ಬೆಂಗಳೂರು: ನಗರದ ದೊಡ್ಡಪೇಟೆ ವೃತ್ತದ ಬಳಿ ಆ್ಯಕ್ಟೀವ್ ಹೊಂಡಾ ದ್ವಿಚಕ್ರ ವಾಹನದಲ್ಲಿ ಶುಕ್ರವಾರ ರಾತ್ರಿ ಬರೋಬ್ಬರಿ 3 ಕೋಟಿ ರೂ. ಮೌಲ್ಯದ ಚಿನ್ನಾಭರಣ ಪತ್ತೆಯಾಗಿದೆ.
ರಾತ್ರಿ ಪಾಳಿ ಗಸ್ತಿನಲ್ಲಿದ್ದ ಪೊಲೀಸರು ವಾಹನ ಪರಿಶೀಲಿಸುತ್ತಿದ್ದರು. ಮಧ್ಯರಾತ್ರಿ 12.30ರ ಸುಮಾರಿಗೆ ಆ್ಯಕ್ಟೀವ್ ಹೊಂಡಾ ದ್ವಿಚಕ್ರ ವಾಹನವನ್ನು ತಡೆದ ಬೀಟ್ ಕಾನ್ಸ್ಟೇಬಲ್ ಆನಂದ್ ಮತ್ತು ಹನುಮಂತಪ್ಪ ಅವರು ತಪಾಸಣೆ ನಡೆಸುತ್ತಿದ್ದರು. ಗಾಡಿಯಲ್ಲಿದ್ದ ಬ್ಯಾಗ್ ಬಗ್ಗೆ ಪೊಲೀಸರು ಕೇಳಿದ್ದಕ್ಕೆ, ಅದರಲ್ಲಿ ಶಿವಾಜಿನಗರದ 1 ಗ್ರಾಂ ಗೋಲ್ಡ್ ಇದೆ ಎಂದು ದ್ವಿಚಕ್ರ ವಾಹನ ಸವಾರರು ಹೇಳಿದರು. ಬ್ಯಾಗ್ ತೆರೆದು ನೋಡೋಕೆ ಮುಂದಾದಾಗ 2 ಕೆಜಿ ಚಿನ್ನ ಇದೆ ಬಿಟ್ಟುಬಿಡಿ ಅಂದ್ರು. ಮತ್ತೆ 4 ಕೆಜಿ ಗೋಲ್ಡ್ ಇದೆ ಅಂದ್ರು. ಬ್ಯಾಗ್ ತೆರೆದು ನೋಡಿದ್ರೆ ಅದರಲ್ಲಿತ್ತು ಒಟ್ಟು 6.55 ಕೆಜಿ ತೂಕದ ನೆಕ್ಲೇಸ್, ದೊಡ್ಡ ಹಾರ ಸರ, ಬಳೆಗಳು! ಅನುಮಾನಗೊಂಡ ಪೊಲೀಸರು ಚಿನ್ನಾಭರಣದ ದಾಖಲೆ ಕೇಳಿದರು. ಅಷ್ಟರಲ್ಲಿ ಭಾರಿ ಚಿನ್ನದ ಬೇಟೆಗೆ ಪೊಲೀಸರು ಸಜ್ಜಾಗಿದ್ದರು!
ಹೌದು, ದಾಖಲೆ ಇಲ್ಲದೆ ಬರೋಬ್ಬರಿ 6.55 ಕೆಜೆ ಚಿನ್ನಾಭರಣವನ್ನು ಬ್ಯಾಗ್ನಲ್ಲಿ ತುಂಬಿಕೊಂಡು ಸಾಗಾಟ ಮಾಡುತ್ತಿದ್ದ ಇಬ್ಬರು ಆರೋಪಿಗಳನ್ನು ಬ್ಯಾಗ್ ಸಹಿತ ಸಿಟಿ ಮಾರ್ಕೆಟ್ ಠಾಣೆಗೆ ಕರೆತಂದ ಪೊಲೀಸರು ಪ್ರಕರಣ ದಾಖಲಿಸಿಕೊಂಡರು.
ಜಪ್ತಿಯಾದ ಆಭರಣಗಳೆಲ್ಲ ಚಿನ್ನದ್ದಾಗಿದ್ದು, ಮುಂಬೈನಲ್ಲಿ ತಯಾರಾಗಿವೆ ಎಂದು ತಿಳಿದುಬಂದಿದೆ. ಮುಂಬೈನಿಂದ ಬೆಂಗಳೂರಿಗೆ ಕೊರಿಯರ್ ಮೂಲಕ ಬರುತ್ತಿದ್ದ ಆಭರಣವನ್ನು ಕಲೆಕ್ಟ್ ಮಾಡಿ ಬ್ಯಾಗ್ನಲ್ಲಿ ಹಾಕಿಕೊಂಡು ಅಂಗಡಿಗೆ ಹೋಗಿ ಸ್ಯಾಂಪಲ್ ತೋರಿಸುತ್ತಿದ್ದರು. ಅಂಗಡಿಯವರು ಆರ್ಡರ್ ಕೊಟ್ಟರೆ ಮತ್ತೆ ತಯಾರು ಮಾಡಿ ಕೊಡುತ್ತಿದ್ದರು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ವಿಚಾರಣೆ ವೇಳೆ ನಗರ್ತಪೇಟೆಯ ಎಸ್.ಎಸ್. ಜುವೆಲ್ಲರ್ಸ್ಗೆ ಸೇರಿದ ಚಿನ್ನಭಾರಣ ಎಂದು ತಿಳಿದುಬಂದಿದ್ದು, ಮುಂಬೈ ಮೂಲದ ದಳಪತ್ ಸಿಂಗ್ ಹಾಗೂ ರಾಜಸ್ತಾನದ ವಿಕಾಸ್ ಎಂಬುವವರ ಬಳಿ ಚಿನ್ನಾಭರಣ ಸಿಕ್ಕಿದೆ. (ದಿಗ್ವಿಜಯ ನ್ಯೂಸ್)
ಗಂಡನನ್ನು ತೊರೆದು ಬಂದವಳ ಬದುಕಲ್ಲಿ ದುರಂತ! ಇಷ್ಟಪಟ್ಟು ಮದುವೆಯಾದವನ ಜತೆ ಹೆಣವಾದಳು
ನ್ಯಾಯ ಬೇಡಿ ಮನೆ ಬಾಗಿಲಿಗೆ ಬಂದ ಶಾಸಕನಿಗೆ ಶಿಸ್ತು ಸಮಿತಿಯತ್ತ ಬೆರಳು ತೋರಿಸಿ ಡಿಕೆಶಿ ಎಸ್ಕೇಪ್!