ಇಸ್ಲಾಮಾಬಾದ್: ಪಾಕಿಸ್ತಾನದಲ್ಲಿ ಅವಿತಿರುವ ಭಾರತಕ್ಕೆ ತುಂಬಾ ಬೇಕಾಗಿರುವ ಭೂಗತ ಕ್ರಿಮಿ, ಉಗ್ರ ದಾವೂದ್ ಇಬ್ರಾಹಿಂ ಕೋವಿಡ್-19 ಸೋಂಕಿಗೆ ಬಲಿಯಾಗಿದ್ದಾನೆ ಎಂಬ ಸುದ್ದಿ ಭಾರಿ ವೈರಲ್ ಆಗುತ್ತಿದೆ.
ಶುಕ್ರವಾರ ಸಾಮಾಜಿಕ ಜಾಲತಾಣದಲ್ಲಿ 1993ರ ಮುಂಬೈ ಸರಣಿ ಸ್ಫೋಟದ ಸಂಚುಕೋರ ಮತ್ತು ಆತನ ಪತ್ನಿ ಶಕೀಲಾ ಕೋವಿಡ್-19 ಸೋಂಕಿಗೆ ತುತ್ತಾಗಿದ್ದಾರೆ. ಪಾಕ್ನಲ್ಲಿ ಸೇನಾ ಆಸ್ಪತ್ರೆಗೆ ಅವರನ್ನು ದಾಖಲಿಸಲಾಗಿದೆ ಎಂಬ ಸುದ್ದಿ ವೈರಲ್ ಆಗಿತ್ತು. ಶನಿವಾರದ ವೇಳೆಗೆ ಆತ ಕರೊನಾ ಸೋಂಕಿಗೆ ಬಲಿಯಾಗಿರುವ ಸುದ್ದಿ ವೈರಲ್ ಆಗುತ್ತಿದೆ.
ಆದರೆ, ದಾವೂದ್ ಇಬ್ರಾಹಿಂ ಸತ್ತಿಲ್ಲ. ಆತನಿಗಾಗಲಿ ಅಥವಾ ಆತನ ಪತ್ನಿಗಾಗಲಿ ಕರೊನಾ ಸೋಂಕು ತಗುಲಿಲ್ಲ. ಅಷ್ಟೇ ಅಲ್ಲ, ಆತನ ಸಹಚರರಲ್ಲಿ ಆಗಲಿ ಯಾರಿಗೂ ಕರೊನಾ ಸೋಂಕು ತಗುಲಿಲ್ಲ. ಎಲ್ಲರೂ ಆರೋಗ್ಯವಾಗಿದ್ದಾರೆ ಎಂದು ದಾವೂದ್ನ ಸಹೋದರ ಅನೀಸ್ ಇಬ್ರಾಹಿಂ ಶನಿವಾರ ಟ್ವೀಟ್ ಮಾಡಿ ಸ್ಪಷ್ಟಪಡಿಸಿದ್ದಾನೆ.
ಇದೇ ಮೊದಲಲ್ಲ: ಭೂಗತ ಕ್ರಿಮಿ ದಾವೂದ್ ಇಬ್ರಾಹಿಂ ಮೃತಪಟ್ಟಿದ್ದಾನೆ ಅಥವಾ ಬಂಧಿಸಲ್ಪಟ್ಟಿದ್ದಾನೆ ಎಂಬ ವದಂತಿಗಳು ಇದೇ ಮೊದಲೇನಲ್ಲ. ಇದಕ್ಕೂ ಮುನ್ನ ಹಲವು ಬಾರಿ ಈತನ ಸಾವು ಮತ್ತು ಬಂಧನದ ಬಗ್ಗೆ ಸಾಕಷ್ಟು ವದಂತಿಗಳು ಹಬ್ಬಿದ್ದವು. ಆದರೆ ಪ್ರತಿಬಾರಿಯೂ ಆತ ಬಹಿರಂಗವಾಗಿ ಕಾಣಿಸಿಕೊಳ್ಳುವ ಮೂಲಕ ಆ ವದಂತಿಗಳನ್ನು ಸುಳ್ಳೆಂದು ಸಾಬೀತುಪಡಿಸುತ್ತಿದ್ದ. ಆದರೆ, ಈ ಬಾರಿ ಇನ್ನೂ ಆತ ಎಲ್ಲಿಯೂ ಕಾಣಿಸಿಕೊಂಡಿಲ್ಲ.
ಇದನ್ನೂ ಓದಿ: ಡಬಲ್ ಗೇಮ್ ಮುಂದುವರಿಸಿದೆ ಪಾಕ್; ಭಾರತದ ಭದ್ರತಾ ಸಂಸ್ಥೆಗಳ ಕಾರ್ಯಾಚರಣೆಯಲ್ಲಿ ಬಯಲಾಯ್ತು ಸತ್ಯ
ಆಫ್ರಿದಿ ಮತ್ತು ದ ಅಂಡರ್ಟೇಕರ್ ಮುಂಚೂಣಿಗೆ: ದಾವೂದ್ ಇಬ್ರಾಹಿಂ ಸಾವಿನ ವದಂತಿ ದಟ್ಟವಾಗುತ್ತಿರುವಂತೆ ಸಾಮಾಜಿಕ ಜಾಲತಾಣ ಟ್ವಿಟರ್ನಲ್ಲಿ ಡಬ್ಲ್ಯುಡಬ್ಲ್ಯುಇನ ಫೈಟರ್ ದ ಅಂಡರ್ಟೇಕರ್ ಮತ್ತು ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ನಾಯಕ ಶಾಹೀದ್ ಆಫ್ರಿದಿ ಹೆಸರು ಭಾರಿ ಟ್ರೆಂಡಿಂಗ್ಗೆ ಬಂದಿದ್ದಾವೆ.
ಡಬ್ಲ್ಯುಡಬ್ಲ್ಯುಇನ ಸೂಪರ್ಸ್ಟಾರ್ ದ ಅಂಡರ್ಟೇಕರ್ ಕೂಡ ರಿಂಕ್ನಲ್ಲಿ ಹೋರಾಡುತ್ತಾ ಆಗಾಗ ಸಾಯುತ್ತಲೇ ಇರುತ್ತಾರೆ. ಆದರೆ, ಮರುದಿನ ಇಲ್ಲವೇ ಮರುವಾರದ ಫೈಟ್ಗಳಲ್ಲಿ ಕಾಣಿಸಿಕೊಂಡು ತಮ್ಮ ಸಾವಿನ ಸುದ್ದಿಯನ್ನು ಸುಳ್ಳೆಂದು ಸಾಬೀತುಪಡಿಸುತ್ತಿರುತ್ತಾರೆ. ಇವರಂತೆ ಪಾಕಿಸ್ತಾನ ಕ್ರಿಕೆಟ್ ತಂಡದ ಮಾಜಿ ನಾಯಕ ಶಾಹೀದ್ ಆಫ್ರಿದಿ ಕೂಡ ಹಲವು ಬಾರಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಿಂದ ನಿವೃತ್ತಿ ಘೋಷಿಸಿದ್ದರೂ, ಅಷ್ಟೂ ಬಾರಿ ನಿವೃತ್ತಿಯಿಂದ ಹೊರಬಂದು ಪಾಕ್ ಜೆರ್ಸಿಯಲ್ಲಿ ಕಾಣಿಸಿಕೊಂಡ ಶಾಕ್ ಕೊಟ್ಟ ಹಲವು ಉದಾಹರಣೆಗಳಿವೆ. ಆದರೆ, ಈ ಬಾರಿ ಅವರು 2017ರಲ್ಲಿ ನಿವೃತ್ತಿ ಹೊಂದಿದ ನಂತರದಲ್ಲಿ ಮತ್ತೆಂದೂ ಪಾಕ್ ಜೆರ್ಸಿ ತೊಟ್ಟಿಲ್ಲ ಎಂಬುದು ವಿಶೇಷ.
ಇವರಿಬ್ಬರಂತೆ ದಾವೂದ್ ಕೂಡ ತನ್ನ ಸಾವಿನ ಸುದ್ದಿ ಹಬ್ಬಿದಾಗಲೆಲ್ಲ ರಕ್ತಬೀಜಾಸುರನಂತೆ ಮತ್ತೊಮ್ಮೆ ಹುಟ್ಟಿ ಬಂದವನ ರೀತಿ ಕಾಣಿಸಿಕೊಳ್ಳುತ್ತಾನೆ. ಹಾಗಾಗಿ ಆತನ ಸಾವಿನ ಸುದ್ದಿ ಹಬ್ಬುತ್ತಲೇ ದ ಅಂಡರ್ಟೇಕರ್ ಮತ್ತು ಶಾಹೀದ್ ಆಫ್ರಿದಿ ಹೆಸರು ಟ್ವಿಟರ್ನಲ್ಲಿ ಟ್ರೆಂಡಿಂಗ್ಗೆ ಬಂದಿದೆ ಎಂದು ಹೇಳಲಾಗುತ್ತಿದೆ.
ಮಿಯಾಂವ್ ಮಿಯಾಂವ್: ಬೆಕ್ಕಿನ ಚಿತ್ರದೊಂದಿಗೆ ಮುಂಬೈ ಜನತೆಗೆ ಪೊಲೀಸರ ಎಚ್ಚರಿಕೆ!