ಜಮ್ಮು: ಜಮ್ಮು-ಕಾಶ್ಮೀರ ಮತ್ತು ಲಡಾಕ್ನ ವಿವಿಧ ಜಿಲ್ಲಾ ಕೋರ್ಟ್ಗಳಲ್ಲಿ ಖಾಲಿ ಇದ್ದ 33 ನಾನ್-ಗಜೆಟೆಡ್ ಹುದ್ದೆಗಳನ್ನು ದೇಶವಾಸಿಗಳಿಗೆ ಮುಕ್ತಗೊಳಿಸಿ ಹೊರಡಿಸಿದ್ದ ನೇಮಕಾತಿ ಆದೇಶವನ್ನು ಹೈಕೋರ್ಟ್ ಹಿಂಪಡೆದಿದೆ.
ಕಳೆದ ವರ್ಷ ಆಗಸ್ಟ್ನಲ್ಲಿ ಕೇಂದ್ರ ಸರ್ಕಾರ ಜಮ್ಮು-ಕಾಶ್ಮೀರವನ್ನು ಕೇಂದ್ರಾಡಳಿತ ಪ್ರದೇಶವನ್ನಾಗಿ ಘೋಷಿಸಿ, ವಿಶೇಷ ಸ್ಥಾನಮಾನ ಹಿಂಪಡೆದಾಗ ಭಾರಿ ವಿರೋಧ ವ್ಯಕ್ತವಾಗಿತ್ತು. ಬದಲಾದ ಸನ್ನಿವೇಶದಲ್ಲಿ ಜಮ್ಮು-ಕಾಶ್ಮೀರದ ಹೈಕೋರ್ಟ್ ಡಿ.26ರಂದು ಪ್ರಕಟಿಸಿದ್ದ ಈ ಜಾಹೀರಾತು ದೇಶದಲ್ಲಿ ವ್ಯಾಪಕ ಪ್ರಶಂಸೆಗೊಳಗಾಗಿತ್ತು.
ಆದರೆ, ಮಂಗಳವಾರ ಸಂಜೆ ಇದ್ದಕ್ಕಿದ್ದಂತೆ ಈ ಜಾಹೀರಾತನ್ನು ಕೋರ್ಟ್ ಹಿಂಪಡೆದುಕೊಂಡಿದೆ. ಇದಕ್ಕೆ ಯಾವುದೇ ಕಾರಣವನ್ನು ಅದು ಕೊಟ್ಟಿಲ್ಲ. ಆದಾಗ್ಯೂ, ಈ ವಿಚಾರ ಸರ್ಕಾರದ ಪರಿಶೀಲನೆಯಲ್ಲಿದೆ ಎಂದು ಸರ್ಕಾರಿ ಮೂಲಗಳು ತಿಳಿಸಿವೆ.
ಮೂವತ್ತಮೂರು ಖಾಲಿ ಹುದ್ದೆಗಳ ಪೈಕಿ ಸೀನಿಯರ್, ಜೂನಿಯರ್ ಸ್ಕೇಲ್ನ ಸ್ಟೆನೋಗ್ರಾಫರ್, ಟೈಪಿಸ್ಟ್, ಕಂಪೋಸಿಟರ್, ಇಲೆಕ್ಟ್ರಿಷಿಯನ್, ಡ್ರೈವರ್ ಹುದ್ದೆಗಳಿವೆ. (ಏಜೆನ್ಸೀಸ್)