ಬೆಂಗಳೂರು: ಕರೊನಾ ಮೂರನೇ ಅಲೆಯ ಭೀತಿ ಹೆಚ್ಚುತ್ತಿರುವಾಗ, ಮಕ್ಕಳಿಗೆ ಕರೊನಾ ಲಸಿಕೆ ಬಂದಿರುವ ಶುಭ ಸುದ್ದಿ ಬಂದಿದೆ. ಜೈಡಸ್ ಕ್ಯಾಡಿಲಾದ ಮೂರು-ಡೋಸ್ ಕರೊನಾ ಲಸಿಕೆಗೆ, 12 ವರ್ಷ ಮೇಲ್ಪಟ್ಟವರಿಗೆ ಬಳಸಲು, ಭಾರತದ ಡ್ರಗ್ ನಿಯಂತ್ರಕರು ಶುಕ್ರವಾರ ಅನುಮೋದನೆ ನೀಡಿದ್ದಾರೆ. ಜೈಕೋವಿ-ಡಿ ಹೆಸರಿನ ಈ ಡಿಎನ್ಎ ಲಸಿಕೆಯು ಭಾರತದಲ್ಲಿ ಮಕ್ಕಳಿಗಾಗಿ ಲಭ್ಯವಾಗುತ್ತಿರುವ ಮೊದಲ ಕರೊನಾ ಲಸಿಕೆಯಾಗಿದೆ.
ಕ್ಯಾಡಿಲಾ ಹೆಲ್ತ್ಕೇರ್ ಲಿಮಿಟೆಡ್ ಕಂಪೆನಿ ಉತ್ಪಾದಿಸುತ್ತಿರುವ ಜೈಕೋವಿ-ಡಿ ಲಸಿಕೆಯನ್ನು ಎಲ್ಲಾ ವಯಸ್ಕರಿಗೆ ಮತ್ತು 12 ವರ್ಷ ಮೇಲ್ಪಟ್ಟ ಮಕ್ಕಳಿಗೆ ತುರ್ತು ಬಳಕೆಗೆ ಅನುಮೋದನೆ ನೀಡಲಾಗಿದೆ. ರಾಷ್ಟ್ರಾದ್ಯಂತ 28,000 ವಾಲೆಂಟಿಯರ್ಗಳ ಮೇಲೆ ನಡೆಸಿದ ಟ್ರಯಲ್ಗಳಲ್ಲಿ ಈ ಲಸಿಕೆಗೆ ಶೇ. 66.6 ಪರಿಣಾಮಕಾರಿತ್ವ ಇರುವುದು ಕಂಡುಬಂದಿದೆ ಎಂದು ಕಂಪೆನಿ ತಿಳಿಸಿದೆ.
ಇದನ್ನೂ ಓದಿ: ಸದ್ಯದಲ್ಲೇ ಈ ಮಹಾನಗರದಲ್ಲಿ ಕರೊನಾ ಲಸಿಕಾ ಅಭಿಯಾನ ಕಂಪ್ಲೀಟ್!
ಕ್ಯಾಡಿಲಾ ಕಂಪೆನಿಯು ವರ್ಷಕ್ಕೆ 100 ರಿಂದ 120 ಮಿಲಿಯನ್ ಡೋಸ್ಗಳನ್ನು ಉತ್ಪಾದಿಸುವ ಗುರಿ ಹೊಂದಿದ್ದು, ಲಸಿಕೆಯ ಶೇಖರಣೆಯನ್ನು ಆರಂಭಿಸಿದೆ. ಇದು ಜಗತ್ತಿನ ಮೊದಲ ಪ್ಲಾಸ್ಮಿಡ್ ಡಿಎನ್ಎ ಲಸಿಕೆಯಾಗಿದ್ದು, ಭಾರತದಲ್ಲಿ ಬಳಕೆಗೆ ಅನುಮೋದನೆ ಪಡೆದಿರುವ 6ನೇ ಕರೊನಾ ಲಸಿಕೆಯಾಗಿದೆ.
ಜೈಕೋವಿ-ಡಿ ಲಸಿಕೆಯು ಡೆಲ್ಟಾ ರೂಪಾಂತರಿ ಸೇರಿದಂತೆ ಕರೊನಾ ವೈರಸ್ನ ಹೊಸ ರೂಪಾಂತರಿಗಳ ವಿರುದ್ಧವೂ ಪರಿಣಾಮಕಾರಿಯಾಗಿದೆ. ಈ ಲಸಿಕೆಯನ್ನು ಸಾಂಪ್ರದಾಯಿಕವಾಗಿ ಬಳಸುವ ಸಿರಿಂಜ್ಗಳ ಬದಲಿಗೆ ಸೂಜಿರಹಿತ ಅಪ್ಲಿಕೇಟರ್ನ ಮೂಲಕ ನೀಡಲಾಗುತ್ತದೆ ಎಂದು ಕ್ಯಾಡಿಲಾ ಕಂಪೆನಿ ತಿಳಿಸಿರುವುದಾಗಿ ವರದಿಯಾಗಿದೆ. (ಏಜೆನ್ಸೀಸ್)
ಸಿಂಪಲ್ ಒನ್ ಎಲೆಕ್ಟ್ರಿಕ್ ಸ್ಕೂಟರ್: ಐದೇ ದಿನಗಳಲ್ಲಿ 30,000 ಬುಕ್ಕಿಂಗ್!