ಮುಂಬೈ: ಲಾಕ್‌ಡೌನ್ ಸಮಯದಲ್ಲಿ ಬಹುತೇಕ ಎಲ್ಲರೂ ಮನೆಯಲ್ಲೇ ಲಾಕ್ ಆಗಿದ್ದ ಕಾರಣ ಸಹಜವಾಗಿಯೇ ಎನ್ನುವಂತೆ ಹಿಂದಿಗಿಂತ ಹೆಚ್ಚಿನ ದರದ ವಿದ್ಯುತ್ ಬಿಲ್‌ಗಳು ಬಂದಿವೆ. ಈ ಪೈಕಿ ಕೆಲಮನೆಯ ವಿದ್ಯುತ್ ಬಿಲ್‌ಗಳೂ ಶಾಕ್ ನೀಡಲಾರಂಭಿಸಿವೆ. ಟೀಮ್ ಇಂಡಿಯಾದ ಹಿರಿಯ ಆ್ ಸ್ಪಿನ್ನರ್ ಹರ್ಭಜನ್ ಸಿಂಗ್ ಅವರ ಮುಂಬೈನ ಮನೆಯ ವಿದ್ಯುತ್ ಬಿಲ್ ಕೂಡ ಇದೇ ರೀತಿ ಶಾಕ್ ನೀಡಿದೆ.
ವಿದ್ಯುತ್ ಬಿಲ್‌ನ ಅಕ್ಷರ ಸಂದೇಶವನ್ನು ಟ್ವಿಟರ್‌ನಲ್ಲಿ ಹಂಚಿಕೊಂಡಿರುವ ಹರ್ಭಜನ್ ಸಿಂಗ್, ‘ಇಡೀ ಬೀದಿಯ ವಿದ್ಯುತ್ ಬಿಲ್ ಅನ್ನು ನನಗೆ ನೀಡಿದ್ದೀರಾ?’ ಎಂದು ಪ್ರಶ್ನಿಸಿದ್ದಾರೆ. ಐಪಿಎಲ್‌ನಲ್ಲಿ ಚೆನ್ನೈ ಸೂಪರ್‌ಕಿಂಗ್ಸ್ ಪರ ಆಡಬೇಕಾಗಿರುವ ಹರ್ಭಜನ್ ಸಿಂಗ್ ಮಾಡಿರುವ ಟ್ವೀಟ್‌ನ ಪ್ರಕಾರ ಅವರಿಗೆ ಜುಲೈ ತಿಂಗಳಲ್ಲಿ 33,900 ರೂ. ವಿದ್ಯುತ್ ಬಿಲ್ ಬಂದಿದೆ. ಇದಕ್ಕಾಗಿ ಅವರು ತಮ್ಮ ಮನೆಗೆ ವಿದ್ಯುತ್ ಸರಬರಾಜು ಮಾಡುವ ಅದಾನಿ ಎಲೆಕ್ಟ್ರಿಸಿಟಿ ಕಂಪನಿ ವಿರುದ್ಧ ಕಿಡಿಕಾರಿದ್ದಾರೆ.
ಇದನ್ನೂ ಓದಿ: ಇಂಗ್ಲೆಂಡ್ ಸರಣಿ ಜಯದ ಆಸೆಗೆ ಮಳೆ ಅಡಚಣೆ
ತಮಗೆ ಈ ಹಿಂದೆ ಬರುತ್ತಿದ್ದ ವಿದ್ಯುತ್ ಬಿಲ್‌ಗಳಿಗಿಂತ ಇದು 7 ಪಟ್ಟು ಅಧಿಕವಾಗಿದೆ ಎಂದೂ ಹರ್ಭಜನ್ ಸಿಂಗ್ ದೂರಿದ್ದಾರೆ. ಅಲ್ಲದೆ ಆಗಸ್ಟ್ 17ರೊಳಗೆ ವಿದ್ಯುತ್ ಬಿಲ್ ಪಾವತಿಸುವಂತೆ ಸೂಚನೆ ಬಂದಿದೆ ಎಂದು ತಿಳಿಸಿದ್ದಾರೆ. ಹರ್ಭಜನ್ ಮೂಲತಃ ಪಂಜಾಬ್‌ನ ಜಲಂಧರ್‌ನವರಾದರೂ, ಲಾಕ್‌ಡೌನ್ ಸಮಯದಿಂದ ಮುಂಬೈನ ಮನೆಯಲ್ಲಿ ಪತ್ನಿ ಗೀತಾ ಬಾಸ್ರಾ ಮತ್ತು ಪುತ್ರಿ ಹಿನಾಯ ಜತೆ ವಾಸಿಸುತ್ತಿದ್ದಾರೆ.
Itna Bill pure mohalle ka lga diya kya ?? @Adani_Elec_Mum 😳😳😳ALERT: Your Adani Electricity Mumbai Limited Bill for 152857575 of Rs. 33900.00 is due on 17-Aug-2020. To pay, login to Net/Mobile Banking>BillPay normal Bill se 7 time jyada ??? Wah
— Harbhajan Turbanator (@harbhajan_singh) July 26, 2020