ನವದೆಹಲಿ: ಇಂಟರ್ನೆಟ್ ಕೂಡ ವಾಕ್ ಮತ್ತು ಅಭಿವ್ಯಕ್ತಿ ಸ್ವಾಂತಂತ್ರ್ಯದ ಒಂದು ಭಾಗವಾಗಿದೆ ಎಂದು ಅಭಿಪ್ರಾಯಪಟ್ಟಿರುವ ಸುಪ್ರೀಂಕೋರ್ಟ್, ಒಂದು ವಾರದೊಳಗೆ ಇಂಟರ್ನೆಟ್ ಸೇರಿದಂತೆ ನಿರ್ಬಂಧಿಸಲಾಗಿರುವ ಎಲ್ಲವನ್ನು ಮರುಸ್ಥಾಪಿಸಬೇಕೆಂದು ಜಮ್ಮು ಮತ್ತು ಕಾಶ್ಮೀರ ಆಡಳಿತಕ್ಕೆ ಶುಕ್ರವಾರ ಆದೇಶ ಹೊರಡಿಸಿದೆ.
ಆರ್ಟಿಕಲ್ 370 ಅಡಿಯಲ್ಲಿ ಜಮ್ಮು ಮತ್ತು ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನವನ್ನು ಕಳೆದ ಆಗಸ್ಟ್ನಲ್ಲಿ ಕೇಂದ್ರ ಸರ್ಕಾರ ರದ್ದುಗೊಳಿದೆ. ಈ ವೇಳೆ ಮುಂಜಾಗ್ರತ ಕ್ರಮವಾಗಿ ಜಮ್ಮು ಮತ್ತು ಕಾಶ್ಮೀರದಲ್ಲಿ ಅನೇಕ ನಿರ್ಬಂಧಗಳನ್ನು ಹೇರಲಾಗಿತ್ತು. ಇದನ್ನು ಪ್ರಶ್ನಿಸಿ ಸುಪ್ರೀಂಕೋರ್ಟ್ಗೆ ಅರ್ಜಿ ದಾಖಲಾಗಿತ್ತು. ಈ ಸಂಬಂಧ ನಿರ್ಬಂಧ ತೆರವುಗೊಳಿಸುವಂತೆ ಇಂದು ಆದೇಶಿಸಿದೆ.
ಅಂತರ್ಜಾಲ ಅಮಾನತ್ತನ್ನು ತಕ್ಷಣವೇ ಮರು ಪರಿಶೀಲಿಸಬೇಕಾಗಿದೆ. ಇಂತಹ ನಿರ್ಬಂಧಗಳು ಕೆಲವೇ ಸಮಯಗಳವರೆಗೆ ಮಾತ್ರ ಇರಬೇಕು. ಇದು ಕೂಡ ನ್ಯಾಯಾಂಗ ಪರಿಶೀಲನೆಯ ವಿಷಯವಾಗಿದೆ ಎಂದು ಸುಪ್ರೀಂಕೋರ್ಟ್ ತಿಳಿಸಿದ್ದು, ಮುಕ್ತ ಓಡಾಟ, ಅಂತರ್ಜಾಲ ಹಾಗೂ ಮೂಲಭೂತ ಸ್ವಾತಂತ್ರ್ಯದ ಮೇಲಿನ ನಿರ್ಬಂಧ ಅಧಿಕಾರದ ಅನಿಯಂತ್ರಿತ ವ್ಯಾಯಮ ಆಗಬಾರದು ಎಂದು ಹೇಳಿತು.
ಎಲ್ಲ ನಿರ್ಬಂಧಿತ ಆದೇಶಗಳು ಸಾರ್ವಜನಿಕರಿಗಾಗಿ ಮಾಡಿರುವುದರಿಂದ ಅದನ್ನು ಕಾನೂನಾತ್ಮಕವಾಗಿ ಅವರು ಪ್ರಶ್ನಿಸಬಹುದಾಗಿದೆ. ಇಂಟರ್ನೆಟ್ ಹಕ್ಕು ಸೇರಿ ವಾಕ್ ಮತ್ತು ಅಭಿವ್ಯಕ್ತಿ ಸ್ವಾಂತಂತ್ರ್ಯ ಆರ್ಟಿಕಲ್ 19ರಲ್ಲಿ ಅಡಕವಾಗಿದೆ ಎಂದು ನ್ಯಾಯಮೂರ್ತಿ ಎನ್.ವಿ.ರಮಣ ಅವರು ತೀರ್ಪು ಓದಿದರು.
ಇದೇ ವೇಳೆ ಜಮ್ಮು ಮತ್ತು ಕಾಶ್ಮೀರದಲ್ಲಿ ಹೇರಲಾಗಿದ್ದು 144 ಸೆಕ್ಷನ್ ಅನ್ನು ಟೀಕಿಸಿದ ನ್ಯಾಯಾಲಯ ಇದು ಜನರ ಭಿನ್ನಾಭಿಪ್ರಾಯಗಳನ್ನು ಹತ್ತಿಕ್ಕುವ ಸಾಧವಾಗಬಾರದು ಎಂದು ಹೇಳಿತು. ಸುರಕ್ಷತೆ ಮತ್ತು ಜನರ ಸ್ವಾತಂತ್ರ್ಯದಲ್ಲಿ ಸಮತೋಲನ ಕಾಪಾಡಿಕೊಳ್ಳಬೇಕು. ಜನರಿಗೆ ಒದಗಿಸಲಾಗಿರುವ ಹಕ್ಕುಗಳನ್ನು ಖಚಿತಪಡಿಸಲು ಮಾತ್ರ ನಾವು ಇಲ್ಲಿ ಕುಳಿತಿದ್ದೇವೆ ಎಂದರು.
ಎನ್.ವಿ.ರಮಣ, ಆರ್. ಸುಭಾಷ್ ರೆಡ್ಡಿ ಮತ್ತು ಬಿ.ಆರ್.ಗವಾಯಿ ಅವರನ್ನೊಳಗೊಂಡ ತ್ರಿಸದಸ್ಯ ಪೀಠವು ಈ ಮೊದಲೇ ವಿಚಾರಣೆ ಮುಗಿಸಿ ನವೆಂಬರ್ 27ರಂದು ತೀರ್ಪು ಕಾಯ್ದಿರಿಸಿತ್ತು. (ಏಜೆನ್ಸೀಸ್)