ವಾಷಿಂಗ್ಟನ್: ಕೊರೊನಾ ವೈರಸ್ನಿಂದಾಗಿ ಚೀನಾ ಅಕ್ಷರಶಃ ತತ್ತರಿಸಿದ್ದು, ಇತರೆ ದೇಶಗಳಲ್ಲಿಯೂ ಸಹ ಈ ವೈರಸ್ ಇರುವುದು ಪತ್ತೆಯಾಗಿದೆ. ಪ್ರಪಂಚದ ಜನರು ಕೊರೊನಾ ವೈರಸ್ನ ದಾಳಿಗೆ ತುತ್ತಾಗದಿರುವಂತೆ ತಡೆಗಟ್ಟಲು ಮುನ್ನೆಚ್ಚರಿಕಾ ಕ್ರಮಗಳನ್ನು ನೀಡುವ ಸಲುವಾಗಿ ಗೂಗಲ್ ಎಸ್ಒಎಸ್ ಅಲರ್ಟ್ ಜಾರಿಗೆ ತಂದಿದೆ.
ಗೂಗಲ್ನಲ್ಲಿ ನೀವು ಕೊರೊನಾ ವೈರಸ್ ಎಂದು ಸರ್ಚ್ ಮಾಡಿದಾಕ್ಷಣ ನಿಮಗೆ ಮೊದಲು ಕೊರೊನಾ ವೈರಸ್ನಿಂದ ಹೇಗೆ ರಕ್ಷಣೆ ಪಡೆಯಬೇಕು, ಯಾವ ರೀತಿಯಲ್ಲಿ ಮುನ್ನೆಚ್ಚರಿಕಾ ಕ್ರಮವನ್ನು ವಹಿಸಬೇಕು ಎಂದು ತೋರಿಸುತ್ತದೆ. ವಿಶ್ವ ಆರೋಗ್ಯ ಸಂಸ್ಥೆಯು ಕೊರೊನಾ ವೈರಸ್ ದಾಳಿಯನ್ನು ಅಂತಾರಾಷ್ಟ್ರೀಯ ಆರೋಗ್ಯ ತುರ್ತು ಪರಿಸ್ಥಿತಿ ಎಂದು ಕರೆದಿದ್ದು, ಗೂಗಲ್ನ ಜತೆಗೂಡಿ ಈ ಎಸ್ಒಎಸ್ ಅಲರ್ಟ್ ಜಾರಿ ಮಾಡಿದೆ.
ಕೊರೊನಾ ವೈರಸ್ ಬಗ್ಗೆ ನೀವು ಸರ್ಚ್ ಮಾಡಿದಾಗ ವಿಶ್ವ ಆರೋಗ್ಯ ಸಂಸ್ಥೆಯಿಂದ ವೈರಸ್ ಕುರಿತಾಗಿ ನೀಡಲ್ಪಟ್ಟ ಮಾಹಿತಿ ಮತ್ತು ಎಚ್ಚರಿಕೆಗಳು ಮೊದಲಿಗೆ ಕಾಣಲಿವೆ.
ಚೀನಾದಲ್ಲಿ ಕೊರೊನಾ ವೈರಸ್ನಿಂದಾಗಿ ಸಂಭವಿಸಿರುವ ಸಾವು ನೋವುಗಳಿಗೆ ಸ್ಪಂದಿಸಿರುವ ಗೂಗಲ್, ತಮ್ಮ ಸಂಸ್ಥೆಯ ವತಿಯಿಂದ 2,50,000 ಡಾಲರ್ ಹಣವನ್ನು ಚೀನಾದ ರೆಡ್ ಕ್ರಾಸ್ಗೆ ಪರಿಹಾರ ನಿಧಿಯಾಗಿ ಕೊಟ್ಟಿದೆ.
ಚೀನಾದಲ್ಲಿ ಇದುವರೆಗೆ 10,000ದಷ್ಟು ಮಂದಿಯಲ್ಲಿ ವೈರಸ್ ಇರುವುದು ಪತ್ತೆಯಾಗಿದ್ದು ಸಾವಿನ ಸಂಖ್ಯೆ 213ಕ್ಕೆ ಏರಿಕೆಯಾಗಿದೆ. ಚೀನಾ ಹೊರೆತಾಗಿ ಒಟ್ಟು 18 ದೇಶಗಳಲ್ಲಿ ವೈರಸ್ ಇರುವುದು ಪತ್ತೆಯಾಗಿದೆ. ಭಾರತದ ಕೇರಳದಲ್ಲಿ ನಿನ್ನೆ ಮೊದಲ ವೈರಸ್ ಪತ್ತೆಯಾಗಿದೆ. (ಏಜೆನ್ಸೀಸ್)