ಬೆಂಗಳೂರು: ಸೆಡೆಂಟರಿ ಲೈಫ್ಸ್ಟೈಲ್ ಅಂದರೆ ಸೋಮಾರಿತನದ ಜೀವನಶೈಲಿಯೂ ಹೃದಯಾಘಾತವಾಗಲು ಒಂದು ಪ್ರಮುಖ ಕಾರಣ. ಆದ್ದರಿಂದ ಜಿಮ್ಗೆ ಹೋಗಿ ವ್ಯಾಯಾಮ ಮಾಡುವುದು ತಪ್ಪು ಎನ್ನಲಾಗುವುದಿಲ್ಲ. ಆದರೆ, ಮಾಡರೇಟ್ ಆಗಿ ಮಧ್ಯಮ ಮಟ್ಟದಲ್ಲಿ ಅಥವಾ ಅಲ್ಪಮಟ್ಟದಲ್ಲಿ ವರ್ಕ್ಔಟ್ ಮಾಡುವುದು ಸೂಕ್ತ. ಅವರವರ ಶಕ್ತಿ ಸಾಮರ್ಥ್ಯಕ್ಕೆ ತಕ್ಕಂತೆ ಜಿಮ್ನಲ್ಲಿ ವ್ಯಾಯಾಮ ಮಾಡಬೇಕು. ಹೈ ಇಂಟೆನ್ಸಿಟಿ ವರ್ಕ್ಔಟ್ ಮಾಡುವುದು ಸೂಕ್ತವಲ್ಲ. ಜೊತೆಗೆ, ಜಿಮ್ಗೆ ಸೇರುವ ಮುನ್ನ ಹೃದಯದ ಆರೋಗ್ಯವನ್ನು ಪರಿಶೀಲಿಸಿಕೊಂಡು ನಂತರ ಆರಂಭಿಸುವುದು ಒಳ್ಳೆಯದು ಎಂದು ಜಯದೇವ ಹೃದ್ರೋಗ ಸಂಸ್ಥೆಯ ನಿರ್ದೇಶಕ ಡಾ. ಸಿ.ಎನ್. ಮಂಜುನಾಥ್ ಹೇಳಿದ್ದಾರೆ.
ಅವರು ಭಾನುವಾರ(ಅ.31) ವಿಜಯವಾಣಿ ಕ್ಲಬ್ಹೌಸಿನಲ್ಲಿ ಯುವಜನರಲ್ಲಿ ಹೆಚ್ಚುತ್ತಿರುವ ಹೃದಯಾಘಾತದ ಬಗೆಗೆ ನಡೆದ ಸಂವಾದದಲ್ಲಿ ಈ ಮಾತುಗಳನ್ನು ಹೇಳಿದ್ದಾರೆ. ಜಿಮ್ ಮಾಡುವುದು ತಪ್ಪಲ್ಲ. ಆದರೆ, ಮುನ್ನೆಚ್ಚರಿಕೆ ವಹಿಸಿಕೊಳ್ಳಬೇಕು. ಇನ್ನೊಬ್ಬರು ಮಾಡುತ್ತಾರೆ ಎಂದು ಸ್ಪರ್ಧಾತ್ಮಕ ಭಾವನೆಯಿಂದ 40 ಕೆಜಿ ವೇಯ್ಟ್ಸ್ ಎತ್ತುವ ಸಾಮರ್ಥ್ಯ ಇರುವವರು 80 ಕೆಜಿ ಎತ್ತಲು ಪ್ರಯತ್ನಿಸಿದರೆ, ರಕ್ತನಾಳಗಳ ಮೇಲೆ ಒತ್ತಡ ಬೀಳುತ್ತದೆ. ಇದರಿಂದ ಹೃದಯದ ಆರೋಗ್ಯ ಕೆಡುತ್ತದೆ ಎಂದು ವಿವರಿಸಿದ್ದಾರೆ.
ಫಿಟ್ನೆಸ್ ಆಕಾಂಕ್ಷೆಯಲ್ಲಿ ಡಯಟ್ನಲ್ಲಿ ಈಗ ಹಲವು ಬದಲಾವಣೆಗಳನ್ನು ಮಾಡಿಕೊಳ್ಳುತ್ತಾರೆ. ಹೈಪ್ರೋಟೀನ್ ಡಯಟ್ನಲ್ಲಿ ರಕ್ತದ ನಾಳಗಳು ರಪ್ಚರ್ ಆಗುತ್ತೆ. ಆದ್ದರಿಂದ ಪ್ರೋಟೀನ್ ಸಪ್ಲಿಮೆಂಟುಗಳನ್ನು ಅನಿಯಮಿತವಾಗಿ ಸೇವಿಸಬಾರದು. ರಾಸಾಯನಿಕ ಆಹಾರಗಳಿಗಿಂತ ನೈಸರ್ಗಿಕ ಆಹಾರಗಳನ್ನು ಸೇವಿಸಬೇಕು ಎಂದು ಡಾ.ಮಂಜುನಾಥ್ ಸಲಹೆ ನೀಡಿದ್ದಾರೆ.