ಹೈದರಾಬಾದ್: ಇತ್ತೀಚೆಗಷ್ಟೇ ಟಾಲಿವುಡ್ ನಟಿ ಕಾಜಲ್ ಅಗರವಾಲ್ ಅವರು ದಸರಾ ಹಬ್ಬದ ಸಂಭ್ರಮಕ್ಕೆ ಸಾಕ್ಷಿಯಾಗಿ ತಮ್ಮ ಇನ್ಸ್ಟಾಗ್ರಾಂನಲ್ಲಿ ಫೋಟೋವೊಂದು ಹಂಚಿಕೊಂಡಿದ್ದು, ಅದು ಸಿಕ್ಕಾಪಟ್ಟೆ ವೈರಲ್ ಆಗಿದೆ.
ದಸರಾಕ್ಕಾಗಿಯೇ ಕಾಜಲ್ ಅವರು ಕಲರ್ಫುಲ್ ಕುರ್ತಾ ಮತ್ತು ದುಪ್ಪಟ್ಟ ಜತೆಗೆ ಘರಾರಾ ಸೆಟ್ ಖರೀದಿಸಿದ್ದರು. ಡಿಸೈನರ್ ಅರ್ಪಿತಾ ಮೆಹ್ತಾ ಅವರ ನ್ಯೂ ಕಲೆಕ್ಷನ್ ಬ್ಲರ್ಡ್ ಲೈನ್ಸ್ ತಯಾರಿತ ಹೊಸ ಉಡುಗೆಯಾಗಿದ್ದು, ಅದನ್ನು ಧರಿಸಿ ಕಾಜಲ್ ಹಬ್ಬದಲ್ಲಿ ಸಖತ್ ಮಿಂಚಿದ್ದಾರೆ.
View this post on Instagram
ಕಾಜಲ್ ಹರಿಬಿಟ್ಟಿರುವ ಫೋಟೋಗೆ ಸುಮಾರು 5 ಲಕ್ಷಕ್ಕೂ ಹೆಚ್ಚು ಲೈಕ್ಸ್ ಬಂದಿವೆ. ಸಾಕಷ್ಟು ಫೋಟೋಗಳನ್ನು ಸಹ ಅಪ್ಲೋಡ್ ಮಾಡಿದ್ದಾರೆ. ಅಲ್ಲದೆ, ಭಾವಿ ಪತಿಯೊಂದಿಗಿರುವ ಫೋಟೋವನ್ನು ಮೊದಲ ಬಾರಿಗೆ ಕಾಜಲ್ ಶೇರ್ ಮಾಡಿಕೊಂಡಿದ್ದಾರೆ. ಇನ್ನು ಫೋಟೋ ನೋಡಿದ ಸಾಕಷ್ಟು ಮಂದಿ ಕಾಮೆಂಟ್ ಮಾಡಿ, ಕಾಜಲ್ ಸೌಂದರ್ಯವನ್ನು ಹೊಗಳಿದ್ದಾರೆ.
ಆದರೆ, ಎಲ್ಲರದ್ದು ಒಂದೇ ಪ್ರಶ್ನೆ ಕಾಜಲ್ ಧರಿಸಿದ್ದ ಉಡುಪಿನ ಬೆಲೆ ಎಷ್ಟು? ಇದೀಗ ಕುತೂಹಲಕ್ಕೆ ತೆರೆಬಿದ್ದಿದ್ದು, ಕುರ್ತಾ ಮತ್ತು ಘರಾರಾ ಸೆಟ್ನ ಬೆಲೆ ಬರೋಬ್ಬರಿ 78 ಸಾವಿರ ರೂಪಾಯಿ ಆಗಿದೆ. ಜನಸಾಮಾನ್ಯರಿಗಂತೂ ಕೈಗೆಟುಕದ ಬೆಲೆ ಇದಾಗಿದೆ. ಹಬ್ಬಕ್ಕೆ ಇಷ್ಟೊಂದು ಖರ್ಚು ಮಾಡುವ ಕಾಜಲ್ ಅವರ ಮದುವೆ ಡ್ರೆಸ್ ಎಷ್ಟು ಬೆಲೆಯದ್ದಾಗಿರಲಿದೆ ಎಂದು ಈಗಿನಿಂದಲೇ ಅಭಿಮಾನಿಗಳು ಅಂದಾಜು ಹಾಕತೊಡಗಿದ್ದಾರೆ.
ಅಂದಹಾಗೆ ಕಾಜಲ್ ಇದೇ ಅ. 30ರಂದು ಮುಂಬೈನಲ್ಲಿ ನಡೆಯಲಿರುವ ಖಾಸಗಿ ಸಮಾರಂಭದಲ್ಲಿ ಸಪ್ತಪದಿ ತುಳಿಯಲಿದ್ದಾರೆ. ಉದ್ಯಮಿ, ಇಂಟಿರಿಯರ್ ಡಿಸೈನರ್, ಟೆಕ್ ಮತ್ತು ವಿನ್ಯಾಸ ಉತ್ಸಾಹಿ ಗೌತಮ್ ಕಿಟ್ಚ್ಲು ಅವರನ್ನು ಕಾಜಲ್ ವಿವಾಹವಾಗಲಿದ್ದಾರೆ. ಈ ವಿಚಾರವನ್ನು ಸ್ವತಃ ಕಾಜಲ್ ಅವರೇ ಈ ಹಿಂದೆ ಇನ್ಸ್ಟಾಗ್ರಾಂ ಮೂಲಕ ಹಂಚಿಕೊಂಡಿದ್ದರು. (ಏಜೆನ್ಸೀಸ್)
ಟಾಲಿವುಡ್ ಬ್ಯೂಟಿ ಕಾಜಲ್ ಮದುವೆ ಫಿಕ್ಸ್: ಕೊನೆಗೂ ವದಂತಿಗೆ ತೆರೆಎಳೆದ ಮಗಧೀರನ ಬೆಡಗಿ..!