ಮುಂಬೈ: ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟರ್, ಮಾಜಿ ಕ್ರಿಕೆಟ್ ದಿಗ್ಗಜ ಡೀನ್ ಜೋನ್ಸ್ ಅವರು ಮುಂಬೈನಲ್ಲಿ, ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ.
ಡೀನ್ ಜೋನ್ಸ್ ಅವರು ಸದ್ಯ ನಡೆಯುತ್ತಿರುವ ಐಪಿಎಲ್ ನಲ್ಲಿ ವೀಕ್ಷಕ ವಿವರಣೆಗಾರರಾಗಿದ್ದರು. ತನ್ನಿಮಿತ್ತ ಮುಂಬೈನಲ್ಲಿ ಇದ್ದರು. ಇಂದು ಮಧ್ಯಾಹ್ನ 12 ಗಂಟೆ ಹೊತ್ತಿಗೆ ತೀವ್ರ ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ.
ಜೋನ್ಸ್ ಅವರು 1984 ರಿಂದ 1992ರ ಅವಧಿಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ತೊಡಗಿಕೊಂಡಿದ್ದರು. 52 ಟೆಸ್ಟ್ ಪಂದ್ಯಗಳನ್ನಾಡಿ 3,631 ರನ್ (ಬ್ಯಾಟಿಂಗ್ ಸರಾಸರಿ-46.55, 14 ಅರ್ಧ ಶತಕ ಮತ್ತು 11 ಶತಕ) ಹಾಗೂ 164 ಏಕದಿನ ಪಂದ್ಯಗಳಿಂದ 6068 ರನ್( ಬ್ಯಾಟಿಂಗ್ ಸರಾಸರಿ 44.61, 7 ಶತಕ ಮತ್ತು 46 ಅರ್ಧಶತಕ) ಗಳಿಸಿದ್ದರು. 1987ರ ವಿಶ್ವಕಪ್ ವಿಜೇಶ ಆಸ್ಟ್ರೇಲಿಯಾ ತಂಡದ ಸದಸ್ಯರಾಗಿದ್ದರು.
ಇಂದು ಡೀನ್ ಮರ್ವಿನ್ ಜೋನ್ಸ್ ಅವರು ಮುಂಬೈನಲ್ಲಿ ಮೃತಪಟ್ಟಿದ್ದನ್ನು ಸ್ಟಾರ್ ಇಂಡಿಯಾ ದೃಢಪಡಿಸಿದೆ. ಜೋನ್ಸ್ ಅವರು ಹೃದಯಾಘಾತದಿಂದ ಮೃತಪಟ್ಟಿದ್ದಾರೆ. ಅವರ ಕುಟುಂಬಕ್ಕೆ ದುಃಖ ಭರಿಸುವ ಶಕ್ತಿಯನ್ನು ದೇವರು ನೀಡಲಿ. ಈ ಸಂದರ್ಭದಲ್ಲಿ ಅವರೊಂದಿಗೆ ನಾವಿದ್ದೇವೆ. ಆಸ್ಟ್ರೇಲಿಯಾದ ಹೈಕಮಿಷನ್ ಜತೆ ಸಂಪರ್ಕದಲ್ಲಿದ್ದು, ಎಲ್ಲ ಸಿದ್ಧತೆಗಳನ್ನೂ ಮಾಡಲಾಗುತ್ತಿದೆ ಎಂದು ತಿಳಿಸಿದೆ.
ಡೀನ್ ಜೋನ್ಸ್ ಅವರು ‘ಪ್ರೊಫೆಸರ್ ಡಿಯಾನೊ’ ಎಂದೇ ಪ್ರಸಿದ್ಧರಾಗಿದ್ದರು. ತಮ್ಮ ವಿಭಿನ್ನ ಬ್ಯಾಟಿಂಗ್ ಶೈಲಿಯಿಂದ ಹೆಸರಾಗಿದ್ದರು. (ಏಜೆನ್ಸೀಸ್)