ನವದೆಹಲಿ: ಭಾರತದ ಮೊದಲ ಕೋವಿಡ್-19 ರೋನಿರೋಧಕ ಚುಚ್ಚುಮದ್ದು ಕೊವಾಕ್ಸಿನ್ ಅನ್ನು ಭಾರತ್ ಬಯೋಟೆಕ್ ಇಂಡಿಯಾ (ಬಿಬಿಐಎಲ್) ಸಿದ್ಧಪಡಿಸಿದೆ. ಮನುಷ್ಯರ ಮೇಲೆ ಇದರ ಪ್ರಯೋಗ ನಡೆಸಲು ಭಾರತೀಯ ಔಷಧ ನಿಯಂತ್ರಣ ಮಂಡಳಿಯಿಂದಲೂ ಅನುಮತಿ ಪಡೆದುಕೊಳ್ಳಲಾಗಿದೆ. ಈ ಪರೀಕ್ಷೆಗಳು ಜುಲೈನಿಂದ ಆರಂಭವಾಗಲಿದೆ. ಹಾಗಾದರೆ ಭಾರತದ ಮೊದಲ ಕೋವಿಡ್ ಚುಚ್ಚುಮದ್ದು ತಯಾರಾಗಿದ್ದು ಹೇಗೆ?
ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ ಹಾಗೂ ರಾಷ್ಟ್ರೀಯ ವೈರಾಲಜಿ ಸಂಸ್ಥೆಯ ಸಹಾಯದೊಂದಿಗೆ ಬಿಬಿಐಎಲ್ ಕೊವಾಕ್ಸಿನ್ ರೋಗನಿರೋಧಕ ಚುಚ್ಚುಮದ್ದನ್ನು ಅಭಿವೃದ್ಧಿಪಡಿಸಿದೆ. ಇದಕ್ಕಾಗಿ ರಾಷ್ಟ್ರೀಯ ವೈರಾಲಜಿ ಸಂಸ್ಥೆ ಕೋವಿಡ್ ರೋಗ ಲಕ್ಷಣವಿಲ್ಲದ ರೋಗಿಯೊಬ್ಬರ ದೇಹದಲ್ಲಿದ್ದ ಕರೊನಾ ವೈರಾಣುವಿನಿಂದ ಸ್ಟ್ರೈನ್ ಒಂದನ್ನು ಪ್ರತ್ಯೇಕಿಸಿ ಮೇ ಮೊದಲ ವಾರದಲ್ಲಿ ಬಿಬಿಐಎಲ್ಗೆ ನೀಡಿತ್ತು. ಬಿಬಿಐಎಲ್ ಇದನ್ನು ಬಳಸಿಕೊಂಡು ಇನ್ಆ್ಯಕ್ಟಿವೇಟೆಡ್ ರೋಗನಿರೋಧಕ ಚುಚ್ಚುಮದ್ದು ಅಂದರೆ, ಸತ್ತ ವೈರಾಣುವನ್ನು ಬಳಸಿಕೊಂಡು ರೋಗನಿರೋಧಕ ಚುಚ್ಚುಮದ್ದನ್ನು ಅಭಿವೃದ್ಧಿಪಡಿಸಿತು.
ಇದನ್ನೂ ಓದಿ: ಟಿಬೆಟ್ನಂತೆ ಹಾಂಗ್ಕಾಂಗನ್ನು ಹೊಸಕಿದ ಚೀನಾ; ಭದ್ರತಾ ಕಾಯ್ದೆ ಅಂಗೀಕಾರ; ಪ್ರಜಾಪ್ರಭುತ್ವ ಹೋರಾಟಕ್ಕೆ ಭಾರಿ ಹಿನ್ನಡೆ
ಈ ಚುಚ್ಚುಮದ್ದನ್ನು ಮನುಷ್ಯರಿಗೆ ಕೊಟ್ಟಾಗ, ಅವರಿಗೆ ಸೋಂಕು ಉಂಟಾಗುವುದಾಗಲಿ ಅಥವಾ ಕರೊನಾ ವೈರಾಣು ದ್ವಿಗುಣಗೊಳ್ಳಲಾಗಲಿ ಇದು ಅವಕಾಶ ಕೊಡುವುದಿಲ್ಲ. ಹಾಗಾಗಿ ಇದನ್ನು ಸಾಯಿಸಿದ ವೈರಾಣು ಎಂದು ಪರಿಗಣಿಸಲಾಗುತ್ತದೆ. ಮತ್ತು ಸೋಂಕಿತ ವ್ಯಕ್ತಿಯಲ್ಲಿ ವೈರಾಣುವಿನ ವಿರುದ್ಧ ನಿರೋಧಕವಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಬಿಬಿಐಎಲ್ ವಿವರಿಸಿದೆ. ಈ ರೀತಿಯ ಇನ್ಆ್ಯಕ್ಟಿವೇಟೆಡ್ ರೋಗನಿರೋಧಕ ಚುಚ್ಚುಮದ್ದುಗಳು ಬಳಕೆಗೆ ತುಂಬಾ ಸುರಕ್ಷಿವಾಗಿರುತ್ತದೆ ಎಂದು ಹೇಳಿದೆ.
ಚುಚ್ಚುಮದ್ದ ಸಿದ್ಧವಾದ ಬಳಿಕ ಪ್ರೀಕ್ಲಿನಿಕಲ್ ಪರೀಕ್ಷೆಗೆ ಒಳಪಡಿಸಲಾಯಿತು. ಅಂದರೆ ಗಿನಿಯಾ ಪಿಗ್ ಮತ್ತು ಇಲಿಗಳ ಮೇಲೆ ಇದನ್ನು ಪ್ರಯೋಗಿಸಿ, ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲಾಯಿತು. ಆನಂತರದಲ್ಲಿ ಅದು ಮನುಷ್ಯರ ಮೇಲೆ ಪ್ರಯೋಗಿಸಲು ಅಗತ್ಯ ಅನುಮತಿಗಳನ್ನು ಪಡೆದುಕೊಂಡು, ಜುಲೈನಿಂದ ಆ ಕಾರ್ಯವನ್ನು ಆರಂಭಿಸಲಿದೆ.
‘ಕರೊನಿಲ್’ನಿಂದ ಕರೊನಾ ಸೋಂಕು ನಿವಾರಣೆಯಾಗುತ್ತದೆ ಎಂದು ನಾವು ಹೇಳೇ ಇಲ್ಲ; ಪತಂಜಲಿ ಯೂ ಟರ್ನ್