ನವದೆಹಲಿ: ಕೋವಿಡ್ ಲಾಕ್ಡೌನ್ನಿಂದಾಗಿ ದೇಶದಾದ್ಯಂತ ಚಿತ್ರಮಂದಿರಗಳು, ಚಿತ್ರೀಕರಣ ಕಾರ್ಯಗಳು ಸೇರಿ ಸಿನಿ ಚಟುವಟಿಕೆ ಸಂಪೂರ್ಣವಾಗಿ ಸ್ತಬ್ಧಗೊಂಡಿದೆ. ಇದರಿಂದಾಗಿ ಒಪ್ಪತ್ತಿನ ಊಟಕ್ಕೂ ಚಿತ್ರರಂಗವನ್ನೇ ನೆಚ್ಚಿಕೊಂಡಿರುವ ಸಿನಿಕಾರ್ಮಿಕರು ಪರದಾಡುತ್ತಿದ್ದಾರೆ. ಇವರ ಸಂಕಷ್ಟವನ್ನು ಅರ್ಥ ಮಾಡಿಕೊಂಡಿದ್ದು, ಇವರಿಗೆ ನೆರವಾಗುವ ಉದ್ದೇಶದಿಂದ ಬಾಲಿವುಡ್ ಮಂದಿ ತಮ್ಮ ಚಿತ್ರಗಳನ್ನು ವೆಬ್ನಲ್ಲಿ ಬಿಡುಗಡೆ ಮಾಡಲು ಮುಂದಾಗುತ್ತಿದ್ದಾರೆ.
ಲಾಕ್ಡೌನ್ ತೆರವಾದ ನಂತರದಲ್ಲೂ ತಕ್ಷಣವೇ ಚಿತ್ರಮಂದಿರಗಳು ತೆರೆಯುವ ಸಾಧ್ಯತೆ ಕಡಿಮೆ ಇದೆ. ಈ ಹಿನ್ನೆಲೆಯಲ್ಲಿ ಈಗಾಗಲೆ ಬಿಡುಗಡೆ ದಿನಾಂಕ ನಿಗದಿಪಡಿಸಿಕೊಂಡಿದ್ದರೂ ಚಿತ್ರಗಳನ್ನು ಬಿಡುಗಡೆ ಮಾಡಲು ಸಾಧ್ಯವಾಗುವುದಿಲ್ಲ. ಈ ಹಿನ್ನೆಲೆಯಲ್ಲಿ ವೆಬ್ ಮೂಲಕವೇ ಚಿತ್ರವನ್ನು ಬಿಡುಗಡೆ ಮಾಡಿ, ಬರುವ ಹಣವನ್ನು ಸಿನಿಕಾರ್ಮಿಕರ ನೆರವಿಗೆ ಕೊಡುವುದು ಬಾಲಿವುಡ್ ಮಂದಿಯ ನಿರ್ಧಾರ ಎನ್ನಲಾಗಿದೆ.
ವೆಬ್ನಲ್ಲಿ ಬಿಡುಗಡೆಗೊಂಡ ಮೊದಲ ಚಿತ್ರ ಎಂಬ ಹೆಗ್ಗಳಿಕೆ ಅಕ್ಷಯ್ ಕುಮಾರ್ ಮತ್ತು ಕಿಯಾರಾ ಅಡ್ವಾಣಿ ಮುಖ್ಯಭೂಮಿಕೆಯಲ್ಲಿರುವ ಲಕ್ಷ್ಮೀ ಬಾಂಬ್ ಚಿತ್ರದ್ದಾಗುವ ಸಾಧ್ಯತೆ ಹೆಚ್ಚಾಗಿದೆ. ತಮಿಳಿನ ಮುನಿ2: ಕಾಂಚನಾ ಚಿತ್ರದ ರಿಮೇಕ್ ಇದಾಗಿದೆ.
ಎಲ್ಲ ಅಂದುಕೊಂಡಂತೆ ಆಗಿದ್ದರೆ ಈ ಚಿತ್ರ ಮೇ 22ರಂದು ದೇಶಾದ್ಯಂತ ಬಿಡುಗಡೆಯಾಗಬೇಕಿತ್ತು. ಆದರೆ ಲಾಕ್ಡೌನ್ ಹಾಗೂ ಲಾಕ್ಡೌನ್ ತೆರವು ನಂತರದಲ್ಲಿ ಚಿತ್ರಮಂದಿರಗಳು ತಕ್ಷಣವೇ ತೆರೆಯುವ ಸಾಧ್ಯತೆಗಳಿಲ್ಲದ ಕಾರಣ, ವೆಬ್ನಲ್ಲೇ ಈ ಚಿತ್ರವನ್ನು ಬಿಡುಗಡೆ ಮಾಡಲು ಚಿತ್ರದ ನಿರ್ಮಾಪಕರು ನಿರ್ಧರಿಸಿದ್ದಾರೆ ಎನ್ನಲಾಗಿದೆ. ಈ ಚಿತ್ರವೇನಾದರೂ ವೆಬ್ ಬಿಡುಗಡೆಯಲ್ಲಿ ಭಾರಿ ಯಶಸ್ಸು ದಾಖಲಿಸಿದರೆ, ಇನ್ನೂ ಹಲವು ಚಿತ್ರಗಳು ವೆಬ್ನಲ್ಲೇ ಬಿಡುಗಡೆಯಾಗುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಅಜ್ಜಿಯ ಬೇಸರ ನೀಗಿಸಲು ಡಾನ್ಸ್ ಮಾಡಿದ ಮೊಮ್ಮಗ, ಟಿಕ್ಟಾಕ್ನಲ್ಲಿ ಭಾರಿ ವೈರಲ್; ಇದನ್ನು ವೀಕ್ಷಿಸಿದವರ ಸಂಖ್ಯೆ ಎಷ್ಟು ಗೊತ್ತಾ?