ಪಟನಾ: ಸಿದ್ಧಾರ್ಥ್‌ ದೇಸಾಯಿ (11 ಅಂಕ) ಮತ್ತು ಶಿವಂ (12 ಅಂಕ) ಅವರ ಸೂಪರ್‌ ಟೆನ್‌ ಸಾಹಸದಿಂದ ಹರಿಯಾಣ ಸ್ಟೀಲರ್ಸ್‌ ತಂಡ ಪ್ರೊ ಕಬಡ್ಡಿ ಲೀಗ್‌ 10ನೇ ಆವೃತ್ತಿಯಲ್ಲಿ 5 ಅಂಕಗಳಿಂದ ಬೆಂಗಾಲ್‌ ವಾರಿಯರ್ಸ್‌ ತಂಡವನ್ನು ಪರಾಭವಗೊಳಿಸಿದೆ. ಪಾಟಲೀಪುತ್ರ ಒಳಾಂಗಣ ಕ್ರೀಡಾಂಗದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್‌ 41-36 ಅಂಕಗಳ ಅಂತರದಿಂದ ವಾರಿಯರ್ಸ್‌ ಸವಾಲನ್ನು ಮೆಟ್ಟಿನಿಂತಿತು. ಜತೆಗೆ ಹಿಂದಿನ ದಬಾಂಗ್‌ ದಿಲ್ಲಿ ಎದುರಿನ ಸೋಲಿನಿಂದ ಸ್ಟೀಲರ್ಸ್‌ ತಂಡ ಹೊರಬಂದಿತು. ಸ್ಟೀಲರ್ಸ್‌ ಪರ ಸಿದ್ಧಾರ್ಥ್‌ ಮತ್ತು ಶಿವಂ ಅಲ್ಲದೆ, ವಿನಯ್‌ 6 ಅಂಕ ಗಳಿಸಿ ಗೆಲುವಿಗೆ ಬೆಂಬಲ ವ್ಯಕ್ತಪಡಿಸಿದರು.
ಮಣಿಂದರ್‌ ಸಿಂಗ್‌ (13 ಅಂಕ), ನಿತಿನ್‌ ಕುಮಾರ್‌ (9 ಅಂಕ) ಮತ್ತು ಶ್ರೀಕಾಂತ್‌ (7 ಅಂಕ) ದಿಟ್ಟ ಹೋರಾಟ ನೀಡಿದರೂ ತಂಡದ ಹ್ಯಾಟ್ರಿಕ್‌ ಸೋಲು ತಪ್ಪಿಸಲು ಸಾಧ್ಯವಾಗಲಿಲ್ಲ. ಹಿನ್ನಡೆ ತಗ್ಗಿಸುವ ಭರವಸೆಯಲ್ಲಿ ಎರಡನೇ ಅವಧಿಯನ್ನು ಆರಂಭಿಸಿ ಜೈದೀಪ್‌ ದಹಿಯಾ ನೇತೃತ್ವದ ಸ್ಟೀಲರ್ಸ್‌ ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿತು. ಇದರ ಫಲವಾಗಿ 24ನೇ ನಿಮಿಷದಲ್ಲಿಬೆಂಗಾಲ್‌ ತಂಡವನ್ನು ಆಲೌಟ್‌ ಮಾಡಿದ ಹರಿಯಾಣ, ಮುನ್ನಡೆ ಕಾಯ್ದುಕೊಳ್ಳುವಲ್ಲಿ ಸಫಲಗೊಂಡಿತು. ಮೊದಲ ಅವಧಿಯಲ್ಲಿ ಗಮನ ಸೆಳೆದಿದ್ದ ಸ್ಟಾರ್‌ ರೈಡರ್‌ ಸಿದ್ಧಾರ್ಥ್‌, ದ್ವಿತೀಯಾರ್ಧದಲ್ಲಿ ಅಬ್ಬರಿಸಿ ಸೂಪರ್‌ ಟೆನ್‌ ಸಾಧನೆ ಮಾಡಿದರು. ಅನುಭವಿ ಮಣಿಂದರ್‌ ಸಿಂಗ್‌ ನಾಯಕತ್ವದ ಬೆಂಗಾಲ್‌ ಕೂಡ ಪ್ರತಿ ಹೋರಾಟ ಸಂಘಟಿಸಿತು.ನಿತಿನ್‌ ಕುಮಾರ್‌ ಮತ್ತು ಶ್ರೀಕಾಂತ್‌ ಜಾಧವ್‌ ಆಕರ್ಷಕ ರೇಡಿಂಗ್‌ ಮೂಲಕ ತಂಡದ ಹೋರಾಟಕ್ಕೆ ಬೆಂಬಲ ಸೂಚಿಸಿದರು.
ಪಂದ್ಯ ಮುಕ್ತಾಯಕ್ಕೆ 10 ನಿಮಿಷಗಳಿರುವಾಗ ಹರಿಯಾಣ (31-27) ನಾಲ್ಕು ಅಂಕಗಳ ಮುನ್ನಡೆ ಕಾಯ್ದುಕೊಂಡು ಗೆಲುವಿನ ವೇದಿಕೆ ಹೇರುವ ಮುನ್ಸೂಚನೆ ನೀಡಿತು. 30ರಿಂದ 35 ನಿಮಿಷಗಳ ಆಟದಲ್ಲಿ ಆಲ್‌ರೌಂಡ್‌ ಪ್ರದರ್ಶನ ಹೊರಹಾಕಿದ ಹರಿಯಾಣ 9 ಅಂಕ ಕಲೆಹಾಕಿದರೆ, ಬೆಂಗಾಲ್‌ ಕೇವಲ 3 ಅಂಕಗಳಿಗೆ ಸೀಮಿತಗೊಂಡಿತು. 33ನೇ ನಿಮಿಷದಲ್ಲಿವಾರಿಯರ್ಸ್‌ ತಂಡವನ್ನು ಆಲೌಟ್‌ ಮಾಡಿದ ಹರಿಯಾಣ ತನ್ನ ಮುನ್ನಡೆಯನ್ನು 9 ಅಂಕಗಳಿಗೆ (39-30) ವಿಸ್ತರಿಸಿಕೊಂಡಿತು. ಇದರಿಂದ ಸಹಜವಾಗಿ ಒತ್ತಡಕ್ಕೆ ಸಿಲುಕಿದ ಮಣಿಂದರ್‌ ಬಳಗ ಹೊಂದಾಣಿಕೆ ಆಟವಾಡುವಲ್ಲಿಪದೇ ಪದೆ ಎಡವಿದರೆ, ಸ್ಟೀಲರ್ಸ್‌ ಮಾತ್ರ ತನ್ನ ಪ್ರಭುತ್ವವನ್ನು ಕಾಯ್ದುಕೊಂಡಿತು.
ಸೂಪರ್‌ ಟ್ಯಾಕಲ್‌ನಲ್ಲಿಮಿಂಚಿದ ಬೆಂಗಾಲ್‌ ವಾರಿಯರ್ಸ್‌ ಪಂದ್ಯದ ಪ್ರಥಮಾರ್ಧಕ್ಕೆ ಹರಿಯಾಣ ಸ್ಟೀಲರ್ಸ್‌ ವಿರುದ್ಧ 18-16 ಅಂಕಗಳ ಅಂತರದಲ್ಲಿಮುನ್ನಡೆ ಕಂಡುಕೊಂಡಿತು. ಪಂದ್ಯದ ಆರಂಭದಿಂದಲೂ ಉಭಯ ತಂಡಗಳು ಜಿದ್ದಾಜಿದ್ದಿನ ಹೋರಾಟ ನೀಡುವ ಮೂಲಕ ಮುನ್ನಡೆಗಾಗಿ ಪ್ರಯತ್ನಿಸಿದವು. ಬೆಂಗಾಲ್‌ ಪರ ಮಣಿಂದರ್‌ ಮತ್ತು ಶ್ರೀಕಾಂತ್‌ ಸೂಧಿರ್ತಿದಾಯಕ ಪ್ರದರ್ಶನ ತೋರಿದರೆ, ಹರಿಯಾಣ ತಂಡದ ಪರ ಸಿದ್ಧಾರ್ಥ್‌ ದೇಸಾಯಿ ಹಾಗೂ ವಿನಯ್‌ ಗಮನ ಸೆಳೆದರು. 13ನೇ ನಿಮಿಷದಲ್ಲಿ ಉಭಯ ತಂಡಗಳು 11 -11ರಲ್ಲಿ ಸಮಬಲದ ಹೋರಾಟ ನೀಡಿದ ಪಂದ್ಯ ಆರಂಭದಲ್ಲೇ ರೋಚಕತೆ ಮೂಡಿಸಿತು. ಈ ವೇಳೆ ಸತತ ಎರಡು ಅಂಕ ಗಳಿಸಿದ ಹರಿಯಾಣ 13-11ರಲ್ಲಿ ಮೇಲುಗೈ ಸಾಧಿಸಿತು. ಆದರೆ ಕೆಲವೇ ನಿಮಿಷಗಳಲ್ಲಿಎರಡು ಸೂಪರ್‌ ಟ್ಯಾಕಲ್‌ನಲ್ಲಿಮಿಂಚಿನ ಆಟವಾಡಿದ ಬೆಂಗಾಲ್‌ 16-17ರಲ್ಲಿ ಅಂತರ ಕಾಯ್ದುಕೊಂಡಿತು.