ಬರ್ಲಿನ್: ಜಗತ್ತಿನಾದ್ಯಂತ ಕರೊನಾ ವೈರಸ್ ಭಯ. ರಾಷ್ಟ್ರನಾಯಕರೂ ಸಹ ಆದಷ್ಟು ಜನಸಂಪರ್ಕದಿಂದ ದೂರವೇ ಉಳಿಯಲು ಪ್ರಯತ್ನಿಸುತ್ತಿದ್ದಾರೆ. ಸಭೆ, ಸಮಾರಂಭಗಳಲ್ಲಿ ಪಾಲ್ಗೊಳ್ಳುತ್ತಿಲ್ಲ.
ಈ ಮಧ್ಯೆ ಥೈಲ್ಯಾಂಡ್ ರಾಜ ತಾನು ಐಸೋಲೇಟ್ ಆಗಬೇಕು, ಕರೊನಾ ಬಾರದಂತೆ ಮುನ್ನೆಚ್ಚರಿಕೆ ಕ್ರಮವಾಗಿ ಸಾರ್ವಜನಿಕರಿಂದ ಅಂತರ ಕಾಯ್ದುಕೊಳ್ಳಬೇಕು ಎಂಬ ಕಾರಣಕ್ಕೆ ದೇಶವನ್ನೇ ಬಿಟ್ಟು ಹೋಗಿದ್ದಾರೆ..ಅದೂ 20 ಮಹಿಳೆಯರೊಂದಿಗೆ !
ಥೈಲ್ಯಾಂಡ್ ರಾಜ ಮಹಾ ವಾಜಿರಲಾಂಗ್‌ಕಾರ್ನ್ ಜರ್ಮನಿಗೆ ಹೋಗಿದ್ದಲ್ಲದೆ, ಒಂದಿಡೀ ಐಷಾರಾಮಿ ಹೋಟೆಲ್ನ್ನು ತಮಗೋಸ್ಕರ ಬುಕ್ ಮಾಡಿಕೊಂಡಿದ್ದಾರೆ. ಆ ಹೋಟೆಲ್ನಲ್ಲಿ 20 ಮಹಿಳೆಯರೊಂದಿಗೆ ಐಸೋಲೇಟ್ ಆಗಿದ್ದಾರೆ.
ಜರ್ಮನಿಯಲ್ಲಿ ಲಾಕ್ಡೌನ್ ಇದ್ದರೂ ಥೈಲ್ಯಾಂಡ್ ರಾಜನಿಗೆ ಜರ್ಮನಿಯ ಬವೇರಿಯಾದಲ್ಲಿರುವ ಸೊನ್ನೆನ್‌ಬಿಚ್ಲ್ ಗ್ರ್ಯಾಂಡ್ ಹೋಟೆಲ್ನಲ್ಲಿ ಮಹಿಳೆಯರೊಂದಿಗೆ ಇರಲು ವಿಶೇಷ ಅನುಮತಿ ನೀಡಲಾಗಿದೆ ಎಂದು ಅಲ್ಲಿನ ಮಾಧ್ಯಮ ವರದಿ ಮಾಡಿದೆ.
ಜರ್ಮನಿಯ ಟ್ಯಾಬ್ಲಯ್ಡ್ ಪತ್ರಿಕೆಯೊಂದು ವರದಿ ಮಾಡಿರುವ ಪ್ರಕಾರ ಥೈಲ್ಯಾಂಡ್ನ ರಾಜ 20 ಮಹಿಳೆಯರು ಹಾಗೂ ಕೆಲವು ಸೇವಕರೊಂದಿಗೆ ಜರ್ಮನಿಗೆ ಆಗಮಿಸಿದ್ದಾರೆ.
ಥೈಲ್ಯಾಂಡ್ನ ಈ ರಾಜ ಮಹಾ ವಾಜಿರಲಾಂಗ್‌ಕಾರ್ನ್ ಅವರು ತಮ್ಮೊಂದಿಗೆ ಹೆಚ್ಚಿನ ಕೆಲಸಗಾರರನ್ನು ಕರೆತರಲು ಯೋಜನೆ ಹಾಕಿಕೊಂಡಿದ್ದರಂತೆ. ಆದರೆ 119 ಜನರಲ್ಲಿ ಕರೊನಾ ಲಕ್ಷಣಗಳು ಕಂಡುಬಂದಿದ್ದರಿಂದ ಅವರನ್ನೆಲ್ಲ ಮನೆಗೆ ಕಳಿಸಿ, ಉಳಿದವರೊಂದಿಗೆ ಜರ್ಮನಿಗೆ ಆಗಮಿಸಿದ್ದಾರೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ರಾಜ ಜರ್ಮನಿಯಲ್ಲಿ ಸೆಲ್ಫ್ ಐಸೋಲೇಟ್ ಆದ ಸುದ್ದಿ ಹೊರಬರುತ್ತಿದ್ದಂತೆ ಥೈಲ್ಯಾಂಡ್ನ ಜನರು ಟ್ವಿಟರ್ನಲ್ಲಿ ಸಿಕ್ಕಾಪಟೆ ಟೀಕೆ ಮಾಡುತ್ತಿದ್ದಾರೆ. ಕೋಪವನ್ನು ಹೊರಹಾಕುತ್ತಿದ್ದಾರೆ. #whydoweneedaking (ಇಂತಹ ರಾಜ ನಮಗೇಕೆ ಬೇಕು?) ಎಂಬ ಹ್ಯಾಷ್ಟ್ಯಾಗ್ನಡಿ ರಾಜನನ್ನು ದೂಷಿಸುತ್ತಿದ್ದಾರೆ. #whydoweneedaking ಹ್ಯಾಷ್ಟ್ಯಾಗ್ ಟ್ವಿಟರ್ನಲ್ಲಿ ಟ್ರೆಂಡ್ ಆಗಿದೆ.
ಥೈಲ್ಯಾಂಡ್ನಲ್ಲಿ ರಾಜಮನೆತನದ ವಿರುದ್ಧ ಮಾತನಾಡುವುದು ಗಂಭೀರ ಅಪರಾಧ. ಕಟ್ಟುನಿಟ್ಟಿನ ಕಾನೂನು ಹೊಂದಿರುವ ವಿಶ್ವದ ಕೆಲವೇ ರಾಷ್ಟ್ರಗಳಲ್ಲಿ ಥೈಲ್ಯಾಂಡ್ ಕೂಡ ಒಂದು. ಈ ಕಾನೂನಿನ ಅನ್ವಯ ಅಲ್ಲಿನ ರಾಜ ಅಥವಾ ರಾಣಿಯ ವಿರುದ್ಧ ನಿಂದನೆ, ಅಪವಾದ, ಕೆಟ್ಟ ಮಾತುಗಳನ್ನು ಆಡುವಂತಿಲ್ಲ. ಆದರೆ ಸದ್ಯ ಥೈಲ್ಯಾಂಡ್ ದೇಶಿಗರು ರಾಜನ ವಿರುದ್ಧ ತಿರುಗಿಬಿದ್ದಿದ್ದಾರೆ.
ರಾಜ ಮಹಾ ವಾಜಿರಲಾಂಗ್‌ಕಾರ್ನ್ ಜರ್ಮನಿಗೆ ಪದೇಪದೆ ಹೋಗುತ್ತಾರೆ. ಹಾಗೇ ಇದೇ ಹೋಟೆಲ್ನಲ್ಲಿಯೇ ಇರುತ್ತಾರೆ. ಅಲ್ಲಿನ ಲೇಕ್ ಸ್ಟಾರ್ನ್‌ಬರ್ಗ್ ಬಳಿ ಅವರಿಗೆ ಆಸ್ತಿಯೂ ಇದೆ.
ಆದರೆ ಥೈಲ್ಯಾಂಡ್ನಲ್ಲೂ ಕರೊನಾ ಹರಡುತ್ತಿದೆ. 1524 ಜನ ಸೋಂಕಿತರು ಇದ್ದು, 9 ಜನ ಸಾವನ್ನಪ್ಪಿದ್ದಾರೆ. ಹೀಗಿರುವಾಗ ರಾಜ ದೇಶವನ್ನೇ ಬಿಟ್ಟು ಹೋಗಿದ್ದು ಅಲ್ಲಿನ ಜನರ ಆಕ್ರೋಶಕ್ಕೆ ಕಾರಣವಾಗಿದೆ. (ಏಜೆನ್ಸೀಸ್)
