ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಈಗಾಗಲೇ ಬಾಲಿವುಡ್ನಲ್ಲಿ “ಆರ್ಟಿಕಲ್ 370′, “ಶೈತಾನ್’, “ಲಾಪತಾ ಲೇಡೀಸ್’ ಸೇರಿ ಕೆಲವು ಸಿನಿಮಾಗಳನ್ನು ನಿರ್ಮಿಸಿರುವ ಜಿಯೋ ಸ್ಟುಡಿಯೋಸ್ ಸಂಸ್ಥೆ, “ಕೋಟಿ’ ಚಿತ್ರದ ಮೂಲಕ ಕನ್ನಡಕ್ಕೆ ಎಂಟ್ರಿ ಕೊಟ್ಟಿದೆ. ಡಾಲಿ ಧನಂಜಯ ನಾಯಕನಾಗಿರುವ ಈ ಡ್ರಾಮಾ ಥ್ರಿಲ್ಲರ್ ಚಿತ್ರಕ್ಕೆ ಪರಮ್ ಆ್ಯಕ್ಷನ್&ಕಟ್ ಹೇಳುತ್ತಿದ್ದು, ಇತ್ತೀಚೆಗಷ್ಟೆ ಟೀಸರ್ ಬಿಡುಗಡೆ ಮಾಡಲಾಯಿತು. ನಾಯಕ ಧನಂಜಯ, “ಒಂದು ಕೋಟಿ ರೂಪಾಯಿ ಸಿಕ್ಕಿಬಿಟ್ಟರೆ ಅಥವಾ ದುಡಿಯೋಕ್ಕಾದರೆ ಸೆಟಲ್ ಆಗಿಬಿಡಬಹುದು ಎಂದು ಎಲ್ಲರೂ ಅಂದುಕೊಳ್ಳುತ್ತಾರೆ. ನಮ್ಮ ಕೋಟಿನೂ ಅಷ್ಟೇ. ಎಲ್ಲ ಮನೆಗಳಲ್ಲೂ ಈ ಕೋಟಿಯಂತಹ ಅಣ್ಣ, ತಮ್ಮ, ಮಗ ನಿಮಗೆ ಸಿಗುತ್ತಾರೆ. ಕಷ್ಟಪಟ್ಟು ದುಡಿದು ಎಲ್ಲ ಸರಿ ಮಾಡಿಕೊಳ್ಳಬಹುದು ಅಂದುಕೊಳ್ಳುತ್ತಿರುತ್ತಾರೆ’ ಎಂದು ಮಾಹಿತಿ ನೀಡುತ್ತಾರೆ.
ಈ ಹಿಂದೆ ಟಿವಿ ರಿಯಾಲಿಟಿ ಶೋಗಳು ಮತ್ತು ಧಾರಾವಾಹಿಗಳನ್ನು ರೂಪಿಸಿ ಅನುಭವವಿರುವ, ಜಿಯೋ ಸ್ಟುಡಿಯೋಸ್ನ ಕನ್ನಡ ಭಾಷೆಯ ಮುಖ್ಯಸ್ಥರೂ ಆಗಿರುವ ಪರಮ್, ಚೊಚ್ಚಲ ನಿರ್ದೇಶನದ ಬಗ್ಗೆ, “ನನ್ನ ಕನಸು ಈ ಸಿನಿಮಾ ಮೂಲಕ ನಿಜವಾಗಿದೆ. ಇದು ಸಾಧ್ಯವಾಗಿದ್ದು ಜಿಯೋ ಸ್ಟುಡಿಯೋಸ್ ಮತ್ತು ಜ್ಯೋತಿ ದೇಶಪಾಂಡೆ ನನ್ನ ಮೇಲಿಟ್ಟ ನಂಬಿಕೆಯಿಂದ. ಒಳ್ಳೆ ಕಥೆಗಳನ್ನು ಹೇಳಬೇಕು, ಬೇರೆ ಕಥೆಗಳನ್ನು ಹೇಳಬೇಕು, ಬೇರೆ ಧ್ವನಿಗಳು ಕೇಳಿಸಬೇಕು ಎಂಬುದು ಜಿಯೋ ಸ್ಟುಡಿಯೋಸ್ ಮೂಲ ಉದ್ದೇಶ’ ಎಂದು ಹೇಳಿಕೊಳ್ಳುತ್ತಾರೆ.
ಚಿತ್ರದಲ್ಲಿ ಧನಂಜಯಗೆ ಮೋಕ್ಷಾ ಕುಶಾಲ್ ನಾಯಕಿಯಾಗಿದ್ದಾರೆ. “ಸಪ್ತಸಾಗರದಾಚೆ ಎಲ್ಲೋ’ ಚಿತ್ರದ ಖ್ಯಾತಿಯ ರಮೇಶ್ ಇಂದಿರಾ ವಿಲನ್ ಆಗಿದ್ದಾರೆ. ಉಳಿದಂತೆ ರಂಗಾಯಣ ರಘು, ತಾರಾ, ಪೃಥ್ವಿ ಶಾಮನೂರು, ಸರದಾರ್ ಸತ್ಯ, ತನುಜಾ ವೆಂಕಟೇಶ್ ತಾರಾಗಣದಲ್ಲಿದ್ದಾರೆ. ಚಿತ್ರಕ್ಕೆ ವಾಸುಕಿ ವೈಭ್ ಸಂಗೀತ, ನೊಬಿನ್ ಪೌಲ್ ಹಿನ್ನೆಲೆ ಸಂಗೀತ, ಪ್ರತಿಕ್ ಶೆಟ್ಟಿ ಸಂಕಲನ, ಅರುಣ್ ಬ್ರಹ್ಮನ್ ಛಾಯಾಗ್ರಹಣ ಇರಲಿದೆ. ಇದೇ ಜೂ. 14ರಂದು “ಕೋಟಿ’ ರಾಜ್ಯಾದ್ಯಂತ ರಿಲೀಸ್ ಆಗಲಿದೆ.