ಮುಂಬೈ: ಸಿನಿಮಾ ನಟ-ನಟಿಯರು ತಮ್ಮ ಆಪ್ತ ಸಹಾಯಕರಿಗೆ ಆಗಾಗ ಕಾಸ್ಟ್ಲಿ ಗಿಫ್ಟ್ಗಳನ್ನು ಕೊಡುತ್ತಿರುತ್ತಾರೆ. ಅವರು ಮಾಡುವ ಸೇವೆಗೆ ಖುಷಿಯಾಗಿ ಒಂದಲ್ಲಾ ಒಂದು ರೀತಿ ಸಹಾಯ ಮಾಡುತ್ತಲೇ ಇರುತ್ತಾರೆ. ಇತ್ತೀಚೆಗೆ, ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಸಹ ತಮ್ಮ ಆಪ್ತ ಸಹಾಯಕನಿಗೆ ಒಂದು ಗಿಫ್ಟ್ ಕೊಟ್ಟಿದ್ದಾರೆ.
ಇದನ್ನೂ ಓದಿ: ಒನ್ ಆಂಡ್ ಓನ್ಲಿ :30 ವರ್ಷಗಳ ನಂತರ ಕನ್ನಡಿಗನಾದ ಕ್ರೇಜಿಸ್ಟಾರ್
ಜಾಕ್ವೆಲಿನ್ ತಮ್ಮ ಆಪ್ತ ಸಹಾಯಕನಿಗೆ ಒಂದು ಕಾರ್ ಗಿಫ್ಟ್ ಕೊಟ್ಟಿದ್ದಾರೆ. ಈ ಹಿಂದೆ, ಅವರು ತಮ್ಮ ಮೇಕಪ್ ಮ್ಯಾನ್ಗೆ ಇದೇ ರೀತಿ ಒಂದು ಕಾರ್ ಗಿಫ್ಟ್ ಕೊಟ್ಟಿದ್ದರು. ಈ ಬಾರಿ ಅವರು ತಮ್ಮ ಆಪ್ತ ಸಹಾಯಕನಿಗೆ ದಸರಾ ಅಂಗವಾಗಿ ಒಂದು ಹೊಸ ಕಾರ್ ಕೊಡಿಸಿದ್ದಾರೆ.
ಜಾಕ್ವೆಲಿನ್ ಚಿತ್ರರಂಗಕ್ಕೆ ಕಾಲಿಟ್ಟ ದಿನದಿಂದಲೂ ಅವರ ಜತೆಗೆ ಆ ಆಪ್ತ ಸಹಾಯಕ ಇದ್ದಾನಂತೆ. ಜಾಕ್ವೆಲಿನ್ನ ಕಷ್ಟ-ಸುಖಗಳಲ್ಲಿ ಭಾಗಿಯಾಗಿದ್ದನಂತೆ. ಅದೇ ಕಾರಣಕ್ಕೆ ದಸರಾ ಹಬ್ಬದ ಸಂದರ್ಭದಲ್ಲಿ ಒಂದು ಕಾರ್ ಬುಕ್ ಮಾಡಿ, ಆಯುಧ ಪೂಜೆಯಂದು ಆ ಕಾರನ್ನು ಆಪ್ತ ಸಹಾಯಕನಿಗೆ ಕೊಟ್ಟಿದ್ದಾರೆ. ಈ ಸಂದರ್ಭದಲ್ಲಿ ನಡೆದ ಪೂಜೆಯಲ್ಲೂ ಜಾಕ್ವೆಲಿನ್ ಭಾಗಿಯಾಗಿದ್ದಾರೆ.
ಇದನ್ನೂ ಓದಿ: ಅನರ್ಘ್ಯ ಅದಿತಿ : ‘ಆನ’ ಎಂಬ ಲೇಡಿ ಸೂಪರ್ ಹೀರೋ
ಎಲ್ಲಾ ಸರಿ, ಜಾಕ್ವೆಲಿನ್ ಟ್ರಾಫಿಕ್ ಪೊಲೀಸ್ನ ಗೆಟಪ್ನಲ್ಲಿ ಯಾಕಿದ್ದಾರೆ ಎಂಬ ಪ್ರಶ್ನೆ ಸಹಜವಾಗಿಯೇ ಬರಬಹುದು. ವಿಷಯವೇನೆಂದರೆ, ಜಾಕ್ವೆಲಿನ್ ಹೊಸ ಚಿತ್ರದ ಶೂಟಿಂಗ್ವೊಂದರಲ್ಲಿ ಭಾಗವಹಿಸಿದ್ದರಂತೆ. ಆ ಚಿತ್ರಕ್ಕಾಗಿ ಟ್ರಾಫಿಕ್ ಪೊಲೀಸ್ನ ಕಾಸ್ಟ್ಯೂಮ್ ತೊಟ್ಟಿದ್ದರಂತೆ. ಈ ಸಂದರ್ಭದಲ್ಲಿ ಕಾರ್ ಡೆಲಿವರಿಯಾಗಿದೆ. ಹಾಗಾಗಿ, ಫೋಟೋಗಳಲ್ಲಿ ಟ್ರಾಫಿಕ್ ಪೊಲೀಸ್ ಕಾಸ್ಟ್ಯೂಮ್ನಲ್ಲಿ ಕಾಣಿಸಿಕೊಂಡಿದ್ದಾರೆ ಜಾಕ್ವೆಲಿನ್.