ಚೆನ್ನೈ: ಅತಿಯಾದ ಪ್ಲಾಸ್ಟಿಕ್ ಬಳಕೆ ದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿದೆ. ಮತ್ತೊಂದೆಡೆ ಈ ಕರೊನಾ ಸಂಕಷ್ಟದಲ್ಲಿ ಸ್ವಚ್ಛತೆಯನ್ನು ಕಾಪಾಡುವುದು ಕೂಡ ಸವಾಲಾಗಿದೆ. ಆದರೆ ಎರಡಕ್ಕೂ ಉತ್ತರವೆಂಬಂತೆ ಆವಿಷ್ಕಾರವೊಂದು ನಡೆದಿದೆ. ಇದರಿಂದ ಪ್ಲಾಸ್ಟಿಕ್ ಸಮಸ್ಯೆಗೆ ಪರಿಹಾರ ಮಾತ್ರವಲ್ಲ, ಸೂಕ್ಷ್ಮಜೀವಿಯ ಸಂಹಾರವೂ ಈಡೇರಲಿದೆ.
ಇಂಥದ್ದೊಂದು ಆವಿಷ್ಕಾರವನ್ನು ಚೆನ್ನೈನಲ್ಲಿರುವ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ-ಮದ್ರಾಸ್ (ಐಐಟಿ-ಎಂ) ಮಾಡಿದೆ. ಆಹಾರ ಪದಾರ್ಥಗಳ ಪೊಟ್ಟಣ ಕಟ್ಟಲು ಸೂಕ್ಷ್ಮಜೀವಿ ನಿರೋಧಕ (ಆ್ಯಂಟಿಮೈಕ್ರೋಬಿಯಲ್) ವಸ್ತುವೊಂದನ್ನು ಐಐಟಿ-ಎಂ ಕಂಡು ಹಿಡಿದಿದೆ. ಪೊಟ್ಟಣ ಕಟ್ಟಲು ಬಳಸುವ ಪ್ಲಾಸ್ಟಿಕ್ನಂಥ ಈ ವಸ್ತು ಸೂಕ್ಷ್ಮಜೀವಿ ನಿರೋಧಕವಾಗಿ ಕೆಲಸ ಮಾಡಲಿದೆ. ಮಾತ್ರವಲ್ಲ ಬಳಸಿ ಎಸೆದಾಗ ಪ್ರಕೃತಿಸಹಜವಾಗಿ ಮಣ್ಣಲ್ಲಿ ಮಣ್ಣಾಗಲಿದೆ.
ಇದರಲ್ಲಿ ಇನ್ಬಿಲ್ಟ್ ಆ್ಯಂಟಿ ಬ್ಯಾಕ್ಟೀರಿಯಲ್ ಕಾಂಪೌಂಡ್ ಇದ್ದು, ಇದು ಸಂಗ್ರಹಿತ ಆಹಾರದ ಪೊಟ್ಟಣದಲ್ಲಿ ಬ್ಯಾಕ್ಟೀರಿಯಾ ಬೆಳೆಯದಂತೆ ನೋಡಿಕೊಳ್ಳುತ್ತದೆ. ಅಲ್ಲದೆ ಈ ಸಂಯುಕ್ತವಸ್ತು ಸೇವನೆಗೆ ಯೋಗ್ಯವಿದ್ದು, ಯಾವುದೇ ಅಡ್ಡಪರಿಣಾಮ ಇರುವುದಿಲ್ಲ ಎಂದು ಐಐಟಿ-ಎಂ ಬಯೋಟೆಕ್ನಾಲಜಿ ವಿಭಾಗದ ಮುಖೇಶ್ ದೊಬ್ಲೆ ಹೇಳಿಕೊಂಡಿದ್ದಾರೆ.
ಪೊಟ್ಟಣ ಕಟ್ಟುವ ಈ ವಸ್ತುವನ್ನು ಸ್ಟಾರ್ಚ್, ಪಾಲಿವಿನೈಲ್ ಆಲ್ಕೋಹಾಲ್, ಸೈಕ್ಲಿಕ್ ಬೀಟಾ ಗ್ಲೈಕ್ಯಾನ್ಸ್(ಸಿಬಿಜಿ)ಗಳ ಪಾಲಿಮೆರಿಕ್ ಬ್ಲೆಂಡ್ನಿಂದ ಮಾಡಲಾಗಿದೆ. ಇದಕ್ಕೆ ಬಳಸಲಾಗಿರುವ ವಸ್ತುಗಳು ಯುಎಸ್ ಫುಡ್ ಆ್ಯಂಡ್ ಡ್ರಗ್ ಅಡ್ಮಿನಿಸ್ಟ್ರೇಷನ್ನಿಂದ ಮಾನ್ಯತೆ ಪಡೆದಿವೆ. ಬಳಸಲಾಗಿರುವ ಆ್ಯಂಟಿ ಬ್ಯಾಕ್ಟೀರಿಯಲ್ ಏಜೆಂಟ್ಗಳೂ ಆಹಾರ ಪ್ರಾಧಿಕಾರಗಳ ಮಾನ್ಯತೆ ಪಡೆದಿವೆ ಎಂದು ಅವರು ತಿಳಿಸಿದ್ದಾರೆ.
ಬಳಕೆ ಬಳಿಕ ಎಸೆಯಲಾಗುವ ಈ ವಸ್ತು 21 ದಿನಗಳಲ್ಲಿ ಶೇ. 4ರಿಂದ 98ರಷ್ಟು ಕೊಳೆತು ಪ್ರಕೃತಿಸಹಜವಾಗಿ ವಿಲೀನವಾಗಲಿದೆ. ತೇವದ ವಾತಾವರಣದಲ್ಲಿ ಈ ಪ್ರಕ್ರಿಯೆ ಮತ್ತಷ್ಟು ವೇಗವಾಗಿ ನಡೆಯಲಿದೆ. ಪನೀರ್, ಮಾಂಸ, ಚಿಕನ್ ಮುಂತಾದ ವಸ್ತುಗಳನ್ನು ಇದರಲ್ಲಿ ಪೊಟ್ಟಣ ಕಟ್ಟಬಹುದಾಗಿದೆ ಹಾಗೂ ಇದರ ಕಾರ್ಯಕ್ಷಮತೆ ಸಾಬೀತಾಗಿದೆ ಎಂದು ಅವರು ತಿಳಿಸಿದ್ದಾರೆ. (ಏಜೆನ್ಸೀಸ್)