ವೆಲ್ಲಿಂಗ್ಟನ್: ಮಹಿಳೆಯರ ಟಿ20 ವಿಶ್ವಕಪ್ ಯಶಸ್ವಿಯಾಗಿ ಮುಗಿದ ಬೆನ್ನಲ್ಲಿಯೇ ಅಂತಾರಾಷ್ಟ್ರೀಯ ಕ್ರಿಕೆಟ್ ಸಮಿತಿ ಮುಂದಿನ ವರ್ಷ ನ್ಯೂಜಿಲೆಂಡ್ ಆತಿಥ್ಯದಲ್ಲಿ ನಡೆಯಲಿರುವ ಮಹಿಳೆಯರ ಏಕದಿನ ವಿಶ್ವಕಪ್ನ ವೇಳಾಪಟ್ಟಿ ಪ್ರಕಟಿಸಿದೆ. ಟಿ20 ವಿಶ್ವಕಪ್ನ ನಾಕೌಟ್ ವೇಳೆ ಮೀಸಲು ದಿನಗಳ ವ್ಯವಸ್ಥೆ ಮಾಡದೇ ದೊಡ್ಡ ಪಾಠ ಕಲಿತಿರುವ ಐಸಿಸಿ, 2021ರಲ್ಲಿ ನಡೆಯಲಿರುವ ಏಕದಿನ ವಿಶ್ವಕಪ್ನ ಎರಡು ಸೆಮಿಫೈನಲ್ ಹಾಗೂ ಫೈನಲ್ ಪಂದ್ಯಗಳಿಗೆ ಮೀಸಲು ದಿನಗಳ ವ್ಯವಸ್ಥೆ ಮಾಡಿದೆ.
31 ಪಂದ್ಯಗಳ ವೇಳಾಪಟ್ಟಿಯನ್ನು ಬುಧವಾರ ನ್ಯೂಜಿಲೆಂಡ್ನ ಪ್ರಧಾನಿ ಜೆಸಿಂದಾ ಆರ್ಡ್ರೆನ್, ಐಸಿಸಿ ಸಿಇಒ ಮನು ಸಾವನಿ ಅನಾವರಣ ಮಾಡಿದರು. ಕಳೆದ ವಾರ ನಡೆದ ಟಿ20 ವಿಶ್ವಕಪ್ನ ಸೆಮಿಫೈನಲ್ನಲ್ಲಿ ಇಂಗ್ಲೆಂಡ್ ತಂಡ ಪಂದ್ಯವಾಡದೇ ಟೂರ್ನಿಯಿಂದ ಹೊರಬಿದ್ದಿದ್ದಿತ್ತು. ವಾಶೌಟ್ ಆಗಿದ್ದ ಕಾರಣಕ್ಕೆ ಭಾರತ ತಂಡ ಟೂರ್ನಿಯ ಫೈನಲ್ಗೆ ಲಗ್ಗೆ ಇಟ್ಟಿತ್ತು. ಮಹಿಳೆಯರ ಏಕದಿನ ವಿಶ್ವಕಪ್ ಟೂರ್ನಿ ನ್ಯೂಜಿಲೆಂಡ್ನ ಆರು ಸ್ಟೇಡಿಯಂಗಳಲ್ಲಿ ನಡೆಯಲಿದೆ. ಈಡನ್ ಪಾರ್ಕ್ (ಆಕ್ಲೆಂಡ್), ಬೇ ಓವಲ್ (ಟೌರಂಗ), ಸೆಡ್ಡಾನ್ ಪಾರ್ಕ್ (ಹ್ಯಾಮಿಲ್ಟನ್), ಯುನಿವರ್ಸಿಟಿ ಓವಲ್ (ಡುನೆಡಿನ್), ಬೇಸಿನ್ ರಿಸರ್ವ್ (ವೆಲ್ಲಿಂಗ್ಟನ್) ಹಾಗೂ ಹ್ಯಾಗ್ಲೆ ಓವಲ್ (ಕ್ರೖೆಸ್ಟ್ಚರ್ಚ್) ಮೈದಾನಗಳಲ್ಲಿ ನಡೆಯಲಿವೆ. ಬೇಸಿನ್ ರಿಸರ್ವ್ ನಲ್ಲಿ ಫೆ. 13 ರಂದು ನ್ಯೂಜಿಲೆಂಡ್- ಆಸ್ಟ್ರೇಲಿಯಾ ಎದುರಾಗಲಿವೆ.