IPL 2024: ಯಶಸ್ವಿ ಜೈಸ್ವಾಲ್​ ಬ್ಯಾಟಿಂಗ್​ ಕೊಂಡಾಡಿದ ವೆಸ್ಟ್​ ಇಂಡೀಸ್​ ದಿಗ್ಗಜ ಬ್ರಿಯಾನ್​ ಲಾರಾ

ಜೈಪುರ: ಮುಂಬೈ ಇಂಡಿಯನ್ಸ್​ ವಿರುದ್ಧದ ಪಂದ್ಯದಲ್ಲಿ ಭರ್ಜರಿ ಶತಕ ಸಿಡಿಸುವ ಮೂಲಕ ರಾಜಸ್ಥಾನ ರಾಯಲ್ಸ್​ ತಂಡದ ಸುಲಭ ಚೇಸಿಂಗ್​ಗೆ ನೆರವಾದ ಎಡಗೈ ಆರಂಭಿಕ ಯಶಸ್ವಿ ಜೈಸ್ವಾಲ್​ (104*ರನ್​, 60 ಎಸೆತ, 9 ಬೌಂಡರಿ, 7 ಸಿಕ್ಸರ್​) ಅವರ ಆಟವನ್ನು ವೆಸ್ಟ್​ ಇಂಡೀಸ್​ ಬ್ಯಾಟಿಂಗ್​ ದಿಗ್ಗಜ ಬ್ರಿಯಾನ್​ ಲಾರಾ ಶ್ಲಾಘಿಸಿದ್ದಾರೆ.

"ಜೈಸ್ವಾಲ್​ ಅತ್ಯಂತ ಪಕ್ವತೆಯೊಂದಿಗೆ ಆಡಿದರು. ಚೆಂಡನ್ನು ಅಳೆದುತೂಗಿ ಆಡಿದರು. ಕ್ರಿಕೆಟಿಂಗ್​ ಶಾಟ್​ಗಳನ್ನೇ ಆಯ್ದುಕೊಂಡರು. ಸೂಕ್ತ ಸಮಯವನ್ನು ತೆಗೆದುಕೊಳ್ಳುವ ಮೂಲಕ ಸಮತೋಲನದ ಬ್ಯಾಟಿಂಗ್​ ಪ್ರದರ್ಶಿಸಿದರು' ಎಂದು ಲಾರಾ ಹೇಳಿದ್ದಾರೆ.

ಮುಂಬೈ ತಂಡದ 180 ರನ್​ ಸವಾಲಿಗೆ ಪ್ರತಿಯಾಗಿ ಜೈಸ್ವಾಲ್​, ಜೋಸ್​ ಬಟ್ಲರ್​ (35) ಜತೆಗೆ ಮೊದಲ ವಿಕೆಟ್​ಗೆ 74 ರನ್​ ಸೇರಿಸುವ ಮೂಲಕ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಬಳಿಕ ನಾಯಕ ಸಂಜು ಸ್ಯಾಮ್ಸನ್​ (38*) ಜತೆಗೂಡಿ ಮುರಿಯದ 2ನೇ ವಿಕೆಟ್​ಗೆ 65 ಎಸೆತಗಳಲ್ಲಿ 109 ರನ್​ ಸೇರಿಸುವ ಮೂಲಕ ಜೈಸ್ವಾಲ್​, 18.4 ಓವರ್​ಗಳಲ್ಲಿ 1 ವಿಕೆಟ್​ ನಷ್ಟದಲ್ಲಿ ರಾಜಸ್ಥಾನವನ್ನು ಗೆಲುವಿನ ದಡ ಸೇರಿಸಿದರು.

ಐಪಿಎಲ್​ನಲ್ಲಿ ರನ್​ಬರ ಎದುರಿಸಿದ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳದೆ ಬ್ಯಾಟಿಂಗ್​ನ ಮೂಲಸೂತ್ರಗಳತ್ತ ಗಮನಹರಿಸಿದೆ. ಆರಂಭದಿಂದಲೇ ಚೆಂಡನ್ನು ಸರಿಯಾಗಿ ಗಮನಿಸಿ ಆಡಲು ನಿರ್ಧರಿಸಿದ್ದೆ ಎಂದು ಯಶಸ್ವಿ ಜೈಸ್ವಾಲ್​ ಹೇಳಿದ್ದಾರೆ.

ನಾವು ಆರಂಭದಲ್ಲೇ ಸಂಕಷ್ಟಕ್ಕೆ ಸಿಲುಕಿದೆವು. ತಿಲಕ್​ ವರ್ಮ ಮತ್ತು ನೆಹಾಲ್​ ವಧೇರ ಅತ್ಯುತ್ತಮ ಬ್ಯಾಟಿಂಗ್​ ಪ್ರದರ್ಶಿಸಿದರು. ಇಲ್ಲದಿದ್ದರೆ 180ರ ಸನಿಹ ತಲುಪುವುದು ಕಷ್ಟಕರವಾಗುತ್ತಿತ್ತು ಎಂದು ಮುಂಬೈ ಇಂಡಿಯನ್ಸ್​ ನಾಯಕ ಹಾರ್ದಿಕ್​ ಪಾಂಡ್ಯ ತಿಳಿಸಿದ್ದಾರೆ.

ಐಪಿಎಲ್​ನಲ್ಲಿ ಒಂದೇ ಪಂದ್ಯದಲ್ಲಿ ತಂಡವೊಂದರ ಪರ 5 ವಿಕೆಟ್​ ಗೊಂಚಲು ಮತ್ತು ಶತಕ ದಾಖಲಾದ 3ನೇ ದೃಷ್ಟಾಂತ ಇದಾಗಿದೆ. 2022ರಲ್ಲಿ ರಾಜಸ್ಥಾನದ ಬಟ್ಲರ್​-ಚಾಹಲ್​ ಮತ್ತು 2023ರಲ್ಲಿ ಗುಜರಾತ್​ನ ಗಿಲ್-ಮೋಹಿತ್​ ಶರ್ಮ ಈ ಸಾಧನೆ ಮಾಡಿದ್ದರು.

https://www.vijayavani.net/rajasthan-royals-defeat-mumbai-indians-by-9-wickets