ಬೆಂಗಳೂರು: ಕಬ್ಬನ್ ಪಾರ್ಕ್ನಲ್ಲಿ ಸಮಯ ಕಳೆಯುತ್ತಿದ್ದ ಪ್ರೇಮಿಗಳಿಗೆ ಕಬ್ಬನ್ ಪಾರ್ಕ್ ಆಡಳಿತ ಮಂಡಳಿ ಶಾಕ್ ನೀಡಿದೆ. ಇನ್ನು ಮುಂದೆ ಪ್ರೇಮಿಗಳಿಗೆ ಪಾರ್ಕ್ನಲ್ಲಿ ಪ್ರವೇಶ ನಿರಾಕರಿಸಲಾಗುತ್ತದೆ. ಪ್ರೇಮಿಗಳ ಅಸಭ್ಯ ವರ್ತನೆಯ ಬಗ್ಗೆ ಸಾಕಷ್ಟು ದೂರುಗಳು ಬಂದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಇನ್ಮುಂದೆ ಕಬ್ಬನ್ ಪಾರ್ಕ್ನಲ್ಲಿ ಲವರ್ಸ್ ಮನಸ್ಸಿಗೆ ಬಂದಂತೆ ವರ್ತಿಸುವಂತಿಲ್ಲ. ಪ್ರೇಮಿಗಳ ವಿಹಾರ ತಾಣವಾಗಿದ್ದ ಕಬ್ಬನ್ ಪಾರ್ಕ್ನಲ್ಲಿ ಇನ್ಮುಂದೆ ಪ್ರೇಮಿಗಳಿಗೆ ಕಡಿವಾಣ ಬೀಳಲಿದೆ. ಇಷ್ಟು ದಿನ ಮರದ ಕೆಳಗೆ ಮನದ ಮಾತುಗಳಾಡುತ್ತಿದ್ದ ಪ್ರೇಮಿಗಳಿಗೆ ಆಡಳಿತ ಮಂಡಳಿಯ ನಿರ್ಧಾರ ಶಾಕ್ ನೀಡಿದೆ.
ಮೈಕ್ನಲ್ಲಿ ಘೋಷಣೆ
ಸದ್ಯ ಕಬ್ಬನ್ ಪಾರ್ಕ್ನಲ್ಲಿ ಅಸಭ್ಯವಾಗಿ ವರ್ತಿಸುವ ಜೋಡಿಗಳ ಮೇಲೆ ಆಡಳಿತ ಮಂಡಳಿ ಕಣ್ಣಿಟ್ಟಿದೆ. ಪಾರ್ಕ್ನಲ್ಲಿ ಅಸಭ್ಯವಾಗಿ ವರ್ತಿಸದಂತೆ ಮೈಕ್ನಲ್ಲಿ ಘೋಷಿಸಲಾಗುತ್ತಿದೆ. ಪಾರ್ಕಿಗೆ ಪ್ರೇಮಿಗಳು ಪ್ರವೇಶಿಸಿದರು ದೂರ ದೂರ ಕುಳಿತು ಮಾತನಾಡಬೇಕಿದೆ.
ಸರಸ ಸಲ್ಲಾಪಕ್ಕೆ ಬ್ರೇಕ್
ಪ್ರೇಮಿಗಳು ಅಸಭ್ಯವಾಗಿ ವರ್ತಿಸುತ್ತಿದ್ದಾರೆ ಅಂತ ಕಬ್ಬನ್ ಪಾರ್ಕ್ಗೆ ಬರುವ ಕುಟುಂಬದವರಿಂದ ಸಾಕಷ್ಟು ದೂರುಗಳು ಬಂದಿವೆ ಮತ್ತು ಬರುತ್ತಲೇ ಇವೆ. ಈ ಹಿನ್ನೆಲೆಯಲ್ಲಿ ಪಾರ್ಕಿನಲ್ಲಿ ಪ್ರೇಮಿಗಳ ಸರಸ ಸಲ್ಲಾಪಕ್ಕೆ ಬ್ರೇಕ್ ಹಾಕಲಾಗಿದೆ. ಯಾರು ಕೂಡ ಅಶ್ಲೀಲವಾಗಿ ವರ್ತಿಸಬಾರದು ಎಂದು ಪಾರ್ಕಿನ ಸೆಕ್ಯುರಿಟಿ ಮಂಜುನಾಥ್ ಮೈಕ್ನಲ್ಲಿ ನಿತ್ಯವು ಘೋಷಣೆ ಕೂಗುತ್ತಿದ್ದಾರೆ.
ಎಚ್ಚರಿಕೆಯ ನಡುವೆಯೂ ಅಸಭ್ಯ ವರ್ತನೆಯಲ್ಲಿ ತೊಡಗಿದರೆ, ಅಂಥವರನ್ನು ಕಬ್ಬನ್ ಪಾರ್ಕ್ನಿಂದ ಸೆಕ್ಯುರಿಟಿಗಳು ಹೊರಗಡೆ ಕಳಿಸುತ್ತಿದ್ದಾರೆ. (ದಿಗ್ವಿಜಯ ನ್ಯೂಸ್)
ನಟ ಸುದೀಪ್ಗೆ ಬೆದರಿಕೆ ಪತ್ರ ಪ್ರಕರಣ: ಆ ಒಬ್ಬನಿಗಾಗಿ ಸಿಸಿಬಿ ಪೊಲೀಸರಿಂದ ತೀವ್ರ ಹುಡುಕಾಟ