ಲಖನೌ: ಪ್ಲೇಆಫ್ ಸನಿಹದಲ್ಲಿರುವ ತಂಡಗಳಾದ ಲಖನೌ ಸೂಪರ್ಜೈಂಟ್ಸ್ ಮತ್ತು ಕೋಲ್ಕತ ನೈಟ್ರೈಡರ್ಸ್ ತಂಡಗಳು ಐಪಿಎಲ್-17ರಲ್ಲಿ ಭಾನುವಾರದ 2ನೇ ಪಂದ್ಯದಲ್ಲಿ ಕಾದಾಡಲಿವೆ. ಈ ಪಂದ್ಯದಲ್ಲಿ ಗೆದ್ದ ತಂಡ ಪ್ಲೇಆಫ್ ಅವಕಾಶವನ್ನು ವೃದ್ಧಿಸಿಕೊಳ್ಳಲಿದೆ.
ಇದು ಉಭಯ ತಂಡಗಳ ಮರುಮುಖಾಮುಖಿಯಾಗಿದೆ. ಏಪ್ರಿಲ್ 14ರಂದು ಕೋಲ್ಕತದಲ್ಲಿ ನಡೆದ ಮೊದಲ ಮುಖಾಮುಖಿಯಲ್ಲಿ ಕೆಕೆಆರ್ ಸುಲಭ ಗೆಲುವು ಸಾಧಿಸಿತ್ತು. ಅದಕ್ಕೀತ ತನ್ನ ತವರಿನಲ್ಲಿ ಸೇಡು ತೀರಿಸಿಕೊಳ್ಳಲು ಕೆಎಲ್ ರಾಹುಲ್ ಪಡೆ ಹೋರಾಡಲಿದೆ.
ಕೆಕೆಆರ್ ಇದುವರೆಗೆ ಆಡಿರುವ 10 ಪಂದ್ಯಗಳಲ್ಲಿ 7 ಜಯ ಮತ್ತು 3 ಸೋಲು ಕಂಡು ಅಂಕಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದೆ. ಈ ಪಂದ್ಯದಲ್ಲಿ ಗೆದ್ದರೆ ಕೆಕೆಆರ್ ಪ್ಲೇಆಫ್ ಪ್ರವೇಶವನ್ನು ಬಹುತೇಕ ಖಾತ್ರಿಪಡಿಸಿಕೊಳ್ಳುವ ಜತೆಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರುವ ಅವಕಾಶವನ್ನೂ ಹೊಂದಿದೆ. ಸದ್ಯದ ಅಗ್ರಸ್ಥಾನಿ ರಾಜಸ್ಥಾನ ರಾಯಲ್ಸ್ ಕೂಡ 8 ಪಂದ್ಯ ಗೆದ್ದಿದ್ದರೂ, ಕೆಕೆಆರ್ ರನ್ರೇಟ್ನಲ್ಲಿ ಅದಕ್ಕಿಂತ ಮೇಲುಗೈ ಹೊಂದಿದೆ.
ಲಖನೌ ತಂಡ 10 ಪಂದ್ಯಗಳಲ್ಲಿ 6 ಜಯ, 4 ಸೋಲು ಕಂಡಿದ್ದು, ಅಂಕಪಟ್ಟಿಯಲ್ಲಿ 3ನೇ ಸ್ಥಾನದಲ್ಲಿದೆ. ಈ ಪಂದ್ಯದಲ್ಲಿ ಗೆದ್ದರೆ ಲಖನೌ ಮತ್ತು ಕೆಕೆಆರ್ ಬಹುತೇಕ ಸಮಬಲ ಕಾಣಲಿವೆ. ಆಗ ಲಖನೌಗೆ ಸತತ 3ನೇ ಬಾರಿ ಪ್ಲೇಆಫ್ ಪ್ರವೇಶಿಸುವ ಅವಕಾಶವೂ ಹೆಚ್ಚಲಿದೆ. ಸನ್ರೈಸರ್ಸ್, ಸಿಎಸ್ಕೆ ನಿಕಟ ಪೈಪೋಟಿ ಒಡ್ಡುತ್ತಿರುವುದರಿಂದ ಲಖನೌ ಈ ಪಂದ್ಯದಲ್ಲಿ ಸೋತರೆ ಹಿನ್ನಡೆಯನ್ನೂ ಕಾಣಲಿದೆ.
ಲಖನೌಗೆ ತವರಿನ ಬಲ
ಲಖನೌ ತಂಡಕ್ಕೆ ತವರಿನ ಏಕನಾ ಕ್ರೀಡಾಂಗಣದಲ್ಲಿ ಇದು ಹಾಲಿ ಆವೃತ್ತಿಯ ಕೊನೆಯ ಪಂದ್ಯವಾಗಿದೆ. ಹಿಂದಿನ 6 ತವರಿನ ಪಂದ್ಯಗಳಲ್ಲಿ 4ರಲ್ಲಿ ಗೆದ್ದಿರುವ ಎಲ್ಎಸ್ಜಿ, 2ರಲ್ಲಿ ಸೋತಿದೆ. ನಾಯಕ ಕೆಎಲ್ ರಾಹುಲ್ ಮತ್ತು ಮಾರ್ಕಸ್ ಸ್ಟೋಯಿನಿಸ್ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ. ನಿಕೋಲಸ್ ಪೂರನ್ ಕೂಡ ಉಪಯುಕ್ತ ಕೊಡುಗೆ ನೀಡುತ್ತಿದ್ದಾರೆ. ಕಳೆದ ಪಂದ್ಯದಲ್ಲಿ ಯುವ ಆಟಗಾರ ಅರ್ಷಿನ್ ಕುಲಕರ್ಣಿ ಇನಿಂಗ್ಸ್ ಆರಂಭಿಸುವ ಅವಕಾಶ ಪಡೆದರೂ ಖಾತೆ ತೆರೆಯದೆ ನಿರಾಸೆ ಮೂಡಿಸಿದ್ದರು. ಕ್ವಿಂಟನ್ ಡಿಕಾಕ್ ಮರಳಿ ಕಣಕ್ಕಿಳಿಯುವ ಬದಲಾಗಿ ಅರ್ಷಿನ್ ಇನ್ನೊಂದು ಅವಕಾಶ ಪಡೆಯುವ ನಿರೀಕ್ಷೆ ಹೆಚ್ಚಿದೆ. ಬೌಲಿಂಗ್ ವಿಭಾಗದಲ್ಲಿ ಯುವ ಬೌಲರ್ಗಳೇ ಲಖನೌಗೆ ಶಕ್ತಿ ತುಂಬಿದ್ದಾರೆ. ಆದರೆ ಕಳೆದ ಪಂದ್ಯದಲ್ಲಿ ಮತ್ತೆ ಗಾಯಗೊಂಡ ಮಯಾಂಕ್ ಯಾದವ್ ಈ ಸಲ ಅಲಭ್ಯರಾಗಿದ್ದಾರೆ.
ವಿಶ್ವಾಸದಲ್ಲಿ ಕೆಕೆಆರ್
ಪಂಜಾಬ್ ಕಿಂಗ್ಸ್ ವಿರುದ್ಧ 261 ರನ್ ಪೇರಿಸಿಯೂ ಸೋಲು ಕಂಡಿದ್ದ ಕೆಕೆಆರ್, ಮುಂಬೈ ವಿರುದ್ಧ ಸ್ಪರ್ಧಾತ್ಮಕ ಮೊತ್ತ ಪೇರಿಸಿಯೂ ಅದನ್ನು ರಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ಇದರೊಂದಿಗೆ ಕೆಕೆಆರ್ ಆತ್ಮವಿಶ್ವಾಸ ವೃದ್ಧಿಸಿಕೊಂಡಿದೆ. 57 ರನ್ಗಳಿಗೆ 5 ವಿಕೆಟ್ ಉರುಳಿದ ನಡುವೆಯೂ ಗೆಲುವು ದಾಖಲಿಸಿರುವುದು ಕೆಕೆಆರ್ಗೆ ಎಂಥಾ ಪರಿಸ್ಥಿತಿಯಿಂದಲೂ ಪುಟಿದೆದ್ದು ಬರುವ ವಿಶ್ವಾಸ ತುಂಬಿದೆ. ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಟೂರ್ನಿಯಲ್ಲಿ ಮೊದಲ ಬಾರಿಗೆ ಆಡುವ ಮತ್ತು ಕೆಕೆಆರ್ ಪರ 7 ವರ್ಷಗಳ ಬಳಿಕ ಕಣಕ್ಕಿಳಿಯುವ ಅವಕಾಶ ಪಡೆದ ಕನ್ನಡಿಗ ಮನೀಷ್ ಪಾಂಡೆ ಗೆಲುವಿಗೆ ನೆರವಾಗುವ ಮೂಲಕ ಟೀಮ್ ಮ್ಯಾನೇಜ್ಮೆಂಟ್ ವಿಶ್ವಾಸ ಸಂಪಾದಿಸಿದ್ದು, ಈ ಬಾರಿ ಆಡುವ ಆರಂಭಿಕ 11ರ ಬಳಗದಲ್ಲೇ ಸ್ಥಾನ ಸಂಪಾದಿಸುವ ನಿರೀಕ್ಷೆ ಇದೆ. 2 ಪ್ರಮುಖ ಕ್ಯಾಚ್ ಹಿಡಿಯುವ ಮೂಲಕ ಅವರು ಫೀಲ್ಡಿಂಗ್ನಲ್ಲೂ ಮಿಂಚಿದ್ದರು.
ಮುಖಾಮುಖಿ: 4
ಲಖನೌ: 3
ಕೆಕೆಆರ್: 1
ಆರಂಭ: ರಾತ್ರಿ 7.30.
ನೇರಪ್ರಸಾರ: ಸ್ಟಾರ್ ಸ್ಪೋರ್ಟ್ಸ್, ಜಿಯೋಸಿನಿಮಾ.
IPL 2024: ಆರ್ಸಿಬಿಗೆ ಹ್ಯಾಟ್ರಿಕ್ ಜಯ; ಗುಜರಾತ್ ವಿರುದ್ಧ ಭರ್ಜರಿ ಬೌಲಿಂಗ್