ನವದೆಹಲಿ: ಭಾರತೀಯ ರೈಲ್ವೆ ಇಲಾಖೆಯು ಪ್ರಯಾಣಿಕರಿಗೆ ಸಿಹಿ ಸುದ್ದಿಯೊಂದನ್ನು ನೀಡಿದೆ. ಇದುವರೆಗೂ ನಡೆಯುತ್ತಿದ್ದ ಕಾನೂನು ಬಾಹಿರ ತತ್ಕಾಲ್ ಟಿಕೆಟ್ ಬುಕ್ಕಿಂಗ್ಗೆಲ್ಲ ಬ್ರೇಕ್ ಹಾಕಲಾಗಿದ್ದು ಇನ್ನು ಮುಂದೆ ಪ್ರಯಾಣಿಕರಿಗೆ ಹೆಚ್ಚಿನ ಸಂಖ್ಯೆಯಲ್ಲಿ ತತ್ಕಾಲ್ ಟಿಕೆಟ್ಗಳು ಲಭ್ಯವಾಗಲಿದೆ ಎಂದು ಇಲಾಖೆ ತಿಳಿಸಿದೆ.
ದೂರದೂರಿಗೆ ರೈಲಿನಲ್ಲಿ ಹೋಗಲು ಕೊನೆ ಕ್ಷಣದಲ್ಲಿ ತತ್ಕಾಲ್ ಟಿಕೆಟ್ ಬುಕ್ ಮಾಡಲಾಗುತ್ತದೆ. ರೈಲು ಹೊರಡುವುದಕ್ಕೂ ಒಂದು ದಿನ ಮೊದಲು ತತ್ಕಾಲ್ ಟಿಕೆಟ್ ಬುಕ್ ಮಾಡಲು ಅವಕಾಶ ಮಾಡಿಕೊಡಲಾಗುತ್ತದೆ. ಭಾರತೀಯ ರೈಲ್ವೆ ಇಲಾಖೆಯು ಐಆರ್ಸಿಟಿಸಿಗೆ ಅಧಿಕೃತವಾಗಿ ಟಿಕೆಟ್ ಬುಕ್ಕಿಂಗ್ ಮಾಡುವಂತಹ ಹಕ್ಕನ್ನು ನೀಡಿದೆ. ರೈಲ್ವೆ ಟಿಕೆಟ್ ಬುಕ್ಕಿಂಗ್ ಮಾಡುವುದಕ್ಕೆ ಇರುವುದು ಇದೊಂದೇ ವೆಬ್ಸೈಟ್ ಆಗಿದ್ದರೂ ಕೆಲವು ಹ್ಯಾಕರ್ಗಳು ಬೇರೆ ಬೇರೆ ವೆಬ್ಸೈಟ್ಗಳ ಮೂಲಕ ಟಿಕೆಟ್ ಬುಕ್ಕಿಂಗ್ ಮಾಡಲಾರಂಭಿಸಿದ್ದರು.
‘ANMS’, ‘MAC’ ಮತ್ತು ‘Jaguar’ ಸೇರಿದಂತೆ ಒಟ್ಟು 60ಕ್ಕೂ ಹೆಚ್ಚು ವೆಬ್ಸೈಟ್ಗಳ ಮೂಲಕ ತತ್ಕಾಲ್ ಟಿಕೆಟ್ಗಳನ್ನು ಮಾಡಲಾಗುತ್ತಿತ್ತು. ಅಧಿಕೃತ ವೆಬ್ಸೈಟ್ನಲ್ಲಿ ಕೇಳಲಾಗುವ ಕ್ಯಾಪ್ಚಾವಾಗಿರಲೀ ಅಥವಾ ಒಟಿಪಿಯಾಗಿರಲೀ ಯಾವುದನ್ನೂ ಬಳಸದೆಯೇ ಇಂತಹ ವೆಬ್ಸೈಟ್ಗಳಲ್ಲಿ ತತ್ಕಾಲ್ ಟಿಕೆಟ್ ಬುಕ್ ಮಾಡಲಾಗುತ್ತಿತ್ತು. ಅಧಿಕೃತ ವೆಬ್ಸೈಟ್ನಲ್ಲಿ ಒಂದು ತತ್ಕಾಲ್ ಟಿಕೆಟ್ ಬುಕ್ ಮಾಡುವುದಕ್ಕೆ 2.55 ನಿಮಿಷ ಸಮಯ ತೆಗೆದುಕೊಂಡರೆ, ಕೇವಲ 1.48 ನಿಮಿಷದಲ್ಲಿ ಈ ಅನಧಿಕೃತ ವೆಬ್ಸೈಟ್ಗಳು ಟಿಕೆಟ್ ಬುಕ್ ಮಾಡಿಬಿಡುತ್ತಿದ್ದವು. ವರ್ಷಕ್ಕೆ ಸುಮಾರು 50 ಕೋಟಿಯಿಂದ 100 ಕೋಟಿ ರೂಪಾಯಿ ಮೌಲ್ಯದ ಟಿಕೆಟ್ಗಳು ಈ ರೀತಿಯ ಅನಧಿಕೃತ ವೆಬ್ಸೈಟ್ಗಳಲ್ಲೇ ಬುಕ್ ಆಗುತ್ತಿದ್ದವು.
ಇದೀಗ ಪ್ರಯಾಣಿಕರ ಸ್ನೇಹಿ ನಿಲುವನ್ನು ತೆಗೆದುಕೊಂಡಿರುವ ರೈಲ್ವೆ ಇಲಾಖೆ ಅನಧಿಕೃತ ವೆಬ್ಸೈಟ್ಗಳನ್ನು ಗುರುತಿಸಿ ಅದರಲ್ಲಿದ್ದವರನ್ನು ಬಂಧಿಸಿದೆ. 60 ಕ್ಕೂ ಹೆಚ್ಚು ವೆಬ್ಸೈಟ್ಗಳು ಸ್ಥಗಿತಗೊಂಡಿದ್ದು ಅದರಲ್ಲಿ ಬುಕ್ಕಿಂಗ್ ಆಗುತ್ತಿದ್ದ ತತ್ಕಾಲ್ ಟಿಕೆಟ್ಗಳೆಲ್ಲವೂ ಐಆರ್ಸಿಟಿಯಲ್ಲಿಯೇ ಲಭ್ಯವಾಗುವಂತಾಗಿದೆ.
ಈ ಕುರಿತಾಗಿ ಮಾತನಾಡಿರುವ ರೈಲ್ವೆ ಪ್ರೊಟೆಕ್ಷನ್ ಫೋರ್ಸ್ನ ಮಹಾ ನಿರ್ದೇಶಕ ಅರುಣ್ ಕುಮಾರ್, “ರೈಲ್ವೆ ಟಿಕೆಟ್ ಬುಕ್ಕಿಂಗ್ ಶುದ್ಧೀಕರಣಕ್ಕೂ ಮೊದಲಿಗೂ ಈಗೂ ಹೋಲಿಸಿದರೆ ಸಾಕಷ್ಟು ವ್ಯತ್ಯಾಸ ಕಂಡುಬಂದಿವೆ. ಮೊದಲಿಗೆ ತತ್ಕಾಲ್ ಟಿಕೆಟ್ಗಳು ಬಹಳಷ್ಟು ಬೇಗ ಖಾಲಿಯಾಗಿಬಿಡುತ್ತಿದ್ದವು. ಆದರೆ ಈಗ ಸಾಕಷ್ಟು ಸಮಯದವರೆಗೂ ಲಭಿಸುತ್ತಿದೆ” ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)