ನವದೆಹಲಿ: ಬಾರ್ಸಿಲೋನಾ ಫುಟ್ಬಾಲ್ ತಂಡದ ನಾಯಕ ಹಾಗೂ ವಿಶ್ವದಲ್ಲೇ ಅತಿಹೆಚ್ಚು ಶುಲ್ಕ ಪಡೆದುಕೊಳ್ಳುವ ಆಟಗಾರ ಲಿಯೋನೆಲ್ ಮೆಸ್ಸಿ ಕರೊನಾ ವೈರಾಣು ಸೋಂಕಿನಿಂದ ದೂರುವುಳಿಯಲು ತಮಗೆ ಹಾಗೂ ತಮ್ಮ ಕುಟುಂಬವರ್ಗದವರಿಗಾಗಿ ವಿಶೇಷವಾದ ಹಾಸಿಗೆಯನ್ನು ಖರೀದಿಸಿದ್ದಾರೆ. ಇದರ ಬೆಲೆ ಕೇವಲ 88 ಸಾವಿರ ರೂ. ಎಂದು ಹೇಳಲಾಗುತ್ತಿದೆ.
ಇತರೆ ಫುಟ್ಬಾಲ್ ಆಟಗಾರರಂತೆ ಕೋವಿಡ್-19 ಪಿಡುಗಿನ ಸಂದರ್ಭದಲ್ಲಿ ಲಿಯೋನೆಲ್ ಮೆಸ್ಸಿ ಕೂಡ ತಮ್ಮ ಹಾಗೂ ತಮ್ಮ ಕುಟುಂಬದವರ ಸುರಕ್ಷತೆಗೆ ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ. ಕಳೆದ ಜುಲೈನಿಂದ ಪುಟ್ಬಾಲ್ ಪಂದ್ಯಗಳು ಆರಂಭವಾಗಿರುವ ಹಿನ್ನೆಲೆಯಲ್ಲಿ ಮೆಸ್ಸಿ ಕೂಡ ತಮ್ಮ ಕಾಲ್ಚಳಕ ತೋರಲು ಮೈದಾನಕ್ಕೆ ಇಳಿಯಲಾರಂಭಿಸಿದ್ದಾರೆ. ಹೀಗಿರುವಾಗ ತಮ್ಮ ಹಾಗೂ ತಮ್ಮವರ ಸುರಕ್ಷತೆಗಾಗಿ ಮೆಸ್ಸಿ ಸೂಕ್ತ ಮುನ್ನೆಚ್ಚರಿಕೆ ವಹಿಸುವುದು ಅನಿವಾರ್ಯವಾಗಿದೆ.
ಇದನ್ನೂ ಓದಿ: ಡ್ರಗ್ಸ್ ಪೆಡ್ಲರ್ಸ್ ವಿರುದ್ಧ ಸಿಸಿಬಿ ಸಮರ, ಕೊಕೇನ್ ಮಾರುತ್ತಿದ್ದ ನೈಜೀರಿಯಾ ಪ್ರಜೆಗಳಿಬ್ಬರ ಬಂಧನ
ಈ ಹಿನ್ನೆಲೆಯಲ್ಲಿ ಅವರು 88 ಸಾವಿರ ರೂ. ಮೌಲ್ಯದ ಹಾಸಿಗೆಯನ್ನು ಖರೀದಿಸಿದ್ದಾರೆ. ಟೆಕ್ ಮೂನ್ ಎಂಬ ಕಂಪನಿ ಈ ಕೋವಿಡ್ ಹಾಸಿಗೆಯನ್ನು ತಯಾರಿಸುತ್ತಿದೆ. ಈ ಹಾಸಿಗೆಯ ಮೇಲೆ ನಾಲ್ಕು ತಾಸು ಮಲಗಿದರೆ ವ್ಯಕ್ತಿಯ ದೇಹದಲ್ಲಿರುವ ಕೋವಿಡ್-19 ವೈರಾಣು ಅಲ್ಲದೆ, ಎಲ್ಲ ಬಗೆಯ ವೈರಾಣುಗಳನ್ನು ಸ್ವಚ್ಛಗೊಳಿಸುತ್ತದೆ ಎಂದು ಹೇಳಲಾಗುತ್ತಿದೆ.
ಈ ಹಾಸಿಗೆಯಲ್ಲಿ ವೈರುಕ್ಲೀನ್ ಎಂಬ ತಂತ್ರಜ್ಞಾನವನ್ನು ಬಳಸಲಾಗಿದೆ. ಈ ಹಾಸಿಗೆಯ ಪ್ರತಿಯೊಂದು ಎಳೆಗಳಲ್ಲಿ ನ್ಯಾಯೋಪಾರ್ಟಿಕಲ್ಸ್ ಅನ್ನು ಅಳವಡಿಸಲಾಗಿದ್ದು, ಶೇ.99 ವೈರಾಣುಗಳು ಮತ್ತು ಅಪಾಯಕಾರಿ ಕೀಟಾಣುಗಳನ್ನು ಸ್ವಚ್ಛಗೊಳಿಸುತ್ತದೆ ಎಂದು ವಿವರಿಸಲಾಗಿದೆ.
ಫುಟ್ಬಾಲ್ ಒಂದು ತಂಡ ಕ್ರೀಡೆಯಾಗಿದೆ. ಈ ಕ್ರೀಡೆಯಲ್ಲಿ ಆಟಗಾರರು ಪರಸ್ಪರ ಮೈಕೈ ತಾಗಿಸಿಕೊಳ್ಳುವ ಸಾಧ್ಯತೆ ಹೆಚ್ಚಾಗಿರುತ್ತದೆ. ಈ ಹಿನ್ನೆಲೆಯಲ್ಲಿ ಪ್ರತಿ ಪಂದ್ಯಕ್ಕೂ ಮುನ್ನ ಆಟಗಾರರ ಆರೋಗ್ಯವನ್ನು ಆಮೂಲಾಗ್ರವಾಗಿ ಪರಿಶೀಲಿಸಲಾಗುತ್ತದೆ. ಕೋವಿಡ್-19 ಟೆಸ್ಟ್ಗಳನ್ನು ಕಡ್ಡಾಯವಾಗಿ ಮಾಡಿಸಲಾಗುತ್ತದೆ. ಇದರ ಜತೆಗೆ ಮೆಸ್ಸಿ ತಮ್ಮ ಹಾಗೂ ತಮ್ಮ ಕುಟುಂಬ ವರ್ಗದವರ ಹೆಚ್ಚುವರಿ ಸುರಕ್ಷತೆಗಾಗಿ ಕೋವಿಡ್-19 ನಿರೋಧಕ ಹಾಸಿಗೆಯನ್ನು ಬಳಸುತ್ತಿದ್ದಾರೆ.
ಶಾಂತಿ ಮಂತ್ರ ಪಠನೆ ಆರಂಭಿಸಿದ ಚೀನಾ; ಎರಡೂ ರಾಷ್ಟ್ರಗಳಿಗೆ ಯುದ್ಧ ಇಷ್ಟವಿಲ್ಲ…