ಗೋಕರ್ಣ: ಅತ್ಯಂತ ಕಡಿಮೆ ಭಕ್ತರು ಗೋಕರ್ಣಕ್ಕೆ ಆಗಮಿಸಿದ ಹಿನ್ನೆಲೆಯಲ್ಲಿ ಈ ವರ್ಷದ ಮಹಾಶಿವರಾತ್ರಿ ಹೊಸ ದಾಖಲೆಗೆ ಕಾರಣವಾಯಿತು. ಮಹಾಬಲೇಶ್ವರ ಮಂದಿರದಲ್ಲಿ ಎಂದಿನ ನೂಕು ನುಗ್ಗಲು ಇಲ್ಲದೆ ಸರತಿಯಲ್ಲಿ ನಿಂತು ಭಕ್ತರು ಶಾಂತವಾಗಿ ಪೂಜೆ ಸಲ್ಲಿಸಿದರು. ಗರ್ಭಗುಡಿ ಮತ್ತು ನಂದಿ ಮಂಟಪದಲ್ಲಿ ದಟ್ಟಣೆ ಇರಲಿಲ್ಲ. ಈ ವೇಳೆ ಯಾತ್ರಿಕರಿಂದ ತುಂಬಿರುತ್ತಿದ್ದ ಇಲ್ಲಿನ ಸಮುದ್ರ, ಕೋಟಿತೀರ್ಥ, ರಥಬೀದಿ ಮತ್ತು ಎಲ್ಲ ಮುಖ್ಯ ಸ್ಥಳಗಳು ಬರಿದಾಗಿದ್ದವು. ಪ್ರತಿ ವರ್ಷ ಸಮುದ್ರ ತೀರದ ವರೆಗೆ ಮತ್ತು ನಾಗಬೀದಿ ಉದ್ದಕ್ಕೂ ಮಂದಿರಗಳಲ್ಲಿ ಪೂಜೆ ಸಲ್ಲಿಸಲು ಭಕ್ತರ ಸಾಲು ಇರುತ್ತಿತ್ತು. ಈ ವರ್ಷ ಈ ಭಾಗಗಳು ನಿರ್ಜನವಾಗಿದ್ದವು. ಇದರ ಜೊತೆಗೆ ಜಿಲ್ಲೆಯ ವಿವಿಧೆಡೆಯಿಂದ ಬರುತ್ತಿದ್ದ ಭಕ್ತರ ಸಂಖ್ಯೆಯಲ್ಲೂ ಕಡಿಮೆಯಾಗಿತ್ತು.
ಜಾತ್ರಾ ವಿಶೇಷ ಬಸ್ ಬರಲಿಲ್ಲ: ಸಾರಿಗೆ ಇಲಾಖೆ ಶಿವರಾತ್ರಿಗೆ ಹುಬ್ಬಳ್ಳಿ ಮತ್ತು ಬೆಳಗಾವಿಯಿಂದ ಗೋಕರ್ಣಕ್ಕೆ ಹೋಗುವ ಪ್ರಯಾಣಿಕರಿಗೆ ಪ್ರತ್ಯೇಕ ನಿಲ್ದಾಣ ನಿರ್ವಿುಸುತ್ತಿತ್ತು. ಶಿವರಾತ್ರಿ ಹಿಂದಿನ ಸಂಜೆಯಿಂದಲೆ ಈ ಸ್ಥಳಗಳಿಂದ ವಿಶೇಷ ಗಾಡಿ ಬಿಡಲಾಗುತ್ತಿತ್ತು. ಈ ಸಲ ಗುರುವಾರ ಮಧ್ಯಾಹ್ನದವರೆಗೂ ಆ ಭಾಗಗಳಿಂದ ಒಂದೂ ಜಾತ್ರಾ ಬಸ್ಗಳು ಬರಲಿಲ್ಲ. ಉಳಿದಂತೆ ಕಾರವಾರ, ಅಂಕೋಲಾ, ಕುಮಟಾ ಸೇರಿ ಜಿಲ್ಲೆಯ ವಿವಿಧ ಪ್ರಮುಖ ಊರುಗಳಿಗೆ ಪ್ರಯಾಣಿಕರ ಸಂಖ್ಯೆಗೆ ಅನುಗುಣವಾಗಿ ಹೆಚ್ಚಿನ ಬಸ್ ಬಿಡಲಾಗಿತ್ತು. ಪ್ರತಿ ಶಿವರಾತ್ರಿಗೆ ಆತ್ಮಲಿಂಗ ಪೂಜೆಗೆ ಬರುತ್ತಿದ್ದ ಹಿರಿಯ ಶಿಕ್ಷಣ ತಜ್ಞ ಪ್ರಭಾಕರ ಕೋರೆ ಅವರು ಈ ಬಾರಿ ಭೇಟಿ ನೀಡಲಿಲ್ಲ. ಜಿಲ್ಲಾ ಹೆಚ್ಚುವರಿ ಪೊಲೀಸ್ ವರಿಷ್ಠ ಬದ್ರಿನಾಥ್, ಭಟ್ಕಳ ಡಿಎಸ್ಪಿ ಬೆಳ್ಳಿಯಪ್ಪ ಗೋಕರ್ಣಕ್ಕೆ ಭೇಟಿ ನೀಡಿ ಪರಿಸ್ಥಿತಿ ಅವಲೋಕಿಸಿದರು. ಸಿಪಿಐ ಪರಮೇಶ್ವರ ಗುನಗ, ಪಿಎಸ್ಐ ನವೀನ ನಾಯ್ಕ ರಕ್ಷಣೆ ನಿರ್ವಹಿಸುತ್ತಿದ್ದಾರೆ.
ಗಡಿಯಲ್ಲಿ ತಪಾಸಣೆ: ಗೋವಾ, ಮಹಾರಾಷ್ಟ್ರ ಮತ್ತು ಆಂಧ್ರ ಪ್ರದೇಶದ ಪ್ರವಾಸಿಗರು ಈ ಬಾರಿ ಕೋವಿಡ್ ಭಯದಿಂದ ಗೋಕರ್ಣಕ್ಕೆ ಬರಲಿಲ್ಲ. ಇದರ ಜೊತೆಗೆ ರಾಜ್ಯದ ಗಡಿ ಭಾಗಗಳಲ್ಲಿ ಕಟ್ಟುನಿಟ್ಟಾಗಿ ತಪಾಸಣೆ ನಡೆಸಿ ಕೋವಿಡ್ ನೆಗೆಟಿವ್ ಪ್ರಮಾಣ ಪತ್ರ ಇದ್ದವರಿಗೆ ಮಾತ್ರ ಬಿಡಲಾಗುತ್ತಿರುವುದರಿಂದ ಹೆಚ್ಚಿನವರು ಇಲ್ಲಿಗೆ ಬರಲು ಹಿಂದೇಟು ಹಾಕಿದರು ಎನ್ನಲಾಗಿದೆ.
ವಿವಿಧ ವ್ಯವಸ್ಥೆ : ಮಹಾಬಲೇಶ್ವರ ಮಂದಿರ ಸೇರಿ ಎಲ್ಲ ಮಂದಿರಗಳು, ಆರೋಗ್ಯ, ಹೆಸ್ಕಾಂ ಮತ್ತು ಪೊಲೀಸ್ ಇಲಾಖೆ ಎಂದಿನ ವ್ಯವಸ್ಥೆ ಮಾಡಿಕೊಂಡಿದ್ದವು. ಸ್ಥಳೀಯ ಪಂಚಾಯಿತಿ ಕುಡಿಯುವ ನೀರು, ಸ್ವಚ್ಛತೆ, ದಾರಿ ದೀಪದ ಏರ್ಪಾಟು ಮಾಡಿಕೊಂಡಿತ್ತು.