ಚೆನ್ನೈ: ಕೆಲವು ದಿನಗಳ ಹಿಂದಷ್ಟೇ ತಮ್ಮ ನಿರ್ದೇಶನದ ‘ಎಮರ್ಜೆನ್ಸಿ’ ಚಿತ್ರದ ಚಿತ್ರೀಕರಣವನ್ನು ಯಶಸ್ವಿಯಾಗಿ ಮುಗಿಸಿದ್ದರು ಬಾಲಿವುಡ್ ನಟಿ ಕಂಗನಾ ರಣಾವತ್. ಆ ಚಿತ್ರಕ್ಕಾಗಿ ಏನೆಲ್ಲ ಕಷ್ಟ ಪಡಬೇಕಾಯಿತು ಎಂಬುದನ್ನು ಬಹಿರಂಗಪಡಿಸಿದ್ದರು. ಆದರೆ, ಆ ಚಿತ್ರದ ನಂತರ ಮುಂದೇನು ಎಂಬ ವಿಷಯವನ್ನು ಹೇಳಿಕೊಂಡಿರಲಿಲ್ಲ.
ಇದನ್ನೂ ಓದಿ: ಡಾ. ವಿಷ್ಣು ಸ್ಮಾರಕ; ಚಿತ್ರರಂಗಕ್ಕೆ ಹೆಮ್ಮೆಯ ವಿಷಯ ಎಂದ ಶಿವರಾಜಕುಮಾರ್
ಈಗ ಅವರು ತಮ್ಮ ಮುಂದಿನ ಚಿತ್ರದ ಬಗ್ಗೆ ಮಾತನಾಡಿದ್ದಾರೆ. ಅಷ್ಟೇ ಅಲ್ಲ, ಆ ಚಿತ್ರದ ಹಾಡಿನ ರಿಹರ್ಸಲ್ನಲ್ಲಿ ಭಾಗವಹಿಸುತ್ತಿರುವುದಾಗಿ ಅವರು ಹೇಳಿಕೊಂಡಿದ್ದಾರೆ. ಅಂದಹಾಗೆ, ಕಂಗನಾ ಅಭಿನಯದ ಹೊಸ ಚಿತ್ರ ಯಾವುದು ಗೊತ್ತಾ? ‘ಚಂದ್ರಮುಖಿ 2’.
ರಜನಿಕಾಂತ್, ಜ್ಯೋತಿಕಾ ಅಭಿನಯದಲ್ಲಿ ಕೆಲವು ವರ್ಷಗಳ ಹಿಂದೆ ಪಿ. ವಾಸು, ‘ಚಂದ್ರಮುಖಿ’ ಎಂಬ ಚಿತ್ರವನ್ನು ನಿರ್ದೇಶಿಸಿದ್ದು ನೆನಪರಿಬಹುದು. ಇದು ಕನ್ನಡದ ‘ಆಪ್ತಮಿತ್ರ’ ಚಿತ್ರದ ರೀಮೇಕ್ ಆಗಿತ್ತು. ಈ ಚಿತ್ರ ಯಶಸ್ವಿಯಾದ ಮೇಲೆ, ಇದರ ಮುಂದುವರೆದ ಭಾಗ ಬರಬಹುದು ಎಂಬ ಸುದ್ದಿ ಇತ್ತು. ಆದರೆ, ಅದು ತಡವಾಗಿ, ಈಗ ಕೊನೆಗೂ ‘ಚಂದ್ರಮುಖಿ 2’ ಬರುತ್ತಿದೆ. ಈ ಚಿತ್ರದಲ್ಲಿ ರಜನಿಕಾಂತ್ ಬದಲು, ರಾಘವ ಲಾರೆನ್ಸ್ ನಟಿಸುತ್ತಿದ್ದಾರೆ. ಇನ್ನು, ಪಿ. ವಾಸು ಅವರೇ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ.
ಈ ಕುರಿತು ಬರೆದುಕೊಂಡಿರುವ ಕಂಗನಾ, ”ಚಂದ್ರಮುಖಿ 2′ ಚಿತ್ರದ ಕ್ಲೈಮ್ಯಾಕ್ಸ್ ಹಾಡಿನ ರಿಹರ್ಸಲ್ನಲ್ಲಿ ಭಾಗಿಯಾಗಿದ್ದೇನೆ. ಕಲಾ ಮಾಸ್ಟರ್ ಅವರು ನೃತ್ಯ ನಿರ್ದೇಶನ ಮಾಡಿದರೆ, ಗೋಲ್ಡನ್ ಗ್ಲೋಬ್ ಪ್ರಶಸ್ತಿ ವಿಜೇತ ಎಂ.ಎಂ. ಕೀರವಾಣಿ ಈ ಹಾಡಿಗೆ ಸಂಗೀತ ಸಂಯೋಜಿಸಿದ್ದಾರೆ. ಪಿ. ವಾಸು ಈ ಚಿತ್ರದ ನಿರ್ದೇಶಕರು’ ಎಂದು ಬರೆದುಕೊಂಡಿದ್ದಾರೆ ಕಂಗನಾ.
ಇದನ್ನೂ ಓದಿ: ರಾಮಾಯಣದಿಂದ ಹೃತಿಕ್ ಹೊರಕ್ಕೆ … ರಾವಣನಾಗ್ತಾರಾ ಯಶ್?
‘ಚಂದ್ರಮುಖಿ 2’ ಚಿತ್ರವಲ್ಲದೆ ‘ತೇಜಸ್’ ಮತ್ತು ‘ನಟಿ ಬಿನೋದಿನಿ’ ಚಿತ್ರಗಳಲ್ಲೂ ಕಂಗನಾ ಅಭಿನಯಿಸುತ್ತಿದ್ದಾರೆ.