ನವದೆಹಲಿ: ಜಿಯೋ ಕಂಪನಿ ಆರಂಭಿಸಿ ಕೆಲವೇ ತಿಂಗಳುಗಳಲ್ಲಿ ಅನೇಕ ಗ್ರಾಹಕರನ್ನು ತನ್ನತ್ತ ಸೆಳೆದು ಟೆಲಿಕಾಂ ಕಂಪನಿಗಳಿಗೆ ಸೆಡ್ಡು ಹೊಡೆದಿದ್ದ ರಿಲಯನ್ಸ್ ಇಂಡಸ್ಟ್ರಿ ಲಿಮಿಟೆಡ್(ಆರ್ಐಎಲ್) ಇದೀಗ ತನ್ನ ಗಮನವನ್ನು ಇ-ಕಾಮರ್ಸ್ ಕಡೆ ನೆಟ್ಟಿದ್ದು, ಅಮೆಜಾನ್ ಮತ್ತು ಫ್ಲಿಫ್ಕಾರ್ಟ್ನಂತಹ ದೈತ್ಯ ಕಂಪನಿಗಳಿಗೆ ಸವಾಲೆಸೆಯಲು ಸಜ್ಜಾಗಿದೆ.
ಜಿಯೋಮಾರ್ಟ್ ಹೆಸರಿನ ಇ-ಕಾಮರ್ಸ್ ಉದ್ಯಮವನ್ನು ದೇಶಾದ್ಯಂತ ತೆರೆಯಲು ರಿಲಯನ್ಸ್ ಕಂಪನಿ ಎಲ್ಲ ತಯಾರಿ ನಡೆಸಿಕೊಂಡಿದೆ. ರಿಲಯನ್ಸ್ ರಿಟೈಲ್, ಜಿಯೋಮಾರ್ಟ್ ಆಪರೇಟ್ ಮಾಡಲಿದ್ದು, ಇದು ರಿಲಯನ್ಸ್ ಇಂಡಸ್ಟ್ರಿ ಲಿಮಿಟೆಡ್ನ ಚಿಲ್ಲರೆ ಅಂಗವಾಗಿದೆ.
ಪ್ರಾರಂಭದಲ್ಲಿ ಪರೀಕ್ಷಾರ್ಥವಾಗಿ ಜಿಯೋಮಾರ್ಟ್ ಉದ್ಘಾಟಿಸಲಾಗಿದ್ದು, ನವಿ ಮುಂಬೈ, ಥಾಣೆ ಮತ್ತು ಕಲ್ಯಾಣ್ ನಗರಗಳಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಬಳಿಕ ಇದನ್ನು ದೇಶಾದ್ಯಂತ ವಿಸ್ತರಿಸಲಾಗುತ್ತದೆ ಎಂದು ಕಂಪನಿ ಮೂಲಗಳು ತಿಳಿಸಿವೆ.
ಆರ್ಐಎಲ್ ಮುಖ್ಯಸ್ಥ ಹಾಗೂ ಭಾರತದ ಬಿಲಿಯನೇರ್ ಮುಖೇಶ್ ಅಂಬಾನಿ ಕಳೆದ ವರ್ಷವೇ ಈ ಬಗ್ಗೆ ಸಣ್ಣದೊಂದು ಸುಳಿವು ನೀಡಿದ್ದರು. ಜಿಯೋಮಾರ್ಟ್ಗೆ ಪೂರ್ವ ನೋಂದಣಿಗಳನ್ನು ಮಾಡಿಸುವ ಮೂಲಕ ಕಂಪನಿ ಉದ್ಯಮವನ್ನು ಆರಂಭಿಸಿದೆ. 50 ಸಾವಿರಕ್ಕಿಂತ ಹೆಚ್ಚಿನ ಉತ್ಪನ್ನಗಳ ಮೂಲಕ ಜನರನ್ನು ಪ್ರಚೋದಿಸಲು ಹಲವಾರು ಆಫರ್ಗಳನ್ನು ನೀಡಲಾಗುತ್ತದೆ.
ಕನಿಷ್ಠ ಆರ್ಡರ್ಗೂ ಉಚಿತ ಹೋಮ್ ಡೆಲಿವರಿ, ಉತ್ಪನ್ನ ಹಿಂದಿರುಗಿಸಲು ಯಾವುದೇ ಪ್ರಶ್ನೆಯನ್ನು ಕೇಳದಿರುವುದು, ವೇಗದ ಡೆಲಿವರಿ ಭರವಸೆ ಸೇರಿದಂತೆ ಅನೇಕ ಆಫರ್ಗಳನ್ನು ಜಿಯೋಮಾರ್ಟ್ ಅಧಿಕೃತ ವೆಬ್ಸೈಟ್ನಲ್ಲಿ ಹೈಲೈಟ್ಸ್ ಮಾಡಲಾಗಿದೆ. ಅಲ್ಲದೆ, ಇದು ದೇಶದ ಹೊಸ ಅಂಗಡಿ ಎಂದು ಹೇಳುವ ಮೂಲಕ ಅಮೆಜಾನ್ ಮತ್ತು ಫ್ಲಿಫ್ಕಾರ್ಟ್ ಗ್ರಾಹಕರನ್ನು ತನ್ನತ್ತ ಸೆಳೆಯುವ ಅನೇಕ ಪ್ರಯತ್ನಗಳಿಗೆ ಕಂಪನಿ ಕೈಹಾಕಿದೆ.
ಜಿಯೋಮಾರ್ಟ್ಗೆ ನೋಂದಣಿ ಮಾಡಿಕೊಂಡಲ್ಲಿ ಆಕರ್ಷಕ ಡಿಸ್ಕೌಂಟ್ ಸಿಗಲಿದೆ ಎಂದು ಜಿಯೋ ಬಳಕೆದಾರರಿಗೆ ಈಗಾಗಲೇ ಕಂಪನಿ ಆಹ್ವಾನ ಸಂದೇಶವನ್ನು ಕಳುಹಿಸಿದೆ. ಇದರ ಪ್ರಕಾರ ಮೊದಲೇ ನೋಂದಣಿ ಮಾಡಿಕೊಂಡವರಿಗೆ 3,000 ರೂ.ವರೆಗೂ ವಿನಾಯಿತಿ ಸಿಗಲಿದೆ. ವಿಶೇಷವೆಂದರೆ ಜಿಯೋಮಾರ್ಟ್ ಅನ್ನು ಆನ್ಲೈನ್ ಮತ್ತು ಆಫ್ಲೈನ್ ಎರಡರಲ್ಲೂ ತರಲು ಕಂಪನಿ ನಿರ್ಧರಿಸಿದೆ. (ಏಜೆನ್ಸೀಸ್)