ಗಾಂಧಿನಗರ: ಅಹಮದಾಬಾದ್ನ ಸರ್ಕಾರಿ ಆಸ್ಪತ್ರೆಯಲ್ಲಿ ಕೋವಿಡ್-19 ಪೀಡಿತರನ್ನು ಧರ್ಮದ ಆಧಾರದಲ್ಲಿ ಪ್ರತ್ಯೇಕ ವಾರ್ಡ್ಗಳಲ್ಲಿ ಇರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂಬ ವರದಿಗಳನ್ನು ಗುಜರಾತ್ ಸರ್ಕಾರ ತಳ್ಳಿ ಹಾಕಿದೆ.
ರೋಗಿಗಳನ್ನು ಅವರ ವೈದ್ಯಕೀಯ ಸ್ಥಿತಿ, ಕಾಯಿಲೆಯ ಗಂಭೀರತೆ, ವಯಸ್ಸು ಹಾಗೂ ಗುಣಲಕ್ಷಣಗಳ ಬಗ್ಗೆ ವೈದ್ಯರು ನೀಡುವ ವರದಿಗೆ ಅನುಗುಣವಾಗಿ ಪ್ರತ್ಯೇಕ ವಾರ್ಡ್ಗಳಲ್ಲಿ ಇರಿಸಲಾಗುತ್ತದೆ. ಧರ್ಮದ ಆಧಾರದಲ್ಲಿ ರೋಗಿಗಳನ್ನು ಬೇರೆ ಬೇರೆ ವಾರ್ಡ್ಗಳಲ್ಲಿ ಇಡಲಾಗಿದೆ ಎಂಬ ವರದಿಗಳು ಸಂಪೂರ್ಣ ಆಧಾರರಹಿತವಾಗಿವೆ ಎಂದು ಗುಜರಾತ್ನ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಟ್ವಿಟರ್ ಮೂಲಕ ಸ್ಪಷ್ಟಪಡಿಸಿದೆ.
ಅಹಮದಾಬಾದ್ನ ಸರ್ಕಾರಿ ಆಸ್ಪತ್ರೆಯಲ್ಲಿ ಒಟ್ಟು 186 ಜನರು ದಾಖಲಾಗಿದ್ದು, ಈ ಪೈಕಿ 150 ಸೋಂಕಿತರಾಗಿದ್ದಾರೆ. ಇವರಲ್ಲಿ ಒಂದು ಕೋಮಿಗೆ ಸೇರಿದ 40 ಜನರನ್ನು ಪ್ರತ್ಯೇಕ ವಾರ್ಡ್ನಲ್ಲಿ ಇರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಹೇಳಲಾಗಿತ್ತು. ಸರ್ಕಾರದ ಆದೇಶದ ಮೇರೆಗೆ ರೋಗಿಗಳನ್ನು ಪ್ರತ್ಯೇಕವಾಗಿ ಇರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಆಸ್ಪತ್ರೆಯ ವೈದ್ಯಕೀಯ ಅಧೀಕ್ಷಕ ಡಾ.ಗುಣವಂತ ಎಚ್. ರಾಠೋಡ್ ಹೇಳಿದ್ದಾಗಿ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಾಡಿತ್ತು. ಜತೆಗೆ, ರೋಗಿಗಳು ಇದನ್ನೇ ಹೇಳಿದ್ದಾರೆಂದು ತಿಳಿಸಿತ್ತು.
ಈ ನಡುವೆ, ಗುಜರಾತ್ನಲ್ಲಿ ಬುಧವಾರ ಮತ್ತೆ 42 ಹೊಸ ಸೋಂಕು ಪ್ರಕರರಣಗಳು ವರದಿಯಾಗುವ ಮೂಲಕ ಒಟ್ಟಾರೆ ಸೋಂಕಿತರ ಸಂಖ್ಯೆ 695ಕ್ಕೆ ತಲುಪಿದಂತಾಗಿದೆ. ಅದರಲ್ಲೂ ಅಹಮದಾಬಾದ್ವೊಂದರಲ್ಲಿಯೇ 404 ಜನರು ಸೋಂಕಿಗೆ ಒಳಗಾಗಿದ್ದಾರೆ. ವಡೋದರಾದಲ್ಲಿ 116 ಜನರು ಪಾಸಿಟಿವ್ ಆಗಿದ್ದಾರೆ.
ಅಹಮದಾಬಾದ್ ಆಸ್ಪತ್ರೆಯಲ್ಲಿ ಧರ್ಮ ಆಧರಿಸಿ ಪ್ರತ್ಯೇಕ ವಾರ್ಡ್ನಲ್ಲಿ ಕೋವಿಡ್ ರೋಗಿಗಳಿಗೆ ಚಿಕಿತ್ಸೆ