಸ್ಪರ್ಧಿಸಿದ್ದರಿಂದ, ಚಿತ್ರ ಮತ್ತಷ್ಟು ವಿಳಂಬವಾಯಿತು.
ಒಂದು ಕಡೆ ಚಿತ್ರ ವಿಳಂಬವಾಗುತ್ತಿದ್ದಂತೆಯೇ ಶಂಕರ್ ಬೇರೆ ಚಿತ್ರಗಳನ್ನು ನಿರ್ದೇಶಿಸುವುದಾಗಿ ಘೋಷಿಸಿದರು. ರಾಮ್ಚರಣ್ ತೇಜ ಅಭಿನಯದಲ್ಲೊಂದು ತೆಲುಗು ಚಿತ್ರ, ರಣವೀರ್ ಸಿಂಗ್ ಅಭಿನಯದಲ್ಲಿ ಹಿಂದಿಯಲ್ಲಿ ಅನ್ನಿಯನ್ ರೀಮೇಕ್ … ಹೀಗೆ ಎರಡು ಚಿತ್ರಗಳನ್ನು ನಿರ್ದೇಶಿಸುವುದಾಗಿ ಘೋಷಿಸಿದರು ಶಂಕರ್. ಒಂದು ಈ ವರ್ಷ, ಮತ್ತೊಂದನ್ನು ಮುಂದಿನ ವರ್ಷ ಮಾಡುವುದಾಗಿ ಅವರು ಹೇಳಿದ್ದರು.
ಈ ಎರಡು ಚಿತ್ರಗಳನ್ನು ಕೈಗೆತ್ತಿಗೊಂಡರೆ, ಇಂಡಿಯನ್ 2 ಚಿತ್ರ ವಿಳಂಬವಾಗುತ್ತದೆ ಎಂಬ ಕಾರಣಕ್ಕೆ ಲೈಕಾ ಪ್ರೊಡಕ್ಷನ್ಸ್ ಸಂಸ್ಥೆಯು ನ್ಯಾಯಾಲಯದ ಮೆಟ್ಟಿಲೇರಿತ್ತು. ಆದರೆ, ನ್ಯಾಯಾಲಯವು ಈ ಪ್ರಕರಣವನ್ನು ಪರಸ್ಪರ ಬಗೆಹರಿಸಿಕೊಳ್ಳುವುದಕ್ಕೆ ಸೂಚಿಸಿತ್ತು. ನ್ಯಾಯಾಲಯವು ಹೀಗೆ ಹೇಳಿದ ಮೇಲೆ, ಆಂಧ್ರ ಮತ್ತು ಮಹಾರಾಷ್ಟ್ರ ಫಿಲ್ಮ್ ಚೇಂಬರ್ಗಳಿಗೆ ಲೈಕಾ ಪ್ರೊಡಕ್ಷನ್ಸ್ ಸಂಸ್ಥೆಯು ಪತ್ರ ಬರೆದಿದೆ., ಇಂಡಿಯನ್ 2 ಚಿತ್ರವನ್ನು ಮುಗಿಸುವ ಮುನ್ನ ಬೇರೆ ಚಿತ್ರಗಳನ್ನು ನಿರ್ದೇಶಿಸುವುದಕ್ಕೆ ನಿರ್ದೇಶಕ ಶಂಕರ್ಗೆ ಅನುಮತಿ ನೀಡಬಾರದು ಎಂದು ಮನವಿ ಮಾಡಿದೆ.
ಇದನ್ನೂ ಓದಿ: ಚಿತ್ರರಂಗದವರಿಗೆ ಲಸಿಕೆ ವಿತರಿಸಲು ಫಿಲ್ಮ್ ಚೇಂಬರ್ ಮನವಿ
ಲೈಕಾ ಪ್ರೊಡಕ್ಷನ್ಸ್ ಮನವಿಗೆ ಆಂಧ್ರ ಮತ್ತು ಮಹಾರಾಷ್ಟ್ರ ಫಿಲ್ಮ್ ಚೇಂಬರ್ಗಳು ಸದ್ಯಕ್ಕೆ ಯಾವುದೇ ಉತ್ತರವನ್ನು ನೀಡಿಲ್ಲ. ಈ ಮನವಿಗೆ ಯಾವ ರೀತಿ ಸ್ಪಂದನೆ ಸಿಗುತ್ತದೆ ಎಂದು ಇನ್ನಷ್ಟೇ ಕಾದು ನೋಡಬೇಕಿದೆ.